ബൊണ്ടായ്  ഭീകരാക്രമണം: റോയൽ കമ്മീഷൻ ഇടക്കാല റിപ്പോർട്ട് പുറത്ത്; സുരക്ഷ ശക്തമാക്കാൻ സർക്കാർ 

കാൻബറ: ബൊണ്ടായിലെ ആന്റിസെമിറ്റിക് (യഹൂദ വിരുദ്ധ) ഭീകരാക്രമണത്തിന്റെ പശ്ചാത്തലത്തിൽ ഓസ്‌ട്രേലിയൻ സർക്കാർ നിയോഗിച്ച റോയൽ കമ്മീഷന്റെ ഇടക്കാല റിപ്പോർട്ട് പുറത്ത്. ‘റോയൽ കമ്മീഷൻ ഓൺ ആന്റിസെമിറ്റിസം ആൻഡ് സോഷ്യൽ കോഹിഷൻ’ (Royal Commission on Antisemitism and Social Cohesion) കമ്മീഷണർ വിർജീനിയ ബെൽ (Virginia Bell AC) ആണ് നിർണ്ണായക റിപ്പോർട്ട് സർക്കാരിന് കൈമാറിയത്. പ്രധാനമന്ത്രി ആന്റണി അൽബനീസീ, ആഭ്യന്തര-കുടിയേറ്റ വകുപ്പ് മന്ത്രി ടോണി ബർക്ക്, അറ്റോർണി ജനറൽ മിഷേൽ റോളണ്ട് എന്നിവർ സംയുക്തമായാണ് ഇക്കാര്യം ഔദ്യോഗികമായി അറിയിച്ചത്.

ഓസ്‌ട്രേലിയയിലെ യഹൂദ വിരുദ്ധത പരിശോധിക്കാനും സാമൂഹിക ഐക്യം ശക്തിപ്പെടുത്താനുമാണ് ബൊണ്ടായ് ഭീകരാക്രമണത്തിന് പിന്നാലെ സർക്കാർ ഈ കമ്മീഷനെ നിയമിച്ചത്. കമ്മീഷൻ സമർപ്പിച്ച ഇടക്കാല റിപ്പോർട്ടിനെ സ്വാഗതം ചെയ്ത സർക്കാർ, ഇതിലെ കോമൺവെൽത്തുമായി ബന്ധപ്പെട്ട എല്ലാ നിർദ്ദേശങ്ങളും അംഗീകരിച്ചതായി വ്യക്തമാക്കി. റിപ്പോർട്ടിലുള്ള 14 നിർദ്ദേശങ്ങളും രാജ്യവ്യാപകമായി നടപ്പിലാക്കാൻ സംസ്ഥാന, ടെറിട്ടറി സർക്കാരുകളുമായി ചേർന്ന് പ്രവർത്തിക്കുമെന്ന് ഭരണകൂടം ഉറപ്പുനൽകി.

ബൊണ്ടായ് ആക്രമണം തടയുന്നതിലോ അടിയന്തരമായി നേരിടുന്നതിലോ രാജ്യത്തെ നിലവിലെ നിയമ-നിയന്ത്രണ സംവിധാനങ്ങൾ ഒരു തരത്തിലും തടസ്സമായിരുന്നില്ലെന്ന് കമ്മീഷണർ വിർജീനിയ ബെൽ കണ്ടെത്തിയിട്ടുണ്ട്. അതിനാൽ അടിയന്തരമായി തിരുത്തൽ നടപടികൾ ആവശ്യമില്ലെങ്കിലും, രാജ്യത്തിന്റെ തീവ്രവാദ വിരുദ്ധ പ്രവർത്തനങ്ങളും സുരക്ഷാ സംവിധാനങ്ങളും കൂടുതൽ കുറ്റമറ്റതാക്കാൻ കമ്മീഷന്റെ നിർദ്ദേശങ്ങൾ സഹായിക്കുമെന്ന് വിലയിരുത്തപ്പെടുന്നു.

റിപ്പോർട്ടിലെ ചില നിർദ്ദേശങ്ങൾ ദേശീയ സുരക്ഷയെ ബാധിക്കുന്ന അതിപ്രധാന വിവരങ്ങളുള്ളതിനാൽ പരസ്യപ്പെടുത്തിയിട്ടില്ല. എന്നാൽ ഈ രഹസ്യ നിർദ്ദേശങ്ങളിന്മേൽ പുതിയ നയങ്ങളിലൂടെയും ഫണ്ടിങ്ങിലൂടെയും സർക്കാർ അതിവേഗം നടപടികൾ സ്വീകരിക്കുമെന്ന് സംയുക്ത പ്രസ്താവനയിൽ പറയുന്നു.

 ഓസ്‌ട്രേലിയയിലെ ഫെഡറൽ നിയമപാലക-രഹസ്യാന്വേഷണ ഏജൻസികളുടെ സ്വതന്ത്ര അവലോകനത്തിന് നേതൃത്വം നൽകിയ ഡെന്നിസ് റിച്ചാർഡ്‌സണും (Dennis Richardson AC), കമ്മീഷണർ വിർജീനിയ ബെല്ലിനും അവരുടെ സംഘത്തിനും രാജ്യത്തിന് നൽകിയ മികച്ച സേവനത്തിന് സർക്കാർ പ്രത്യേകം നന്ദി രേഖപ്പെടുത്തി.

Sajin Thiruvallam
News Editor