ലിബറൽ നേരിടുന്ന പ്രതിസന്ധിയും വൺ നേഷന്റെ കുതിപ്പും
സൗത്ത് ഓസ്ട്രേലിയയുടെ രാഷ്ട്രീയ ചരിത്രം തിരുത്തിക്കുറിക്കുന്നതാണ് ലേബർ പാർട്ടിയുടെ ഈ തിരഞ്ഞെടുപ്പ് ഫലം. അടിസ്ഥാന സൗകര്യ വികസനങ്ങളിലും ജനകീയ വിഷയങ്ങളിലും ഊന്നിയുള്ള പ്രവർത്തനങ്ങളിലൂടെ ലേബർ പാർട്ടി തങ്ങളുടെ സ്ഥാനം ഭദ്രമാക്കിയപ്പോൾ, ലിബറൽ പാർട്ടിക്ക് അടിത്തറ മുതൽ വലിയൊരു അഴിച്ചുപണി ആവശ്യമായി വന്നിരിക്കുന്നു. കൂടാതെ, വൺ നേഷൻ ഉയർത്തുന്ന വെല്ലുവിളികൾ വരാനിരിക്കുന്ന ഫെഡറൽ തിരഞ്ഞെടുപ്പുകളിലും പ്രതിഫലിച്ചേക്കാം.
ലിബറലുകൾ നേരിടുന്നത് ചരിത്രത്തിലെ വലിയ പ്രതിസന്ധി
വെറും മൂന്ന് മാസം മുൻപ് (ഡിസംബർ 2025-ൽ) മാത്രം നേതൃസ്ഥാനത്തേക്ക് വന്ന ആഷ്ടൺ ഹേണിന് കീഴിൽ ലിബറലുകൾ നേരിട്ടത് 1993-ന് ശേഷമുള്ള ഏറ്റവും വലിയ തകർച്ചയാണ്. മെട്രോ അഡലെയ്ഡിൽ പാർട്ടി ഏതാണ്ട് പൂർണമായി തുടച്ചുനീക്കപ്പെട്ട അവസ്ഥയിലാണ്. എങ്കിലും ആഷ്ടൺ ഹേണിനെ പിന്തുണച്ചുകൊണ്ട് ഫെഡറൽ ലിബറൽ സെനറ്റർ ആൻ റസ്റ്റൺ രംഗത്തെത്തി. “ആഷ്ടൺ ഒരു മികച്ച നേതാവാണ്, അവളെ പിന്തുണയ്ക്കാത്തവർ പാർട്ടിയിൽ തുടരേണ്ടതില്ല,” എന്നാണ് അവർ പറഞ്ഞത്. മുൻകാലങ്ങളിലുണ്ടായ സ്കാൻഡലുകൾ, ഇടയ്ക്കിടെയുള്ള നേതൃമാറ്റങ്ങൾ എന്നിവയാണ് ലിബറലുകളുടെ ഈ തകർച്ചയ്ക്ക് കാരണമായത്.
വൺ നേഷന്റെ കുതിപ്പും ഓസ്ട്രേലിയൻ രാഷ്ട്രീയത്തിന്റെ ഭാവിയും
റീജണൽ മേഖലകളിലെ ജനങ്ങളുടെ അസംതൃപ്തി വോട്ടാക്കി മാറ്റാൻ വൺ നേഷന് കഴിഞ്ഞു എന്നതാണ് ഈ തിരഞ്ഞെടുപ്പിന്റെ ബാക്കിപത്രം. ജീവിതച്ചെലവ് (Cost of living), ഇമിഗ്രേഷൻ നയങ്ങൾ തുടങ്ങിയ വിഷയങ്ങൾ ഉയർത്തിക്കാട്ടി അവർ നടത്തിയ കാമ്പെയിൻ വൻ വിജയമായി. ലോവർ ഹൗസിൽ സീറ്റില്ലെങ്കിലും അപ്പർ ഹൗസിൽ (ലെജിസ്ലേറ്റീവ് കൗൺസിൽ) അവർ നിർണായക ശക്തിയായേക്കാം (ഇതിന്റെ ഫലം വരാൻ ആഴ്ചകളെടുക്കും).
1998-ലെ ക്വീൻസ്ലാൻഡ് തിരഞ്ഞെടുപ്പിന് സമാനമായ മുന്നേറ്റമാണ് വൺ നേഷൻ ഇവിടെ നടത്തിയിരിക്കുന്നതെന്നും, ഇത് ഓസ്ട്രേലിയൻ രാഷ്ട്രീയത്തിൽ പുതിയൊരു മാറ്റത്തിന് (Realignment) വഴിവെച്ചേക്കാമെന്നും സിഡ്നി യൂണിവേഴ്സിറ്റിയിലെ പൊളിറ്റിക്കൽ സയന്റിസ്റ്റ് ലൂക്ക് മാൻസില്ലോ വിലയിരുത്തുന്നു.
