ആദ്യമായി വീട് വാങ്ങുന്നവർക്ക് വൻ ആനുകൂല്യങ്ങൾ

admin മെയ്‌ 12, 2026

ആദ്യമായി വീട് വാങ്ങുന്നവർക്ക് (First home buyers) അനുകൂലമായി നികുതി വ്യവസ്ഥകൾ പരിഷ്കരിക്കുന്നതിനൊപ്പം, കേവലം 5% ഡെപ്പോസിറ്റ് നൽകി വീട് സ്വന്തമാക്കാനുള്ള അവസരവും സർക്കാർ വിപുലീകരിച്ചു.

ഭവന മേഖലയിലെ നിക്ഷേപം പുതിയ വീടുകളുടെ നിർമ്മാണത്തിലേക്ക് തിരിച്ചുവിടുന്നതിനായി സുപ്രധാനമായ നികുതി പരിഷ്കാരങ്ങളാണ് സർക്കാർ കൊണ്ടുവന്നിരിക്കുന്നത്:

നെഗറ്റീവ് ഗിയറിംഗ് (Negative Gearing): 2027 ജൂലൈ 1 മുതൽ റെസിഡൻഷ്യൽ പ്രോപ്പർട്ടികൾക്കുള്ള നെഗറ്റീവ് ഗിയറിംഗ് പുതിയ വീടുകൾക്ക് (New builds) മാത്രമായി പരിമിതപ്പെടുത്തും. എന്നാൽ, 2026 മെയ് 12 രാത്രി 7:30-ന് മുമ്പുള്ള നിലവിലെ നിക്ഷേപങ്ങളെ ഇത് യാതൊരു തരത്തിലും ബാധിക്കില്ല.

ക്യാപിറ്റൽ ഗെയിൻസ് ടാക്സ് (CGT): നിലവിലുള്ള 50% CGT ഇളവ് ഒഴിവാക്കി, 2027 ജൂലൈ 1 മുതൽ ഇത് പണപ്പെരുപ്പവുമായി ബന്ധിപ്പിക്കും (Inflation-adjusted indexation). പുതിയ വീടുകൾ ഒഴികെയുള്ള ആസ്തികൾക്ക് മിനിമം 30% നികുതി നിരക്ക് ഏർപ്പെടുത്താനും തീരുമാനിച്ചിട്ടുണ്ട്. പുതിയ വീടുകൾ വാങ്ങുന്ന നിക്ഷേപകർക്ക് ഈ മാറ്റങ്ങൾ ബാധകമല്ല.

നിർമ്മാണം വേഗത്തിലാക്കാൻ 2 ബില്യൺ ഡോളർ ഫണ്ട്

ഭവന ക്ഷാമം പരിഹരിക്കുന്നതിനായി നിർമ്മാണ മേഖലയെ ഉത്തേജിപ്പിക്കുകയാണ് സർക്കാരിന്റെ മറ്റൊരു പ്രധാന ലക്ഷ്യം. ഇതിനായി റോഡ്, വെള്ളം, വൈദ്യുതി തുടങ്ങിയ അടിസ്ഥാന സൗകര്യങ്ങൾ വികസിപ്പിക്കാൻ 2 ബില്യൺ ഡോളർ വകയിരുത്തി ‘ലോക്കൽ ഇൻഫ്രാസ്ട്രക്ചർ ഫണ്ട്’ രൂപീകരിക്കും. ഇത് അടുത്ത 10 വർഷത്തിനുള്ളിൽ 65,000 പുതിയ വീടുകളുടെ നിർമ്മാണത്തിന് സഹായിക്കും.

കൂടാതെ, കുടിയേറ്റക്കാരായ നൈപുണ്യമുള്ള തൊഴിലാളികളുടെ (സ്കിൽഡ് മൈഗ്രന്റ്സ്/Tradies) സ്കിൽ അസസ്മെന്റ് വേഗത്തിലാക്കാൻ 85.2 ദശലക്ഷം ഡോളർ അനുവദിച്ചു. ഇത് തൊഴിലാളികൾക്ക് ആറുമാസം മുമ്പ് തന്നെ ജോലിയിൽ പ്രവേശിക്കാൻ വഴിയൊരുക്കും. വീട് നിർമ്മാണത്തിനുള്ള ഗവൺമെന്റ് പെർമിറ്റുകളും പാരിസ്ഥിതിക അനുമതികളും അതിവേഗത്തിലാക്കാനും നടപടികൾ സ്വീകരിക്കും.

വിദേശികൾക്ക് വിലക്കും വാടകക്കാർക്കുള്ള ഇളവുകളും

നിലവിലുള്ള (Existing/Established) വീടുകൾ വിദേശ നിക്ഷേപകർ വാങ്ങുന്നതിനുള്ള വിലക്ക് 2029 പകുതി വരെ നീട്ടിയത് സാധാരണക്കാരായ ഓസ്ട്രേലിയക്കാർക്ക് വലിയ ആശ്വാസമാണ്.

വാടകക്കാർക്ക് മികച്ച പരിരക്ഷ ഉറപ്പാക്കാൻ സംസ്ഥാന സർക്കാരുകളുമായി ചേർന്ന് സർക്കാർ പ്രവർത്തിക്കും. കാരണമില്ലാതെയുള്ള ഒഴിപ്പിക്കലുകൾ (No grounds evictions) തടയുന്നതിനൊപ്പം, വാടക വർദ്ധനവ് വർഷത്തിൽ ഒരിക്കൽ മാത്രമായി പരിമിതപ്പെടുത്തിയിട്ടുണ്ട്. കൂടാതെ, സാമ്പത്തികമായി പിന്നോക്കം നിൽക്കുന്നവർക്കുള്ള കോമൺവെൽത്ത് റെന്റ് അസിസ്റ്റൻസ് (CRA) 50 ശതമാനത്തിലധികം ഉയർത്തി. ഭവനരഹിതരാകാൻ സാധ്യതയുള്ള യുവാക്കൾക്കായി 59.4 ദശലക്ഷം ഡോളറിന്റെ പ്രത്യേക സഹായവും ബജറ്റിൽ പ്രഖ്യാപിച്ചിട്ടുണ്ട്.

News by