ഇമിഗ്രേഷൻ വെട്ടിക്കുറയ്ക്കും, ‘ഏക സംസ്കാരം’ നടപ്പാക്കും: നാഷണൽ പ്രസ്സ് ക്ലബ്ബിൽ പോളിൻ ഹാൻസൻ്റെ ആദ്യ പ്രസംഗം

ഓസ്‌ട്രേലിയൻ രാഷ്ട്രീയത്തിൽ മൂന്ന് പതിറ്റാണ്ടിലേറെയായി നിറഞ്ഞുനിൽക്കുന്ന വൺ നേഷൻ (One Nation) പാർട്ടി നേതാവ് പോളിൻ ഹാൻസൻ്റെ നാഷണൽ പ്രസ്സ് ക്ലബ്ബിലെ ആദ്യ പ്രസംഗം (Pauline Hanson Press Club Speech) വലിയ ചർച്ചയാകുന്നു. ഇന്ന് കാൻബെറയിൽ നടന്ന പ്രസംഗത്തിൽ, കുടിയേറ്റം, ഭവന പ്രതിസന്ധി, ജീവിതച്ചെലവ് എന്നീ വിഷയങ്ങളിൽ പാർട്ടിയുടെ ശക്തമായ നിലപാടുകളാണ് അവർ വ്യക്തമാക്കിയത്. വരാനിരിക്കുന്ന തിരഞ്ഞെടുപ്പിൽ വലിയ മുന്നേറ്റം ലക്ഷ്യമിടുന്ന പാർട്ടിയുടെ ഈ പുതിയ നയപ്രഖ്യാപനങ്ങൾ ഓസ്‌ട്രേലിയയിലെ മലയാളി സമൂഹമുൾപ്പെടെയുള്ള കുടിയേറ്റക്കാരെ സാരമായി ബാധിച്ചേക്കാം.

കുടിയേറ്റം വെട്ടിക്കുറയ്ക്കും, ഓസ്‌ട്രേലിയയിൽ ‘ഏക സംസ്കാരം’

ഓസ്‌ട്രേലിയ നേരിടുന്ന വലിയ ഭവന പ്രതിസന്ധിക്കും അടിസ്ഥാന സൗകര്യങ്ങളുടെ കുറവിനും പ്രധാന കാരണം വർദ്ധിച്ചുവരുന്ന കുടിയേറ്റമാണെന്ന് പോളിൻ ഹാൻസൻ കുറ്റപ്പെടുത്തി. ആൽബനീസീ  സർക്കാരിൻ്റെ ആദ്യ മൂന്ന് വർഷങ്ങളിൽ മാത്രം 1.27 ദശലക്ഷം ആളുകളാണ് പുതിയതായി രാജ്യത്തെത്തിയത്. ഈ നിരക്ക് അടിയന്തരമായി വെട്ടിക്കുറയ്ക്കണം.  ഓസ്‌ട്രേലിയ ഒരു ബഹുസ്വര സമൂഹമാണെങ്കിലും, ഇനിമുതൽ ഇംഗ്ലീഷ് ഭാഷയിലൂന്നിയുള്ള ഒരു ‘ഏക സംസ്കാരം’ (Monoculture) രാജ്യത്ത് നടപ്പിലാക്കണമെന്നും അവർ ആവശ്യപ്പെട്ടു. കുടിയേറ്റക്കാരുടെ എണ്ണം കുറയ്ക്കുന്നതിനൊപ്പം, ഓസ്‌ട്രേലിയൻ മൂല്യങ്ങൾക്ക് മുൻഗണന നൽകുമെന്നും അവർ വ്യക്തമാക്കി.

ജീവിതച്ചെലവും പുതിയ ഊർജ്ജ നയങ്ങളും

കാലാവസ്ഥാ വ്യതിയാനത്തെ ഒരു ‘തട്ടിപ്പ്’ എന്ന് വിശേഷിപ്പിച്ച അവർ, സർക്കാരിൻ്റെ നെറ്റ്-സീറോ നയങ്ങളാണ് നിലവിലെ ഉയർന്ന ഊർജ്ജ വിലയ്ക്കും പണപ്പെരുപ്പത്തിനും കാരണമെന്ന് ആരോപിച്ചു. പുനരുപയോഗ ഊർജ്ജ സ്രോതസ്സുകൾക്കുള്ള സബ്‌സിഡികൾ നിർത്തലാക്കുമെന്നും, കൽക്കരി, വാതകം എന്നിവ നിലനിർത്തിക്കൊണ്ട് ഓസ്‌ട്രേലിയയിൽ ആണവോർജ്ജം (Nuclear Energy) കൊണ്ടുവരുമെന്നും ഹാൻസൻ പ്രഖ്യാപിച്ചു. പാർട്ടിയുടെ സാമ്പത്തിക നയങ്ങൾ കൂടുതൽ വ്യക്തമാക്കുന്നതിനായി മുൻ ഉപപ്രധാനമന്ത്രി ബർണബി ജോയ്‌സിനെ (Barnaby Joyce) വൺ നേഷൻ്റെ ട്രഷറി വക്താവായി തീരുമാനിച്ച കാര്യവും അവർ ചൂണ്ടിക്കാട്ടി. സ്കൂളുകളിലും സ്പോർട്സിലുമുള്ള ട്രാൻസ്ജെൻഡർ ആശയങ്ങളെയും അവർ ശക്തിയുക്തം എതിർത്തു.

