വിക്ടോറിയയിലെ ‘വർക്ക് ഫ്രം ഹോം’ നിയമത്തിൽ വൻ മാറ്റങ്ങൾ: നിങ്ങളുടെ ജോലിയെ ഇത് എങ്ങനെ ബാധിക്കും?

വിക്ടോറിയയിലെ ജീവനക്കാർക്ക് ആഴ്ചയിൽ രണ്ട് ദിവസം വീട്ടിലിരുന്ന് ജോലി ചെയ്യാൻ (Work from home) നിയമപരമായ അവകാശം നൽകുന്ന ബില്ലുമായി ബന്ധപ്പെട്ട് നിർണ്ണായക നീക്കങ്ങൾ. ജീവനക്കാർ ഏറെ പ്രതീക്ഷയോടെ കാത്തിരുന്ന ഈ നിയമത്തിൽ തൊഴിലുടമകൾക്ക് അനുകൂലമായ പല പുതിയ ഭേദഗതികളും, ഒപ്പം ഫെഡറൽ നിയമങ്ങളുമായുള്ള സാങ്കേതിക തടസ്സവാദങ്ങളും ഇപ്പോൾ ഉയർന്നുവരികയാണ്. യഥാർത്ഥത്തിൽ ഈ നിയമം എന്ന് മുതൽ പ്രാബല്യത്തിൽ വരും? ബിസിനസുകളുടെ ആശങ്കകൾ പരിഹരിക്കാൻ സർക്കാർ വരുത്തുന്ന പുതിയ മാറ്റങ്ങൾ എന്തൊക്കെയാണ്?

Click here to listen to this news…

ബിൽ പാസായിട്ടില്ല; ഇന്നത്തെ പുതിയ ഭേദഗതികൾ

2026 ജൂണിൽ അവതരിപ്പിക്കപ്പെട്ട Equal Opportunity Amendment (Work from Home) Bill 2026 ഇതുവരെയും ഒരു നിയമമായി മാറിയിട്ടില്ല എന്നതാണ് ഏറ്റവും പ്രധാനപ്പെട്ട വസ്തുത. ലെജിസ്ലേറ്റീവ് അസംബ്ലി കടന്ന ബിൽ ഇപ്പോൾ ലെജിസ്ലേറ്റീവ് കൗൺസിലിന്റെ (Legislative Council) പരിഗണനയിലാണ്.

പ്രീമിയർ Ben Carroll ഈ ആഴ്ച ബില്ലിൽ സുപ്രധാനമായ ഭേദഗതികൾ അവതരിപ്പിക്കുകയാണ്. ജീവനക്കാരുടെ അവകാശങ്ങൾ സംരക്ഷിക്കുന്നതിനൊപ്പം ബിസിനസുകൾക്കും ഇത് പ്രായോഗികമാകണം എന്നതാണ് സർക്കാരിന്റെ പുതിയ നിലപാട്. “വർക്ക് ഫ്രം ഹോം പ്രായോഗികമാണ്, അത് നിങ്ങളുടെ അവകാശമായിരിക്കും. എന്നാൽ ഈ നിയമങ്ങൾ ബിസിനസുകൾക്കും അനുയോജ്യമായിരിക്കണം, അല്ലാത്തപക്ഷം ഈ നിയമങ്ങൾ നിലനിൽക്കില്ല,” എന്ന് അദ്ദേഹം വ്യക്തമാക്കി.

തീയതികൾ: 2026-ൽ നിന്ന് 2027-ലേക്കും, ചെറുകിട ബിസിനസുകൾക്ക് 2028-ലേക്കും

നിയമം നടപ്പിലാക്കുന്ന തീയതികളിലാണ് ഏറ്റവും വലിയ മാറ്റം വന്നിരിക്കുന്നത്. ബിൽ അവതരിപ്പിച്ച സമയത്ത് 1 സെപ്റ്റംബർ 2026 മുതൽ നിയമം പ്രാബല്യത്തിൽ വരുമെന്നായിരുന്നു പ്രഖ്യാപനം. എന്നാൽ പിന്നീട് ഇത് 1 ജൂലൈ 2027 ലേക്ക് മാറ്റി.

പുതിയ ഭേദഗതികൾ പ്രകാരം, 15-ൽ താഴെ ജീവനക്കാരുള്ള ചെറുകിട ബിസിനസുകൾക്ക് (Small business) ഈ നിയമം നടപ്പിലാക്കാൻ കൂടുതൽ സാവകാശം ലഭിക്കും. ഇവർക്ക് 1 ജനുവരി 2028 മുതലാകും വർക്ക് ഫ്രം ഹോം വ്യവസ്ഥകൾ ബാധകമാവുക.

