സൂപ്പർ ഫണ്ടിൽ നിന്നും പണം നഷ്ടമാകുമോ? ASFA റിപ്പോർട്ട്

ഓസ്‌ട്രേലിയയിലെ പുതിയ CSLR Superannuation Levy നിയമം രാജ്യത്തെ 16 ദശലക്ഷം വരുന്ന സാധാരണക്കാരുടെ റിട്ടയർമെന്റ് സമ്പാദ്യത്തിൽ വലിയ ആശങ്കകൾ സൃഷ്ടിക്കുകയാണ്. എന്നാൽ യാതൊരുവിധ സാമ്പത്തിക തട്ടിപ്പുകൾക്കും ഇരയാകാത്ത സാധാരണക്കാരായ പ്രവാസികൾ ഉൾപ്പെടെയുള്ളവർക്ക് ഈ നിയമം മൂലം വലിയൊരു തുക നഷ്ടപ്പെടാൻ സാധ്യതയുണ്ടെന്നതാണ് ഏവരെയും ഞെട്ടിക്കുന്നത്. ഇത് മലയാളികളെ എങ്ങനെയെല്ലാം ബാധിക്കുമെന്നും ആർക്കാണ് യഥാർത്ഥത്തിൽ തിരിച്ചടിയാവുകയെന്നും പരിശോധിക്കാം.

എന്താണ് CSLR പ്രതിസന്ധി?

സാമ്പത്തിക തട്ടിപ്പുകൾക്ക് ഇരയാകുന്നവർക്ക് നഷ്ടപരിഹാരം നൽകുന്നതിനായി ഓസ്‌ട്രേലിയൻ സർക്കാർ ആരംഭിച്ച പദ്ധതിയാണ് കോമ്പൻസേഷൻ സ്കീം ഓഫ് ലാസ്റ്റ് റിസോർട്ട് (CSLR). എന്നാൽ ഈ പദ്ധതിയുടെ വലിയൊരു ഭാഗം ഫണ്ട് കണ്ടെത്തുന്നത് യാതൊരു ബന്ധവുമില്ലാത്ത സാധാരണക്കാരുടെ സൂപ്പർ ഫണ്ടുകളിൽ നിന്നാണെന്നതാണ് നിലവിലെ പ്രധാന പ്രശ്നം.

ലോകത്ത് മറ്റൊരിടത്തും ഇല്ലാത്തവിധം, തങ്ങൾക്ക് യാതൊരു പ്രയോജനവുമില്ലാത്ത ഒരു നഷ്ടപരിഹാര പദ്ധതിക്കായി സാധാരണക്കാർ പണം നൽകേണ്ടി വരുന്നുവെന്ന് ASFA (Association of Superannuation Funds of Australia) ചൂണ്ടിക്കാട്ടുന്നു. സാമ്പത്തിക ഉപദേഷ്ടാക്കളുടെ പിഴവ് മൂലം പണം നഷ്ടപ്പെടുന്നവർക്ക് നഷ്ടപരിഹാരം നൽകേണ്ടത് അതേ മേഖലയിൽ നിന്നാണെങ്കിലും, ഇതിന്റെ ഭാരം സൂപ്പർ ഫണ്ട് അംഗങ്ങളുടെ തലയിൽ അടിച്ചേൽപ്പിക്കുകയാണെന്ന് ASFA സിഇഒ മേരി ഡെലാഹണ്ടി (Mary Delahunty) ആരോപിച്ചതായി ഫിനാൻഷ്യൽ സ്റ്റാൻഡേർഡ് റിപ്പോർട്ട് ചെയ്തു.

സാധാരണക്കാർക്ക് നഷ്ടം സംഭവിക്കുന്നത് എങ്ങനെ?

