ഓസ്ട്രേലിയൻ ദേശീയ പതാകയ്ക്ക് 125 വയസ്സ്: ചരിത്രമുറങ്ങുന്ന ‘നാഷണൽ ഫ്ലാഗ് ഡേ’ വിശേഷങ്ങൾ

ഓസ്ട്രേലിയൻ ദേശീയ പതാക (Australian National Flag Day 2026) ആദ്യമായി ഔദ്യോഗികമായി ഉയർന്നതിന്റെ 125-ാം വാർഷികം രാജ്യം ഇന്ന് വിപുലമായി ആഘോഷിക്കുന്നു. 1901 സെപ്റ്റംബർ 3-ന് മെൽബണിലാണ് ഈ ചരിത്ര നിമിഷം പിറന്നത്. ജനാധിപത്യ മൂല്യങ്ങളുടെയും ഐക്യത്തിന്റെയും പ്രതീകമായ പതാകയുടെ നാൾവഴികൾ പരിശോധിക്കാം.

വാർത്ത ചുരുക്കത്തിൽ:

-32,000-ത്തിലധികം എൻട്രികളിൽ നിന്ന് ഓസ്ട്രേലിയൻ ദേശീയ പതാകയുടെ ഡിസൈൻ തിരഞ്ഞെടുത്തത് ആരാണ്?

-1901-ൽ ഉയർന്ന ആദ്യ പതാകയും ഇന്നത്തെ പതാകയും തമ്മിലുള്ള പ്രധാന വ്യത്യാസം എന്താണെന്ന് ശ്രദ്ധിച്ചിട്ടുണ്ടോ?

-ഫെഡറേഷൻ ദിനവും പതാക ദിനവും രണ്ടാണെന്ന സത്യം; ചരിത്രത്തിൽ ഈ രണ്ട് ദിവസങ്ങളുടെ പ്രാധാന്യമെന്ത്?

125 വർഷത്തെ ചരിത്രവും ആദ്യ പതാകയും

1901 ജനുവരി 1-ൽ ഓസ്ട്രേലിയൻ ഫെഡറേഷൻ (Federation) രൂപീകരിക്കപ്പെട്ടതിന് ശേഷമാണ് പതാകയ്ക്കായുള്ള അന്വേഷണം ആരംഭിച്ചത്. തുടർന്ന് അതേ വർഷം, സെപ്റ്റംബർ 3-ന് മെൽബണിലെ റോയൽ എക്സിബിഷൻ ബിൽഡിംഗിന് (Royal Exhibition Building) മുകളിൽ ആദ്യമായി ഓസ്ട്രേലിയൻ പതാക ഔദ്യോഗികമായി ഉയർന്നു.

അന്നത്തെ പ്രധാനമന്ത്രിയായിരുന്ന എഡ്മണ്ട് ബാർട്ടൺ (Edmund Barton) ആണ് ഈ വിശേഷദിവസം രാജ്യത്തെ അഭിസംബോധന ചെയ്തത്. അന്ന് ഉയർന്ന ആദ്യ പതാകയ്ക്ക് 5.5 മീറ്റർ വീതിയും 11 മീറ്റർ നീളവുമുണ്ടായിരുന്നു. പിൽക്കാലത്ത്, 1996-ൽ അന്നത്തെ ഗവർണർ ജനറൽ സർ വില്യം ഡീൻ (Sir William Deane) ആണ് സെപ്റ്റംബർ 3-നെ ഔദ്യോഗികമായി ‘നാഷണൽ ഫ്ലാഗ് ഡേ’ ആയി പ്രഖ്യാപിച്ചത്.

ആരാണ് പതാക രൂപകൽപ്പന ചെയ്തത്?

ഒരാളല്ല, അഞ്ച് പേർ ചേർന്നാണ് ഇന്നത്തെ പതാകയ്ക്ക് രൂപം നൽകിയത്. ഓസ്ട്രേലിയയിൽ നിന്നും വിദേശത്തുനിന്നുമായി ലഭിച്ച 32,000-ലധികം ഡിസൈനുകളിൽ നിന്ന് തിരഞ്ഞെടുക്കപ്പെട്ട അഞ്ച് എൻട്രികൾ ഏതാണ്ട് ഒരുപോലെയായിരുന്നു എന്നതാണ് ചരിത്രം.

ആനി ഡോറിംഗ്ടൺ, 14-കാരനായ മെൽബൺ വിദ്യാർത്ഥി ഐവർ ഇവാൻസ്, ലെസ്ലി ഹോക്കിൻസ്, എഗ്ബർട്ട് നട്ടാൽ, വില്യം സ്റ്റീവൻസ് എന്നീ അഞ്ച് പേരെയാണ് പതാകയുടെ ശിൽപികളായി ഇന്നും രാജ്യം ആദരിക്കുന്നത്. വിജയികൾക്ക് അന്ന് ലഭിച്ച സമ്മാനത്തുകയായ 200 പൗണ്ട് ഇവർ അഞ്ചുപേർക്കുമായി തുല്യമായി വീതിച്ചുനൽകുകയായിരുന്നു.

പതാകയിലെ മാറ്റങ്ങളും പുതിയ കാമ്പയിനും

1901-ൽ ഉപയോഗിച്ച ഡിസൈനിൽ നിന്ന് ചില ചെറിയ മാറ്റങ്ങൾ പിന്നീട് പതാകയിൽ വരുത്തിയിട്ടുണ്ട്. 1908-ലാണ് ടെറിട്ടറികളെ പ്രതിനിധീകരിക്കുന്നതിനായി കോമൺവെൽത്ത് സ്റ്റാറിന് (Commonwealth Star) ഏഴാമത്തെ പോയിന്റ് കൂട്ടിച്ചേർത്തത്. പിന്നീട് 1953-ലെ ഫ്ലാഗ്സ് ആക്ട് (Flags Act) പ്രകാരം ദേശീയ പതാകയ്ക്ക് പൂർണ്ണ നിയമ പരിരക്ഷ ലഭിച്ചു.

ഇന്ന് ദേശീയ പതാകയ്‌ക്കൊപ്പം ആദിവാസി വിഭാഗങ്ങളുടെ പതാകകളും (Aboriginal and Torres Strait Islander flags) തുല്യ പ്രാധാന്യത്തോടെ ഉപയോഗിക്കുന്നു. പതാക ദിനത്തോട് അനുബന്ധിച്ച്, ഡിപ്പാർട്ട്മെന്റ് ഓഫ് പ്രൈം മിനിസ്റ്റർ ആൻഡ് കാബിനറ്റ് (PMC) ഒരുക്കുന്ന ‘നാഷണൽ ഫ്ലാഗ് നെറ്റ്‌വർക്കിൽ’ ചേരാനും ഔദ്യോഗിക വിവരങ്ങൾ പങ്കുവെക്കാനും അസിസ്റ്റന്റ് മിനിസ്റ്റർ പാട്രിക് ഗോർമാൻ (Patrick Gorman) ജനങ്ങളോട് അഭ്യർത്ഥിച്ചു.

Sajin Thiruvallam
News Editor