മാധ്യമങ്ങൾക്കെതിരെ വിമർശനം; സദസ്സിൽ നാടകീയ രംഗങ്ങൾ

പോളിൻ ഹാൻസൻ്റെ പുതിയ മാധ്യമ നയങ്ങൾ വലിയ ചർച്ചകൾക്കാണ് വഴിവെച്ചിരിക്കുന്നത്. തങ്ങൾ അധികാരത്തിൽ വന്നാൽ SBS പൂർണ്ണമായും നിർത്തലാക്കും എന്നതാണ് ഇതിലെ ഏറ്റവും പ്രധാനപ്പെട്ട പ്രഖ്യാപനം. ഇൻ്റർനെറ്റ് യുഗത്തിൽ SBS പോലുള്ള ഒരു മാധ്യമത്തിൻ്റെ ആവശ്യമില്ലെന്നും, ഇതിനായി ചിലവാക്കുന്ന തുക മറ്റ് ആവശ്യങ്ങൾക്ക് ഉപയോഗിക്കുമെന്നുമാണ് അവർ വ്യക്തമാക്കിയത്.

അതുപോലെ, ABC (Australian Broadcasting Corporation) പൂർണ്ണമായും ഒരു സബ്‌സ്‌ക്രിപ്‌ഷൻ സർവീസ് ആക്കി മാറ്റുമെന്നും അവർ പറഞ്ഞു. മെട്രോ നഗരങ്ങളിൽ ഇതിനകം തന്നെ നിരവധി മാധ്യമങ്ങൾ ഉള്ളതിനാൽ നികുതിദായകരുടെ പണം ഇതിനായി ചിലവാക്കേണ്ടതില്ല. എന്നാൽ, വാണിജ്യ മാധ്യമങ്ങൾ കുറവായ ഗ്രാമപ്രദേശങ്ങളിൽ ABC-യുടെ സേവനം തുടരുമെന്നും ഇതിന് സർക്കാർ ഫണ്ട് നൽകുമെന്നും അവർ വ്യക്തമാക്കി.

മാധ്യമപ്രവർത്തകരുമായി വാഗ്വാദം

പ്രസംഗത്തിനിടെ മാധ്യമപ്രവർത്തകരുമായി രൂക്ഷമായ വാഗ്വാദങ്ങൾക്കും പ്രസ് ക്ലബ്ബ് സാക്ഷ്യം വഹിച്ചു. The Guardian, ABC എന്നീ മാധ്യമങ്ങൾക്ക് തൻ്റെ വാർത്താസമ്മേളനങ്ങളിൽ ഇതിനകം തന്നെ വിലക്ക് ഏർപ്പെടുത്തിയിട്ടുണ്ടെന്ന് അവർ ആവർത്തിച്ചു. ഗാർഡിയൻ മാധ്യമപ്രവർത്തകയായ സാറ മാർട്ടിനെ (Sarah Martin) “മോശം മാധ്യമപ്രവർത്തക” എന്ന് വിളിച്ച അവർ, തൻ്റെ മകളുടെ തൊഴിലുമായി ബന്ധപ്പെട്ട ചോദ്യങ്ങൾക്ക് മറുപടി നൽകാൻ തയ്യാറായില്ല. വൺ നേഷൻ പാർട്ടി അധികാരത്തിൽ വന്നാൽ ഒരു SBS റിപ്പോർട്ടർക്ക് ജോലി നഷ്ടപ്പെടുമെന്നും അവർ വേദിയിൽ വച്ച് നേരിട്ട് പറഞ്ഞു. മാധ്യമങ്ങൾ വൺ നേഷൻ പാർട്ടിയെ മനപ്പൂർവ്വം ഇകഴ്ത്തി കാണിക്കാൻ ശ്രമിക്കുകയാണെന്നും അവർ കുറ്റപ്പെടുത്തി.

പ്രസംഗത്തിനിടെ പ്രതിഷേധം

ജീവിതച്ചെലവുകളെക്കുറിച്ച് അവർ സംസാരിക്കുന്നതിനിടെ വേദിയിൽ ഒരു വലിയ പ്രതിഷേധ ബാനർ ഉയർന്നു. “തൊഴിലാളികളുടെ ശമ്പള വർദ്ധനവിനെ ഞാൻ എതിർത്തു, എന്നാൽ എനിക്ക് 100,000 ഡോളറിൻ്റെ ശമ്പള വർദ്ധനവ് ഞാൻ വാങ്ങി” എന്നായിരുന്നു ബാനറിലെ വാചകങ്ങൾ. ഈ സംഭവത്തിൻ്റെ ഉത്തരവാദിത്തം GetUp! ഏറ്റെടുത്തിട്ടുണ്ട്. ബാനർ പെട്ടെന്ന് തന്നെ നീക്കം ചെയ്തെങ്കിലും, ഹാൻസൻ ഇതൊന്നും വകവയ്ക്കാതെ തൻ്റെ പ്രസംഗം തുടർന്നു.

Sajin Thiruvallam
News Editor