2026 സാമ്പത്തിക വർഷത്തിൽ മാത്രം $47.3 മില്യൺ ഡോളറിന്റെ പ്രത്യേക ലെവിയാണ് (Special Levy) അധികൃതർ ഈടാക്കിയത്. ഇതിൽ $6.1 മില്യൺ ഡോളറും ഈടാക്കിയിരിക്കുന്നത് സുരക്ഷിതമായ പരമ്പരാഗത സൂപ്പർ ഫണ്ട് ഉപഭോക്താക്കളുടെ സമ്പാദ്യത്തിൽ നിന്നാണെന്ന് ഔദ്യോഗിക കണക്കുകൾ വ്യക്തമാക്കുന്നു.

CSLR-ൽ ക്ലെയിം ചെയ്യുന്നവരിൽ 96 ശതമാനവും വ്യക്തിപരമായ സാമ്പത്തിക ഉപദേശങ്ങളിലൂടെ പണം നഷ്ടപ്പെട്ടവരാണ്. എന്നാൽ ഈ മേഖലയുടെ സംഭാവന കേവലം 84 ശതമാനം മാത്രമാണെന്നും, ബാക്കി വരുന്ന വലിയ തുക നികത്താനാണ് സർക്കാരും അധികൃതരും സാധാരണക്കാരുടെ സൂപ്പർ ഫണ്ടുകളെ ആശ്രയിക്കുന്നതെന്നും ASFA പുറത്തിറക്കിയ പുതിയ വൈറ്റ് പേപ്പറിൽ വിശദീകരിക്കുന്നു.

പരിഹാരമെന്ത്? ASFA-യുടെ കർശന നിർദ്ദേശങ്ങൾ

CSLR-ന്റെ നിലവിലെ ഘടന തികച്ചും അശാസ്ത്രീയമാണെന്നാണ് വിദഗ്ദ്ധരുടെ വിലയിരുത്തൽ. ഉപഭോക്താക്കൾക്ക് യഥാർത്ഥത്തിൽ നഷ്ടപ്പെട്ട തുകയ്ക്ക് പകരം, സാങ്കൽപ്പികമായ ലാഭക്കണക്കുകൾ (Hypothetical losses) വെച്ച് നഷ്ടപരിഹാരം കണക്കാക്കുന്ന രീതിയാണ് ഫണ്ട് ബാധ്യത ഇത്രയധികം വർദ്ധിപ്പിക്കുന്നതെന്ന് റിപ്പോർട്ടിൽ കുറ്റപ്പെടുത്തുന്നു.

ഏത് മേഖലയിലാണോ തട്ടിപ്പ് നടക്കുന്നത്, ആ മേഖലയിൽ നിന്ന് തന്നെ നഷ്ടപരിഹാരത്തിനുള്ള ഫണ്ട് കണ്ടെത്തണമെന്നതാണ് ഇതിനുള്ള ഏക ശാശ്വത പരിഹാരം. മറ്റുള്ളവർക്ക് സംഭവിച്ച സാമ്പത്തിക തട്ടിപ്പുകളുടെ ഭാരം ഒരിക്കലും യാതൊരു തെറ്റും ചെയ്യാത്ത സാധാരണക്കാരുടെ റിട്ടയർമെന്റ് സമ്പാദ്യത്തിന് മേൽ അടിച്ചേൽപ്പിക്കാൻ പാടില്ലെന്നതാണ് ഈ റിപ്പോർട്ട് മുന്നോട്ടുവെക്കുന്ന പ്രധാന വസ്തുത.

For Community:യാതൊരു തെറ്റും ചെയ്യാത്ത സാധാരണക്കാരുടെ സൂപ്പർ ആനുവേഷൻ ഫണ്ടിൽ നിന്നും മറ്റ് സാമ്പത്തിക തട്ടിപ്പുകൾക്ക് നഷ്ടപരിഹാരം നൽകുന്ന സർക്കാരിന്റെ ഈ നടപടിയോട് നിങ്ങൾ യോജിക്കുന്നുണ്ടോ? ഇത് പ്രവാസികളുടെ സമ്പാദ്യത്തെ ബാധിക്കുമെന്ന് നിങ്ങൾ കരുതുന്നുണ്ടോ? നിങ്ങളുടെ അഭിപ്രായങ്ങൾ കമന്റ് ചെയ്യുക.

Sajin Thiruvallam
News Editor