ക്രിസ്മസ്, ബോക്സിംഗ് ദിനങ്ങളിൽ മോഷണ പരമ്പര; ചുമത്തിയത് 30-ലധികം കേസുകൾ
മെൽബൺ: ക്രിസ്മസ്, ബോക്സിംഗ് ദിനങ്ങളിലായി മെൽബണിലെ വിവിധയിടങ്ങളിൽ തുടർച്ചയായി മോഷണം നടത്തിയ 49-കാരനെ പോലീസ് അറസ്റ്റ് ചെയ്തു. ആൾട്ടോണ മെഡോസ് (Altona Meadows) സ്വദേശിയായ ഇയാൾക്കെതിരെ മോഷണം, നാശനഷ്ടം വരുത്തൽ തുടങ്ങി മുപ്പതിലധികം കുറ്റങ്ങളാണ് ചുമത്തിയിരിക്കുന്നത്.
ക്രിസ്മസ് ദിനം വൈകുന്നേരം 7 മണിയോടെ റിച്ച്മണ്ടിലെ (Richmond) ഒരു ഡിസൈൻ സ്റ്റുഡിയോയിൽ അതിക്രമിച്ചു കയറിയ ഇയാൾ, പിന്നീട് അവിടെയുള്ള ഒരു ഫർണിച്ചർ സ്ഥാപനത്തിൽ നിന്ന് വാഹനം മോഷ്ടിച്ചു.
ബോക്സിംഗ് ദിനത്തിൽ പുലർച്ചെ ഡിയർ പാർക്കിലെ (Deer Park) ഒരു റെസ്റ്റോറന്റിലും, റാവൻഹാളിലെ (Ravenhall) ഫർണിച്ചർ കടയിലും, വെസ്റ്റ്‌വുഡ് ഡ്രൈവിലുള്ള രണ്ട് റെസ്റ്റോറന്റുകളിലും ഇയാൾ മോഷണം നടത്തി.
ബോക്സിംഗ് ദിനത്തിൽ ഉച്ചയ്ക്ക് 1 മണിയോടെ സെന്റ് ആൽബൻസിലെ (St Albans) ഒരു പബ്ബിൽ വെച്ചാണ് ഇയാളെ പിടികൂടിയത്. മോഷ്ടിച്ച കാറും അതിലുണ്ടായിരുന്ന മോഷണമുതലുകളും പോലീസ് കണ്ടെടുത്തു.
പ്രതിയെ ഇന്ന് മെൽബൺ മജിസ്‌ട്രേറ്റ് കോടതിയിൽ ഹാജരാക്കും.
