ബെലാംബി എസ്റ്റേറ്റിൽ 2500 പുതിയ വീടുകൾ വരുന്നു; വമ്പൻ പ്രഖ്യാപനവുമായി NSW സർക്കാർ

വോളൻഗോങ്ങിന്റെ വടക്കൻ മേഖലയിലെ ഭവന പ്രതിസന്ധിക്ക് പരിഹാരമായി വമ്പൻ പ്രഖ്യാപനവുമായി NSW സർക്കാർ. കാത്തിരിപ്പുകൾക്ക് വിരാമമിട്ട് Bellambi estate renewal പദ്ധതിക്ക് ഔദ്യോഗികമായി പച്ചക്കൊടി കാട്ടിയിരിക്കുകയാണ് മിൻസ് ലേബർ സർക്കാർ (Minns Labor Government). 50-60 വർഷം പഴക്കമുള്ള വീടുകൾ പൊളിച്ചുമാറ്റി പുതിയ സാമൂഹിക, താങ്ങാനാവുന്ന, സ്വകാര്യ ഭവനങ്ങൾ നിർമ്മിക്കുന്നതാണ് ഈ ബൃഹത്തായ പദ്ധതി.

എന്താണ് ബെലാംബി എസ്റ്റേറ്റ് നവീകരണ പദ്ധതി?

26 ഹെക്ടർ വിസ്തൃതിയുള്ള ബെലാംബി എസ്റ്റേറ്റിന്റെ നവീകരണ പ്രവർത്തനങ്ങൾക്ക് Homes NSW ആണ് നേതൃത്വം നൽകുന്നത്. കാലപ്പഴക്കം ചെന്ന സാമൂഹിക ഭവനങ്ങൾക്ക് പകരമായി സുരക്ഷിതവും ആധുനികവുമായ 750 സാമൂഹിക ഭവനങ്ങളും അതോടൊപ്പം താങ്ങാനാവുന്ന മറ്റ് സ്വകാര്യ ഭവനങ്ങളും ഉൾപ്പെടെ പരമാവധി 2,500 പുതിയ വീടുകളാണ് ഇവിടെ ഉയരുക. ജൂൺ 2024-ൽ ഈ പ്രദേശം ഭവന നവീകരണത്തിന് അനുയോജ്യമാണെന്ന് സർക്കാർ കണ്ടെത്തിയിരുന്നു. തുടർന്ന് നടത്തിയ വിശദമായ പഠനങ്ങൾക്കും ജനകീയ ചർച്ചകൾക്കും ശേഷമാണ് 12 ജൂൺ 2026-ൽ പദ്ധതിയുടെ അന്തിമ തീരുമാനം പുറത്തുവന്നത്.

പദ്ധതിയുടെ പ്രധാന സവിശേഷതകൾ

നിർമ്മിക്കുന്ന വീടുകളിൽ കുറഞ്ഞത് 30 ശതമാനം സാമൂഹിക ഭവനങ്ങളായിരിക്കും (Social Housing).

ബീച്ചിനോട് ചേർന്നുള്ള ഭാഗങ്ങളിൽ പരമാവധി മൂന്നോ നാലോ നിലകളുള്ള കെട്ടിടങ്ങളും, എസ്റ്റേറ്റിന്റെ മധ്യഭാഗത്ത് ആറ് നിലകളുള്ള കെട്ടിടങ്ങളും നിർമ്മിക്കും.

പുതിയ പ്രാദേശിക വ്യാപാര കേന്ദ്രവും പൊതു പ്ലാസയും (Public Plaza) ഒരുക്കും.

നവീകരിച്ച പൊതുയിടങ്ങളും, കാൽനടക്കാർക്കും സൈക്കിൾ യാത്രക്കാർക്കുമായി മികച്ച റോഡുകളും നിർമ്മിക്കും.

ഈ പ്രദേശത്ത് കുറഞ്ഞത് 30 ശതമാനം മരങ്ങൾ വച്ചുപിടിപ്പിക്കും.

അടിസ്ഥാന സൗകര്യങ്ങൾ മെച്ചപ്പെടുത്തുമെന്ന് മന്ത്രിമാർ

കഴിഞ്ഞ പതിറ്റാണ്ടുകളിൽ ബെലാംബിയിലെ ജനങ്ങൾക്കായി ലഭിക്കുന്ന ഏറ്റവും വലിയ നിക്ഷേപമാണിതെന്ന് ഇല്ലവാറ, സൗത്ത് കോസ്റ്റ് മന്ത്രി റയാൻ പാർക്ക് (Ryan Park) പറഞ്ഞു. കാലാവസ്ഥാ വ്യതിയാനങ്ങളെ പ്രതിരോധിക്കാൻ കഴിയുന്ന, ഊർജ്ജക്ഷമതയുള്ള പുതിയ വീടുകൾ വയോധികർക്കും ദുർബലരായ വിഭാഗങ്ങൾക്കും വലിയ ആശ്വാസമാകുമെന്ന് അദ്ദേഹം കൂട്ടിച്ചേർത്തു.

പ്രാദേശിക അടിസ്ഥാന സൗകര്യങ്ങൾ മെച്ചപ്പെടുത്തുന്നതിനൊപ്പം ആയിരക്കണക്കിന് തൊഴിലവസരങ്ങൾ സൃഷ്ടിക്കാനും ഈ പദ്ധതിയിലൂടെ സാധിക്കുമെന്ന് പ്ലാനിംഗ് മന്ത്രി പോൾ സ്കള്ളി (Paul Scully) വ്യക്തമാക്കി.

സംസ്ഥാനത്തുടനീളം സുരക്ഷിതമായ ഭവനങ്ങൾ ഉറപ്പാക്കാനുള്ള 6.6 ബില്യൺ ഡോളറിന്റെ (Building Homes for NSW) പദ്ധതിയുടെ ഭാഗമായാണ് ബെലാംബിയിലെ ഈ വമ്പൻ മാറ്റമെന്ന് ഭവന നിർമ്മാണ മന്ത്രി റോസ് ജാക്സൺ (Rose Jackson) അറിയിച്ചു.