ജൂലൈ 1 മുതൽ വൻ മാറ്റങ്ങൾ; സംസ്ഥാനങ്ങളിലെ പുതിയ നിയമങ്ങളും ഇളവുകളും

ഓസ്‌ട്രേലിയയിൽ 2026 ജൂലൈ 1 മുതൽ പുതിയ സാമ്പത്തിക വർഷം ആരംഭിക്കുകയാണ്. ഇതിനോടനുബന്ധിച്ച് രാജ്യത്തെ വിവിധ സംസ്ഥാനങ്ങളിലും ടെറിട്ടറികളിലും നിർണ്ണായകമായ നിരവധി നിയമ മാറ്റങ്ങളും ഇളവുകളുമാണ് (Australia new laws July 2026) പ്രാബല്യത്തിൽ വരുന്നത്. പുതിയ വാടക നിയമങ്ങൾ, വർദ്ധിപ്പിച്ച സബ്‌സിഡികൾ, പുതിയ ട്രാഫിക് പരിഷ്കാരങ്ങൾ എന്നിവ ഇതിൽ ഉൾപ്പെടുന്നു. സാമ്പത്തിക ബാധ്യതകളെ നേരിട്ട് സ്വാധീനിക്കുന്ന, ഓസ്‌ട്രേലിയയിലെ ഓരോ സംസ്ഥാനത്തും വരാനിരിക്കുന്ന പ്രധാന മാറ്റങ്ങൾ എന്തെല്ലാമാണെന്ന് വിശദമായി പരിശോധിക്കാം.

ഓസ്‌ട്രേലിയയിലെ പുതിയ നിയമങ്ങൾ (Australia New Laws July 2026)

ന്യൂ സൗത്ത് വെയിൽസ് (NSW) & വിക്ടോറിയ (VIC)

ന്യൂ സൗത്ത് വെയിൽസിൽ (NSW) വാഹനയാത്രക്കാർക്ക് ആശ്വാസമായി പ്രതിവാര ടോൾ പരിധി $60 ൽ നിന്ന് $50 ആയി കുറച്ചു. കൂടാതെ, ഓപാൽ (Opal) പബ്ലിക് ട്രാൻസ്‌പോർട്ട് നിരക്കുകൾ അടുത്ത 12 മാസത്തേക്ക് വർദ്ധിപ്പിക്കില്ല. ഇരുചക്ര വാഹനങ്ങളിലെ ലേണേഴ്‌സ് ലൈസൻസുകാർ ഹൈ-വിസ് ജാക്കറ്റുകളും സുരക്ഷാ ഗ്ലൗസുകളും ധരിക്കണമെന്നത് നിയമപരമായി നിർബന്ധമാക്കിയിട്ടുണ്ട്.

വിക്ടോറിയയിലാകട്ടെ (VIC) പുതിയ പോർട്ടബിൾ റെൻ്റൽ ബോണ്ട് സ്കീം വാടകക്കാർക്ക് വലിയ ആശ്വാസമാകും. പുതിയ വീട്ടിലേക്ക് മാറുമ്പോൾ നിലവിലെ വാടക ബോണ്ട് തുക പുതിയ പ്രോപ്പർട്ടിയിലേക്ക് നേരിട്ട് ട്രാൻസ്ഫർ ചെയ്യാൻ ഇതിലൂടെ സാധിക്കും. പുതിയ തുക മുൻകൂർ അടയ്‌ക്കേണ്ടതില്ല എന്നതാണ് പ്രധാന സവിശേഷത. കൂടാതെ, നാല് വർഷത്തിലധികമായി ഒരേ എനർജി പ്ലാനിൽ തുടരുന്ന ഉപഭോക്താക്കളിൽ നിന്ന് ന്യായമായ നിരക്കാണോ ഈടാക്കുന്നതെന്ന് പരിശോധിക്കാൻ കമ്പനികൾക്ക് നിയമപരമായ ബാധ്യതയുണ്ട്.

ക്വീൻസ്‌ലാൻഡ് (QLD) & സൗത്ത് ഓസ്‌ട്രേലിയ (SA)

ക്വീൻസ്‌ലാൻഡിൽ (QLD) ഇ-ബൈക്കുകൾ, ഇ-സ്കൂട്ടറുകൾ എന്നിവ ഓടിക്കുന്നവർക്കായി കർശനമായ പുതിയ ഇ-മൊബിലിറ്റി നിയമങ്ങൾ നിലവിൽ വന്നു. കുട്ടികളുമായി ബന്ധപ്പെട്ട് പ്രവർത്തിക്കുന്ന എല്ലാ സ്ഥാപനങ്ങൾക്കും പുതിയ സുരക്ഷാ റിപ്പോർട്ടിംഗ് മാനദണ്ഡങ്ങൾ ബാധകമാക്കിയിട്ടുണ്ട്.

സൗത്ത് ഓസ്‌ട്രേലിയയിൽ (SA) ജോലി സമയത്തിന്റെ പരിധിയില്ലാതെ തന്നെ, 60 വയസ്സിനു മുകളിലുള്ള എല്ലാ സ്ഥിരതാമസക്കാർക്കും സീനിയേഴ്സ് കാർഡിന്റെ (Seniors Card) ആനുകൂല്യം ലഭ്യമാകും. ഇതിലൂടെ ഇവർക്ക് മുഴുവൻ സമയവും സൗജന്യ പൊതുഗതാഗത യാത്രാസൗകര്യവും വിവിധ ഷോപ്പുകളിൽ ഡിസ്കൗണ്ടുകളും ലഭിക്കും.

മറ്റ് സംസ്ഥാനങ്ങളിലെ പ്രധാന മാറ്റങ്ങൾ

ACT: ആദ്യമായി വീട് വാങ്ങുന്നവർക്ക് പൂർണ്ണമായും സ്റ്റാമ്പ് ഡ്യൂട്ടി ഒഴിവാക്കി. സസ്‌റ്റൈനബിൾ ഹൗസ്‌ഹോൾഡ് സ്‌കീമിന് കീഴിലുള്ള പലിശ രഹിത വായ്പാ പരിധി $20,000 ആയി ഉയർത്തി.

WA: ജീവിതച്ചെലവ് പ്രതിസന്ധി കുറയ്ക്കുന്നതിന്റെ ഭാഗമായി പുതിയ ഇന്ധന സബ്‌സിഡി പദ്ധതികളും കണ്ടെയ്നർ ഡെപ്പോസിറ്റ് സ്‌കീമും വിപുലീകരിക്കുന്നു.

TAS: പുതിയ വീട് നിർമ്മിക്കുന്നവർക്കുള്ള ഫസ്റ്റ് ഹോം ഓണർ ഗ്രാന്റ് $30,000 ൽ നിന്ന് $20,000 ആയി കുറച്ചു. പബ്ലിക് ട്രാൻസ്‌പോർട്ട് സൗജന്യമാക്കിയ പദ്ധതി 2027 ജൂലൈ വരെ നീട്ടി.

NT: പുതിയ ഇലക്ട്രിക്കൽ സേഫ്റ്റി നിയമങ്ങൾ നിലവിൽ വരുന്നു. റെസിഡൻഷ്യൽ പ്രോപ്പർട്ടികളിൽ പുതിയ സേഫ്റ്റി സ്വിച്ചുകൾ അപ്‌ഗ്രേഡ് ചെയ്യേണ്ടത് അനിവാര്യമാണ്.

Sajin Thiruvallam
News Editor