നിരസിക്കാനുള്ള പുതിയ മാനദണ്ഡങ്ങളും വ്യവസ്ഥകളും

തൊഴിലുടമകൾക്ക് ജീവനക്കാരുടെ വർക്ക് ഫ്രം ഹോം അപേക്ഷകളിന്മേൽ തീരുമാനമെടുക്കാനുള്ള സമയം 21 ദിവസത്തിൽ നിന്നും 28 ദിവസമായി ഉയർത്തി. അപേക്ഷകൾ നിരസിക്കാനുള്ള കാരണങ്ങളിലും ഇളവ് വരുത്തിയിട്ടുണ്ട്. നേരത്തെ ‘വലിയ തോതിലുള്ള ദോഷകരമായ പ്രത്യാഘാതം’ (significant adverse impact) ഉണ്ടെങ്കിൽ മാത്രം നിരസിക്കാം എന്നായിരുന്നെങ്കിൽ, ഇപ്പോൾ അത് ‘മെറ്റീരിയൽ ആയ പ്രത്യാഘാതം’ (material adverse impact) എന്ന് ലഘൂകരിച്ചിട്ടുണ്ട്.

കൂടാതെ ജീവനക്കാർക്ക് വീട്ടിലിരുന്ന് ജോലി ചെയ്യാനാവശ്യമായ കമ്പ്യൂട്ടർ, ഇന്റർനെറ്റ് ചിലവുകൾ നൽകുന്ന കാര്യത്തിലും കമ്പനികൾക്ക് അനുകൂലമായ മാറ്റങ്ങൾ വരുത്തിയിട്ടുണ്ട്. നിയമം പ്രാബല്യത്തിൽ വന്ന് മൂന്ന് വർഷത്തിന് ശേഷം നടത്താനിരുന്ന അവലോകനം 18 മാസമാക്കി ചുരുക്കുകയും ചെയ്തു.

സർവേ ഫലങ്ങളും ഭരണഘടനാ വാദവും

ഈ നിയമം കർശനമാക്കിയാൽ ബിസിനസുകൾ വിക്ടോറിയയ്ക്ക് പുറത്തേക്ക് പോകുമോ എന്ന ആശങ്കയും സജീവമാണ്. ജൂണിൽ പുറത്തുവന്ന ഒരു സർവേ പ്രകാരം, ചില കമ്പനികൾ മറ്റ് സംസ്ഥാനങ്ങളിൽ നിന്നോ രാജ്യങ്ങളിൽ നിന്നോ ജീവനക്കാരെ നിയമിക്കാൻ ആലോചിക്കുന്നതായി റിപ്പോർട്ട് ഉണ്ടായിരുന്നു.

ഇതിനിടെ, ബില്ലിന്റെ നിയമസാധുതയെ ചോദ്യം ചെയ്ത് പ്രോപ്പർട്ടി കൗൺസിൽ നിയമോപദേശം തേടിയിട്ടുണ്ട്. ഈ ബിൽ ഫെഡറൽ സർക്കാരിന്റെ Fair Work Act-ന് വിരുദ്ധമാണെന്നും ഭരണഘടനയുടെ 109-ാം വകുപ്പ് പ്രകാരം ഇത് നിലനിൽക്കില്ലെന്നുമാണ് നിയമവിദഗ്ദ്ധർ ചൂണ്ടിക്കാണിക്കുന്നത്. എന്നാൽ കോടതിയുടെ ഒരു വിധിയോ ഇടപെടലോ ഈ കാര്യത്തിൽ ഇതുവരെ ഉണ്ടായിട്ടില്ല.

നിങ്ങളുടെ അഭിപ്രായം: നിങ്ങളുടെ അഭിപ്രായത്തിൽ വർക്ക് ഫ്രം ഹോം ഒരു നിയമപരമായ അവകാശമാക്കുന്നത് ബിസിനസുകളെ ദോഷകരമായി ബാധിക്കുമോ അതോ ജീവനക്കാരുടെ ഉൽപ്പാദനക്ഷമത വർദ്ധിപ്പിക്കുമോ? നിങ്ങളുടെ പ്രതികരണങ്ങൾ പങ്കുവെക്കുക.

Sajin Thiruvallam
News Editor