ക്വീൻസ്‌ലാൻഡിൽ ശക്തമായ കാറ്റും പ്രളയ മുന്നറിയിപ്പും; ഗോൾഡ് കോസ്റ്റിൽ കനത്ത നാശനഷ്ടം
Photo credit : 7 News
ബ്രിസ്‌ബെയ്‌ൻ: ഓസ്‌ട്രേലിയയിലെ ക്വീൻസ്‌ലാൻഡിൽ ക്രിസ്മസ് ദിനത്തിലുണ്ടായ ശക്തമായ കാറ്റിലും മഴയിലും വൻ നാശനഷ്ടങ്ങൾ. ഗോൾഡ് കോസ്റ്റിലെ സൗത്ത്‌പോർട്ടിൽ (Southport) വീശിയടിച്ച കാറ്റിൽ കാരവൻ പാർക്കിന് സമീപം നിർമ്മാണത്തിലിരുന്ന കെട്ടിടത്തിലെ കൂറ്റൻ ക്രെയിൻ തകർന്നു വീണത് വലിയ ഭീതി പരത്തി. ഇതേ തുടർന്ന് പ്രദേശവാസികളെ അടിയന്തരമായി ഒഴിപ്പിച്ചു.
കാറ്റിന്റെ ശക്തിയിൽ ബാർബിക്യൂ അടുപ്പുകൾ ഉൾപ്പെടെയുള്ള ഭാരമേറിയ വസ്തുക്കൾ വായുവിലൂടെ പറന്നുപോയി സമീപത്തെ കാറുകൾക്കും കാരവാനുകൾക്കും മുകളിൽ പതിച്ചതായി ദൃക്‌സാക്ഷിയായ മാർഗോ പാർക്കർ (Margaux Parker) വെളിപ്പെടുത്തി. “ഇതുപോലൊരു അനുഭവം കഴിഞ്ഞ 22 വർഷത്തിനിടയിൽ ഉണ്ടായിട്ടില്ല,” അവർ പറഞ്ഞു.
ജാഗ്രതാ നിർദ്ദേശം: വാരാന്ത്യത്തിൽ ക്വീൻസ്‌ലാൻഡ് തീരപ്രദേശങ്ങളിൽ ശക്തമായ കാറ്റ് തുടരുമെന്ന് കാലാവസ്ഥാ നിരീക്ഷണ കേന്ദ്രം (BOM) മുന്നറിയിപ്പ് നൽകി. ടൗൺസ്‌വില്ലെ കോസ്റ്റ് മുതൽ ഗോൾഡ് കോസ്റ്റ് വരെയുള്ള മേഖലകളിൽ ജാഗ്രത പാലിക്കണം. ഡയമന്റീന (Diamantina) നദിയിൽ ജലനിരപ്പ് ഉയരുന്നതിനാൽ വടക്കു-പടിഞ്ഞാറൻ ക്വീൻസ്‌ലാൻഡിൽ പ്രളയ മുന്നറിയിപ്പും (Flood Watch) നിലവിലുണ്ട്.
