Medicare Bulk Billing പദ്ധതി വൻ വിജയത്തിലേക്ക്; രാജ്യത്തെ ക്ലിനിക്കുകളുടെ എണ്ണം 3,700 കടന്നു

കാൻബറ: ആരോഗ്യ പരിരക്ഷ കൂടുതൽ ജനകീയമാക്കുന്നതിന്റെ ഭാഗമായി ഓസ്‌ട്രേലിയൻ സർക്കാർ നടപ്പിലാക്കിയ മെഡികെയർ ബൾക്ക് ബില്ലിംഗ് (Medicare Bulk Billing) പദ്ധതി വൻ വിജയത്തിലേക്ക്. 2027 അവസാനത്തോടെ രാജ്യത്ത് 3,600 ബൾക്ക് ബില്ലിംഗ് ക്ലിനിക്കുകൾ തുടങ്ങാൻ ലക്ഷ്യമിട്ടിരുന്ന സർക്കാർ, നിശ്ചിത സമയത്തിന് ഏകദേശം രണ്ട് വർഷം മുൻപേ ഈ നേട്ടം സ്വന്തമാക്കി. ഏറ്റവും പുതിയ കണക്കുകൾ പ്രകാരം രാജ്യത്തുടനീളം 3,700-ലധികം ക്ലിനിക്കുകൾ ഇപ്പോൾ പൂർണ്ണമായും ബൾക്ക് ബില്ലിംഗ് സംവിധാനത്തിലേക്ക് മാറിയിട്ടുണ്ട്.

ലക്ഷ്യത്തിലേക്ക് അതിവേഗം പദ്ധതി പൂർണ്ണ തോതിൽ നടപ്പിലാകുമ്പോൾ രാജ്യത്താകെ 4,800 ക്ലിനിക്കുകൾ എന്ന ലക്ഷ്യത്തിലേക്കാണ് സർക്കാർ നീങ്ങുന്നത്. ഇതിന്റെ പകുതിയിലേറെ ഇപ്പോൾ തന്നെ പൂർത്തിയായിക്കഴിഞ്ഞു. പുതിയതായി രജിസ്റ്റർ ചെയ്ത 3,700 ക്ലിനിക്കുകളിൽ 1,400 എണ്ണം നേരത്തെ മിക്സഡ് ബില്ലിംഗ് (mixed billing) സംവിധാനം പിന്തുടർന്നിരുന്നവയാണ്. പദ്ധതിയിലേക്ക് അതിവേഗം ക്ലിനിക്കുകൾ കടന്നുവന്നതോടെ, ഓസ്‌ട്രേലിയയിലെ 97 ശതമാനം ആളുകൾക്കും തങ്ങളുടെ താമസസ്ഥലത്ത് നിന്നും വെറും 20 മിനിറ്റ് യാത്ര ചെയ്താൽ ഒരു ബൾക്ക് ബില്ലിംഗ് ഡോക്ടറുടെ സേവനം ലഭ്യമാകുന്ന സാഹചര്യമാണ് നിലവിലുള്ളത്.

2025 നവംബർ 1 മുതലുള്ള മൂന്ന് മാസത്തെ കണക്കുകൾ പരിശോധിച്ചാൽ രാജ്യത്തെ ബൾക്ക് ബില്ലിംഗ് നിരക്ക് 81.4 ശതമാനമായി വർദ്ധിച്ചതായി കാണാം. ആരോഗ്യ പരിരക്ഷ കൂടുതൽ താങ്ങാനാകുന്നതാക്കുക എന്ന ലക്ഷ്യത്തോടെ സർക്കാർ പ്രഖ്യാപിച്ച 8.5 ബില്യൺ ഡോളർ നിക്ഷേപത്തിന്റെ മികച്ച ഫലമാണ് ഇപ്പോൾ ദൃശ്യമാകുന്നത്.

2030-ഓടെ പത്തിൽ ഒമ്പത് സേവനങ്ങളും സൗജന്യമാകും 2030-ഓടെ രാജ്യത്തെ പത്തിൽ ഒമ്പത് ജിപി (GP) സേവനങ്ങളും ബൾക്ക് ബില്ലിംഗ് പരിധിയിൽ കൊണ്ടുവരിക എന്നതാണ് സർക്കാരിന്റെ അന്തിമ ലക്ഷ്യം. ഇത് രാജ്യത്തെ ജനങ്ങളുടെ ചികിത്സാ ചിലവുകളിൽ വലിയൊരു കുറവ് കൊണ്ടുവരുമെന്ന് സർക്കാർ വിലയിരുത്തുന്നു.

“കൂടുതൽ ഓസ്‌ട്രേലിയക്കാർക്ക് സൗജന്യ ചികിത്സാ സേവനം ലഭ്യമാക്കുമെന്ന ഞങ്ങളുടെ വാഗ്ദാനം പാലിക്കപ്പെട്ടു,” ആരോഗ്യമന്ത്രി മാർക്ക് ബട്‌ലർ (Mark Butler) വ്യക്തമാക്കി. “ഈ പദ്ധതി രോഗികൾക്കും ക്ലിനിക്കുകൾക്കും ഒരേപോലെ ഗുണകരമാണെന്ന് ബോധ്യമുള്ളതുകൊണ്ടാണ് കൂടുതൽ ക്ലിനിക്കുകൾ പൂർണ്ണമായും ബൾക്ക് ബില്ലിംഗിലേക്ക് മാറുന്നത്. സർക്കാരിന്റെ കൃത്യമായ ഇടപെടൽ വഴി, വെറും 20 മിനിറ്റ് ഡ്രൈവിനുള്ളിൽ ഒരു ബൾക്ക് ബില്ലിംഗ് ഡോക്ടർ എന്നത് ഇന്ന് മിക്ക ഓസ്‌ട്രേലിയക്കാർക്കും ഒരു യാഥാർത്ഥ്യമായി മാറിയിരിക്കുന്നു,” മന്ത്രി കൂട്ടിച്ചേർത്തു.

കൂടുതൽ വിവരങ്ങൾക്ക്:

ക്ലിനിക്കുകൾക്ക് പദ്ധതിയെക്കുറിച്ച് കൂടുതലറിയാനും രജിസ്റ്റർ ചെയ്യാനും: www.health.gov.au/bbpip

രോഗികൾക്ക് തങ്ങളുടെ ഏറ്റവും അടുത്തുള്ള ബൾക്ക് ബില്ലിംഗ് ക്ലിനിക്കുകൾ കണ്ടെത്താൻ: www.health.gov.au/bulkbilling

Sajin Thiruvallam
News Editor