ജോലി മാറുന്നവർക്ക് ആശ്വാസം; നോൺ-കോംപീറ്റ് കരാറുകൾ നിരോധിക്കാൻ സർക്കാർ ഒരുങ്ങുന്നു!

ഓസ്ട്രേലിയയിൽ ജോലി ചെയ്യുന്ന ലക്ഷക്കണക്കിന് ആളുകളെ നേരിട്ട് ബാധിക്കുന്ന ഒരു നിർണായക തൊഴിൽ നിയമ പരിഷ്കരണത്തിന് ഫെഡറൽ സർക്കാർ തുടക്കമിടുന്നു. നിലവിലെ ജോലി രാജിവെച്ചാൽ, സമാനമായ മറ്റൊരു കമ്പനിയിൽ ജോലി ചെയ്യുന്നതിന് നിശ്ചിത കാലയളവിലേക്ക് വിലക്കേർപ്പെടുത്തുന്ന വിവാദപരമായ വ്യവസ്ഥകൾ (Non-compete clauses) പൂർണ്ണമായി ഒഴിവാക്കാൻ ഒരുങ്ങുകയാണ് അധികൃതർ. എന്നാൽ പുതിയതായി ജോലി മാറാൻ ഉദ്ദേശിക്കുന്നവർ ഈ നിർദ്ദിഷ്ട മാറ്റങ്ങളെക്കുറിച്ച് എന്തൊക്കെ അറിഞ്ഞിരിക്കണം? ഈ വ്യവസ്ഥകൾ ഇപ്പോൾ തന്നെ അസാധുവായോ?

ആർക്കൊക്കെയാണ് നിരോധനത്തിന്റെ ഗുണം ലഭിക്കുക?

ഇന്ന്  2CC ബ്രേക്ക്ഫാസ്റ്റ് റേഡിയോയിൽ അവതാരകൻ സ്റ്റീഫൻ സെനാറ്റിമ്പോയുമായി (Stephen Cenatiempo) നടത്തിയ പ്രത്യേക അഭിമുഖത്തിൽ അസിസ്റ്റന്റ് മന്ത്രി ആൻഡ്രൂ ലീ (Andrew Leigh) പുതിയ മാറ്റങ്ങളെക്കുറിച്ച് വിശദീകരിച്ചു. ഫെയർ വർക്ക് കമ്മീഷൻ (Fair Work Commission) ജൂലൈ 1 മുതൽ നടപ്പിലാക്കിയ പുതിയ ഹൈ-ഇൻകം പരിധിയായ $190,100-ൽ താഴെ വാർഷിക വരുമാനമുള്ള തൊഴിലാളികൾക്കാകും ഈ നിരോധനത്തിന്റെ ഗുണം ലഭിക്കുക.

ഓസ്‌ട്രേലിയയിലെ പത്തിൽ ഒൻപത് തൊഴിലാളികളും ഈ വരുമാന പരിധിക്ക് താഴെയുള്ളവരാണെന്ന് മന്ത്രി ചൂണ്ടിക്കാട്ടി. സർക്കാരിന്റെയും e61-ന്റെയും വിലയിരുത്തലുകൾ പ്രകാരം രാജ്യത്തെ അഞ്ചിലൊരാൾക്ക് ഇത്തരം തൊഴിൽ വിലക്കുകൾ നിലവിൽ നേരിടേണ്ടി വരുന്നുണ്ട്.

പുതിയ ബില്ലിൽ നിരോധിക്കപ്പെടുന്ന കാര്യങ്ങൾ

സഹപ്രവർത്തകരെ മറ്റു കമ്പനികളിലേക്ക് മാറാൻ പ്രേരിപ്പിക്കുന്നത് തടയുന്ന നോ-പോച്ച് (No-poach) കരാറുകളും, ശമ്പളം നിശ്ചയിക്കുന്ന കാർട്ടലുകളും (Wage-fixing) പുതിയ നിയമപ്രകാരം അസാധുവാകും. എന്നാൽ ബിസിനസുകളുടെ സുരക്ഷയും പരിഗണിക്കുന്നുണ്ടെന്ന് മന്ത്രി വ്യക്തമാക്കി. ക്ലയന്റ് വിവരങ്ങൾ (Client non-solicitation), കമ്പനിയുടെ മറ്റ് ബൗദ്ധിക സ്വത്തവകാശങ്ങൾ (IP) എന്നിവ സംരക്ഷിക്കാനുള്ള അവകാശം തൊഴിലുടമകൾക്ക് തുടർന്നും ലഭിക്കും. ആറുമാസത്തോളം നീളുന്ന നോൺ-കോംപീറ്റ് വിലക്കുകൾ തൊഴിലാളികൾക്ക് മേലുള്ള അനാവശ്യ അടിച്ചേൽപ്പിക്കലാണെന്നാണ് സർക്കാർ വിലയിരുത്തുന്നത്.

ഇത് നിയമമായി മാറിയോ? തൊഴിലാളികൾ ശ്രദ്ധിക്കേണ്ടത്

അടുത്ത വർഷത്തോടെ പുതിയ മാറ്റങ്ങൾ പ്രാബല്യത്തിൽ വരുമെന്ന് മന്ത്രി റേഡിയോ അഭിമുഖത്തിൽ സൂചിപ്പിച്ചെങ്കിലും, ഇത് നിലവിൽ നിയമമായി മാറിയിട്ടില്ല എന്ന യാഥാർത്ഥ്യം തൊഴിലാളികൾ പ്രത്യേകം ഓർക്കേണ്ടതുണ്ട്. Treasury Laws Amendment (Banning Unfair Non-Competes) Bill 2026 എന്ന പേരിലുള്ള കരട് ബിൽ (Draft Bill) മാത്രമാണ് സർക്കാർ ഇപ്പോൾ ട്രഷറി വെബ്സൈറ്റിൽ പ്രസിദ്ധീകരിച്ചിട്ടുള്ളത്.

സെപ്റ്റംബർ 6-ന് ആരംഭിച്ച ഈ ഡ്രാഫ്റ്റിന്മേലുള്ള പൊതുജനങ്ങളുടെയും മറ്റ് പ്രതിനിധികളുടെയും അഭിപ്രായം ശേഖരിക്കൽ (Consultation) ഒക്ടോബർ 2 വരെ തുടരും. ഇതിനുശേഷമേ ബിൽ പാർലമെന്റിൽ അവതരിപ്പിക്കുകയുള്ളൂ. അതിനാൽ നിലവിലുള്ള തൊഴിൽ കരാറുകളിലെ വ്യവസ്ഥകൾ ഇപ്പോൾ അസാധുവായി എന്ന് കരുതി ആരും നിയമനടപടികൾക്ക് വിധേയരാകരുത്.

നിങ്ങളുടെ അഭിപ്രായം എന്താണ്? നിങ്ങളുടെ നിലവിലെ തൊഴിൽ കരാറിൽ നോൺ-കോംപീറ്റ് വ്യവസ്ഥകൾ ഉൾപ്പെടുത്തിയിട്ടുണ്ടോ? സർക്കാരിന്റെ ഈ പുതിയ നീക്കം തൊഴിലാളികളുടെ കരിയർ വളർച്ചയെ സഹായിക്കുമെന്ന് നിങ്ങൾ കരുതുന്നുണ്ടോ? നിങ്ങളുടെ പ്രതികരണങ്ങൾ പങ്കുവെക്കുക.

Sajin Thiruvallam
News Editor