ഓസ്‌ട്രേലിയയിൽ ഇന്ധനനികുതി ഇളവ് വെട്ടിക്കുറച്ചു; ജൂലൈ മുതൽ പെട്രോൾ, ഡീസൽ വില വർധിക്കും

ഓസ്‌ട്രേലിയൻ ജനതയ്ക്ക് ഇരുട്ടടിയായി, ജൂലൈ ഒന്നു മുതൽ രാജ്യത്ത് പെട്രോൾ, ഡീസൽ വില വർധിക്കാൻ സാധ്യത. വർധിച്ചുവരുന്ന ജീവിതച്ചെലവുകൾക്കിടയിൽ ജനങ്ങൾക്ക് നൽകിയിരുന്ന Fuel excise cut Australia (ഇന്ധനനികുതി ഇളവ്) വെട്ടിക്കുറയ്ക്കാൻ ആന്റണി ആൽബനീസീ  (Anthony Albanese) സർക്കാർ തീരുമാനിച്ചു. ഇതോടെ ഒറ്റയടിക്ക് വില കുതിച്ചുയർന്നില്ലെങ്കിലും, നിലവിലെ ആശ്വാസം പകുതിയായി കുറയും. പുതിയ മാറ്റങ്ങൾ സാധാരണക്കാരെയും ചരക്കുകടത്തു മേഖലയെയും എങ്ങനെ ബാധിക്കുമെന്ന് പരിശോധിക്കാം.

ജൂലൈ മുതൽ ഇളവുകളിൽ മാറ്റം

മധ്യപൂർവേഷ്യയിലെ സംഘർഷങ്ങളെത്തുടർന്ന് കുതിച്ചുയർന്ന ഇന്ധനവിലയിൽ നിന്ന് ജനങ്ങളെ രക്ഷിക്കാൻ ഏപ്രിൽ മാസത്തിലാണ് ഫെഡറൽ സർക്കാർ ഇന്ധന എക്സൈസ് തീരുവയിൽ വൻ ഇളവ് പ്രഖ്യാപിച്ചത്. ലിറ്ററിന് ഏകദേശം 32 സെന്റിന്റെ കുറവാണ് അന്ന് ലഭിച്ചത്. എന്നാൽ, ജൂൺ 20-ന് പ്രധാനമന്ത്രി ആന്റണി ആൽബനീസീ  നടത്തിയ പ്രഖ്യാപനപ്രകാരം, ഈ ഇളവ് ജൂലൈ 1 മുതൽ 16 സെന്റായി ചുരുങ്ങും. ഓഗസ്റ്റ് ആദ്യവാരം വരെയായിരിക്കും ഈ പുതിയ ക്രമീകരണം നിലനിൽക്കുക.

ഇളവുകൾ ഒറ്റയടിക്ക് പിൻവലിച്ചാൽ വിപണിയിലുണ്ടാകാൻ സാധ്യതയുള്ള പരിഭ്രാന്തിയും വിലക്കയറ്റവും ഒഴിവാക്കാനാണ് ഇത്തരമൊരു ‘സ്റ്റെപ്പ് ഡൗൺ’ (Step down) രീതി സർക്കാർ സ്വീകരിച്ചിരിക്കുന്നത്. ഇതിലൂടെ ഫെഡറൽ ബജറ്റിന് ഏകദേശം 400 ദശലക്ഷം ഡോളറിന്റെ അധിക ബാധ്യതയാണ് പ്രതീക്ഷിക്കുന്നത്.

ആശ്വാസമായത് എക്സൈസ് ഇളവുകൾ

2026-ന്റെ തുടക്കത്തിൽ, ഇറാൻ ഉൾപ്പെടുന്ന മധ്യപൂർവേഷ്യൻ പ്രതിസന്ധികളെ തുടർന്ന് ഓസ്‌ട്രേലിയൻ നഗരങ്ങളിൽ അൺലെഡഡ് പെട്രോൾ വില ലിറ്ററിന് $2.50-ന് മുകളിലെത്തിയിരുന്നു. ഈ സാഹചര്യത്തിലാണ് ദേശീയ ക്യാബിനറ്റിന്റെ പിന്തുണയോടെ സർക്കാർ ഇന്ധന നികുതി താൽക്കാലികമായി വെട്ടിക്കുറച്ചത്.

കൂടാതെ, സംസ്ഥാന സർക്കാരുകൾ ഇന്ധനത്തിൽ നിന്നുള്ള അധിക ജിഎസ്ടി വരുമാനം വേണ്ടെന്നുവെക്കുകയും, വലിയ വാഹനങ്ങൾക്കുള്ള റോഡ് യൂസർ ചാർജ് (Heavy Vehicle Road User Charge) താൽക്കാലികമായി ഒഴിവാക്കുകയും ചെയ്തിരുന്നു. ഈ നടപടികളിലൂടെ ഒരു ശരാശരി 65 ലിറ്റർ ടാങ്ക് നിറയ്ക്കുമ്പോൾ ഉപഭോക്താക്കൾക്ക് ഏകദേശം $19 മുതൽ $23 വരെ ലാഭിക്കാൻ കഴിഞ്ഞിരുന്നു.

ഇപ്പോഴത്തെ ഇന്ധനവിലയും വരാനിരിക്കുന്ന മാറ്റവും

ആഗോള തലത്തിൽ അമേരിക്കയും ഇറാനും തമ്മിലുള്ള സമാധാന ചർച്ചകൾ പുരോഗമിക്കുന്നതിന്റെ പശ്ചാത്തലത്തിൽ, നിലവിൽ അന്താരാഷ്ട്ര വിപണിയിൽ എണ്ണവില കുറഞ്ഞിട്ടുണ്ട്. ജൂൺ പകുതിയോടെ, ഓസ്‌ട്രേലിയയിലെ അൺലെഡഡ് 91 പെട്രോളിന്റെ ദേശീയ ശരാശരി വില 170–173 സെന്റായും, ഡീസൽ വില 207–210 സെന്റായും കുറഞ്ഞിട്ടുണ്ട്.

എങ്കിലും, ജൂലൈ 1 മുതൽ എക്സൈസ് ഇളവ് 16 സെന്റായി ചുരുങ്ങുമ്പോൾ ഉപഭോക്താക്കൾ കൂടുതൽ പണം നൽകേണ്ടി വരും. പ്രതിപക്ഷവും ഈ തീരുമാനത്തെ ജാഗ്രതയോടെയാണ് കാണുന്നത്. നികുതി ഇളവ് അനിശ്ചിതമായി നീട്ടിക്കൊണ്ടുപോകുന്നത് സാമ്പത്തികമായി പ്രായോഗികമല്ലെങ്കിലും, ഈ ഘട്ടംഘട്ടമായുള്ള പിൻവലിക്കൽ ജനങ്ങൾക്ക് ചെറിയൊരു ആശ്വാസം നൽകുമെന്ന് വിലയിരുത്തപ്പെടുന്നു. വിപണിയിൽ ആവശ്യത്തിന് ഇന്ധനമുണ്ടെന്നും, വില കൂടുമെന്ന ഭയത്താൽ ജനങ്ങൾ പരിഭ്രാന്തരായി ഇന്ധനം വാങ്ങി സംഭരിക്കേണ്ടതില്ലെന്നും സർക്കാർ വ്യക്തമാക്കിയിട്ടുണ്ട്.

Sajin Thiruvallam
News Editor