ജപ്പാൻ പ്രധാനമന്ത്രിയെക്കുറിച്ചുള്ള പരാമർശം; ആൽബനീസിനെതിരെ പ്രതിഷേധം

Photo credit : ABC News

ജപ്പാൻ പ്രധാനമന്ത്രി നൽകിയ വിലപിടിപ്പുള്ള ഉപഹാരത്തെക്കുറിച്ച് ഓസ്‌ട്രേലിയൻ പ്രധാനമന്ത്രി ആന്റണി ആൽബനീസീ നടത്തിയ ചില പരാമർശങ്ങൾ രാജ്യത്ത് വലിയ വിവാദങ്ങൾക്ക് തിരികൊളുത്തിയിരിക്കുകയാണ്. ഒരു പോഡ്കാസ്റ്റ് അഭിമുഖത്തിനിടെ നടത്തിയ ഈ പരാമർശങ്ങൾ ഇരു രാജ്യങ്ങളും തമ്മിലുള്ള നയതന്ത്ര ബന്ധത്തെപ്പോലും ബാധിക്കുമെന്ന ആശങ്ക ശക്തമാണ്. എന്നാൽ ഈ വിവാദങ്ങൾക്ക് പിന്നിൽ ആരും പ്രതീക്ഷിക്കാത്ത മറ്റൊരു വലിയ സത്യമുണ്ട്, എന്താണ് യഥാർത്ഥത്തിൽ സംഭവിച്ചതെന്ന് പരിശോധിക്കാം.

പോഡ്കാസ്റ്റിലെ വിവാദ പരാമർശം

2026 മെയ് മാസത്തിൽ ഓസ്‌ട്രേലിയ സന്ദർശിച്ച ജപ്പാൻ പ്രധാനമന്ത്രി സനൈ തകൈച്ചി (Sanae Takaichi) പ്രധാനമന്ത്രി ആൽബനീസിന് ജപ്പാനിലെ വിലപിടിപ്പുള്ള രണ്ട് ‘ക്രൗൺ മെലണുകൾ’ (Crown melons) ഉപഹാരമായി നൽകിയിരുന്നു. അടുത്തിടെ ‘ബുഷ് ഡീപ്പ്’ (Bush Deep) എന്ന പോഡ്കാസ്റ്റിൽ പങ്കെടുക്കവെ ഈ ഉപഹാരത്തെക്കുറിച്ച് സംസാരിച്ചതാണ് വിവാദങ്ങൾക്ക് കാരണമായത്.

തനിക്ക് ലഭിച്ച ഈ സമ്മാനം വളരെ വിചിത്രമായിരുന്നു എന്ന് ആൽബനീസീ  പറഞ്ഞപ്പോൾ, പോഡ്കാസ്റ്റ് അവതാരകയായ നിക്കി ഓസ്ബോൺ ഇത് പ്രമുഖ ഹോളിവുഡ് നടിയുമായി താരതമ്യം ചെയ്തതാണ് പ്രശ്നങ്ങൾക്ക് തുടക്കമിട്ടത്. അവതാരകയുടെ ഈ ലൈംഗികച്ചുവയുള്ള പരാമർശങ്ങളെ പ്രധാനമന്ത്രി തിരുത്തിയില്ലെന്നും, കൈകൾ കൊണ്ട് ചില ആംഗ്യങ്ങൾ കാണിച്ചുവെന്നുമാണ് ഇപ്പോൾ ഉയരുന്ന പ്രധാന ആരോപണം.

ജപ്പാന്റെ പ്രതികരണവും പുതിയ വെളിപ്പെടുത്തലുകളും

പ്രധാനമന്ത്രിയുടെ ഈ പ്രവൃത്തി ജപ്പാനോടുള്ള അനാദരവാണെന്നും ഇത് ഏറെ അപമാനകരമാണെന്നും ഓസ്‌ട്രേലിയയിലെ മുൻ ജാപ്പനീസ് അംബാസഡർ ഷിംഗോ യമഗാമി (Shingo Yamagami) പരസ്യമായി വിമർശിച്ചു. പ്രതിപക്ഷ നേതാവായ ആംഗസ് ടെയ്‌ലർ (Angus Taylor) ഉൾപ്പെടെയുള്ളവർ പ്രധാനമന്ത്രി പരസ്യമായി മാപ്പുപറയണമെന്ന് ആവശ്യപ്പെട്ട് രംഗത്തെത്തിയിട്ടുണ്ട്.

എന്നാൽ ഈ കടുത്ത വിവാദങ്ങൾക്കിടയിലാണ് തികച്ചും അപ്രതീക്ഷിതമായ മറ്റൊരു വിവരം സെവൻ ന്യൂസ് (7NEWS) റിപ്പോർട്ട് ചെയ്തത്. ആൽബനീസിന് മോശമായ ഉദ്ദേശ്യങ്ങളൊന്നും ഉണ്ടായിരുന്നില്ലെന്നും, ഈ സംഭവത്തെ മാധ്യമങ്ങൾ വളച്ചൊടിച്ചതാണെന്നും വ്യക്തമാക്കി ജപ്പാൻ പ്രധാനമന്ത്രിയും എംബസിയും ഔദ്യോഗികമായി കത്തയച്ചുവെന്നാണ് സെവൻ ന്യൂസ് വെളിപ്പെടുത്തിയിരിക്കുന്നത്. ഈ വെളിപ്പെടുത്തലുകൾ വരും ദിവസങ്ങളിൽ ഓസ്‌ട്രേലിയൻ രാഷ്ട്രീയത്തിൽ കൂടുതൽ ചർച്ചകൾക്ക് വഴിയൊരുക്കുമെന്ന കാര്യത്തിൽ സംശയമില്ല.

പ്രധാനമന്ത്രി ആൽബനീസ് നേരിടുന്ന ഈ പുതിയ വിവാദത്തെക്കുറിച്ച് നിങ്ങൾ എന്താണ് ചിന്തിക്കുന്നത്? നിങ്ങളുടെ അഭിപ്രായങ്ങൾ താഴെ കമന്റ് ബോക്സിൽ രേഖപ്പെടുത്തുക.

Sajin Thiruvallam
News Editor