പെർത്ത് എയർപോർട്ടിൽ ഉപേക്ഷിക്കപ്പെട്ട നിലയിൽ ബാഗ്; പരിഭ്രാന്തി പരത്തിയ ആൾ പിടിയിൽ 

പെർത്ത്: പെർത്ത് അന്താരാഷ്ട്ര വിമാനത്താവളത്തിന്റെ സുരക്ഷയ്ക്ക് ഭീഷണിയാകുന്ന രീതിയിൽ പെരുമാറിയ 57-കാരനായ വിക്ടോറിയൻ സ്വദേശിയെ പൊലീസ് അറസ്റ്റ് ചെയ്തു. കഴിഞ്ഞ ദിവസം നടന്ന സംഭവത്തിൽ ഓസ്‌ട്രേലിയൻ ഫെഡറൽ പൊലീസിന്റെ (AFP) കസ്റ്റഡിയിലുള്ള ഇയാളെ ഇന്ന് പെർത്ത് മജിസ്‌ട്രേറ്റ് കോടതിയിൽ ഹാജരാക്കും.

സംഭവം ഇങ്ങനെ ബുധനാഴ്ച വിമാനത്താവളത്തിലെ അന്താരാഷ്ട്ര ടെർമിനലിൽ എത്തിയ പ്രതി വിമാനത്താവളത്തിന്റെ സുരക്ഷയെ വെല്ലുവിളിച്ചുകൊണ്ട് ഭീഷണി മുഴക്കുകയായിരുന്നു. ഇതിനുപിന്നാലെ ടെർമിനലിന് പുറത്ത് ഉപേക്ഷിക്കപ്പെട്ട നിലയിൽ കണ്ടെത്തിയ ഒരു ബാക്ക്‌പാക്ക് ഇയാളുടേതാണെന്ന് പൊലീസ് സ്ഥിരീകരിച്ചു. വിവരമറിഞ്ഞ ഉടൻ തന്നെ വെസ്റ്റേൺ ഓസ്‌ട്രേലിയൻ (WA) പൊലീസിന്റെ സഹായത്തോടെ എ.എഫ്.പി പ്രദേശത്ത് സുരക്ഷാ വലയം (Exclusion zone) തീർത്തു.

തുടർന്ന് നടത്തിയ അന്വേഷണത്തിൽ വെസ്റ്റേൺ ഓസ്‌ട്രേലിയൻ പൊലീസ് ഇയാളെ പെർത്ത് സി.ബി.ഡിയിൽ (CBD) നിന്നും അതിവേഗം അറസ്റ്റ് ചെയ്യുകയായിരുന്നു. ഇതിനിടെ ഉപേക്ഷിക്കപ്പെട്ട ബാഗ് ഡബ്ല്യു.എ പോലീസ് ബോംബ് റെസ്‌പോൺസ് യൂണിറ്റ് വിശദമായി പരിശോധിക്കുകയും, അതിൽ സ്ഫോടകവസ്തുക്കൾ ഒന്നുമില്ലെന്ന് ഉറപ്പുവരുത്തുകയും ചെയ്തു. ഇതിന് ശേഷമാണ് വിമാനത്താവളത്തിന്റെ പ്രവർത്തനം സാധാരണ നിലയിലായത്.

10 വർഷം വരെ തടവ് ലഭിക്കാവുന്ന കുറ്റം എ.എഫ്.പിയുടെ കസ്റ്റഡിയിലുള്ള ഇയാൾക്കെതിരെ 1991-ലെ ക്രൈംസ് (ഏവിയേഷൻ) ആക്ട് സെക്ഷൻ 28(1) പ്രകാരം, കോമൺവെൽത്ത് വിമാനത്താവളത്തെ തകർക്കാനോ സുരക്ഷ അപകടപ്പെടുത്താനോ ശ്രമിച്ചു എന്ന ഗുരുതരമായ കുറ്റമാണ് ചുമത്തിയിരിക്കുന്നത്. ഈ കുറ്റം കോടതിയിൽ തെളിയിക്കപ്പെട്ടാൽ പരമാവധി പത്ത് വർഷം വരെ തടവ് ശിക്ഷ ലഭിക്കാം.

യാത്രക്കാർക്ക് ജാഗ്രതാ നിർദ്ദേശം വ്യോമയാന സുരക്ഷയ്ക്ക് നേരെയുള്ള ഒരു തരത്തിലുള്ള ഭീഷണിയും വെച്ചുപൊറുപ്പിക്കില്ലെന്ന് എ.എഫ്.പി ഡിറ്റക്ടീവ് ആക്ടിങ് സൂപ്രണ്ട് പീറ്റർ ബ്രിൻഡാൽ വ്യക്തമാക്കി. വിമാനത്താവളങ്ങൾ യാത്രക്കാർക്കും ജീവനക്കാർക്കും ഒരുപോലെ സുരക്ഷിതമായിരിക്കണം. സംശയാസ്പദമായ പ്രവർത്തനങ്ങൾ ശ്രദ്ധയിൽപ്പെട്ടാൽ ഉടൻ വിവരമറിയിക്കണമെന്നും അദ്ദേഹം പൊതുജനങ്ങളോട് അഭ്യർത്ഥിച്ചു.

സുരക്ഷാ ക്യാമറകളുടെ ചിത്രങ്ങളെടുക്കുക, സുരക്ഷാ പരിശോധനകൾ ഒഴിവാക്കാൻ ശ്രമിക്കുക, ബാഗുകൾ ഉപേക്ഷിച്ച് പോകുക, മുഖം മറയ്ക്കുക തുടങ്ങിയ സംശയാസ്പദമായ കാര്യങ്ങൾ കണ്ടാലോ കേട്ടാലോ 131 237 എന്ന നമ്പറിൽ എയർപോർട്ട് വാച്ചിൽ വിവരമറിയിക്കണമെന്നാണ് നിർദ്ദേശം.

Photo : AFP

Sajin Thiruvallam
News Editor