ഓസ്‌ട്രേലിയയിൽ വെറും 250 ഡോളറിന് പുതിയ വാഷിംഗ് മെഷീൻ; ആർക്കൊക്കെ ലഭിക്കും?

കുതിച്ചുയരുന്ന ജീവിതച്ചെലവുകൾക്കിടയിൽ സാധാരണക്കാർക്ക് വലിയൊരു ആശ്വാസമായി ന്യൂ സൗത്ത് വെയിൽസ് (NSW) സർക്കാരിന്റെ NSW Washing Machine Exchange Program വീണ്ടും ആരംഭിച്ചിരിക്കുകയാണ്. എന്നാൽ ഈ വൻ വിലക്കിഴിവ് പ്രഖ്യാപിച്ചതിന് പിന്നിൽ സർക്കാർ ലക്ഷ്യമിടുന്ന മറ്റൊരു വലിയ കാരണമുണ്ട്, ഇത് പ്രവാസികളായ മലയാളികൾ ഉൾപ്പെടെയുള്ള സാധാരണക്കാരെ എങ്ങനെയെല്ലാം ബാധിക്കുമെന്ന് പരിശോധിക്കാം.

വെറും 250 ഡോളറിന് പുതിയ വാഷിംഗ് മെഷീൻ

സാമ്പത്തികമായി പിന്നോക്കം നിൽക്കുന്ന കുടുംബങ്ങളെ സഹായിക്കുന്നതിനായി 6,000 പുതിയ വാഷിംഗ് മെഷീനുകളാണ് സർക്കാർ ഇത്തവണ വിതരണം ചെയ്യുന്നത്. പഴയ ‘ടോപ്പ്-ലോഡർ’ (top-loader) മെഷീനുകൾക്ക് പകരമായി, കൂടുതൽ കാര്യക്ഷമതയുള്ള 8 കിലോഗ്രാമിന്റെ ഫ്രണ്ട്-ലോഡർ (front-loader) മെഷീനുകളാണ് വെറും $250 നൽകിയാൽ ലഭിക്കുക.

പ്രമുഖ ഇലക്ട്രോണിക്സ് ശൃംഖലയായ ‘ദി ഗുഡ് ഗയ്‌സ്’ (The Good Guys) വഴിയാണ് സർക്കാർ ഈ പദ്ധതി നടപ്പിലാക്കുന്നത്. പുതിയ മെഷീൻ വീട്ടിലെത്തിച്ച് നൽകുന്നതിനും, പഴയ മെഷീൻ തിരികെ കൊണ്ടുപോകുന്നതിനുമുള്ള തുകയും, രണ്ട് വർഷത്തെ വാറണ്ടിയും ഈ 250 ഡോളറിൽ ഉൾപ്പെടുന്നുവെന്ന് അധികൃതർ വ്യക്തമാക്കി.

പദ്ധതിയുടെ യഥാർത്ഥ ലക്ഷ്യവും അപേക്ഷിക്കേണ്ട വിധവും

പുതിയ ഫ്രണ്ട്-ലോഡർ മെഷീനുകൾ ഉപയോഗിക്കുന്നതിലൂടെ ഓരോ കുടുംബത്തിനും പ്രതിവർഷം ശരാശരി $300 വൈദ്യുതി-വെള്ള ബില്ലുകളിൽ ലാഭിക്കാൻ സാധിക്കുമെന്നാണ് സർക്കാർ കണക്കാക്കുന്നത്. ഒരു വർഷം 20,000 ലിറ്റർ വെള്ളം ലാഭിക്കാൻ ഇതിലൂടെ കഴിയുമെന്നും, സംസ്ഥാനത്തെ ജലക്ഷാമം നേരിടാനാണ് ഇത്തരമൊരു പദ്ധതിയെന്നും ജലവിഭവ വകുപ്പ് മന്ത്രി റോസ് ജാക്സൺ വ്യക്തമാക്കി.

പെൻഷൻകാർ, വെറ്ററൻസ്, സോഷ്യൽ ഹൗസിംഗ് വാടകക്കാർ, സെന്റർലിങ്കിൽ നിന്നുള്ള ലോ ഇൻകം കാർഡ് (Low Income Card) ഉള്ളവർ എന്നിവർക്കാണ് അപേക്ഷിക്കാൻ അർഹതയുള്ളത്. പഴയ ടോപ്പ്-ലോഡർ മെഷീൻ ഉള്ളവർക്ക് സർക്കാരിന്റെ ഔദ്യോഗിക വെബ്സൈറ്റ് വഴി അപേക്ഷകൾ സമർപ്പിക്കാവുന്നതാണ്. മുൻ വർഷങ്ങളിൽ ഒരാഴ്ചയ്ക്കുള്ളിൽ തന്നെ മെഷീനുകൾ വിറ്റുതീർന്നതിനാൽ അർഹരായവർ എത്രയും വേഗം അപേക്ഷിക്കാൻ പ്രത്യേകം ശ്രദ്ധിക്കുക.

സർക്കാരിന്റെ ഈ പുതിയ പദ്ധതി സാധാരണക്കാർക്ക് ഗുണകരമാകുമെന്ന് നിങ്ങൾ കരുതുന്നുണ്ടോ? നിങ്ങളുടെ അഭിപ്രായങ്ങൾ താഴെ കമന്റ് ബോക്സിൽ രേഖപ്പെടുത്തുക.

Photo Source: Westinghouse Australia

Sajin Thiruvallam
News Editor