വിക്ടോറിയയിൽ രണ്ട് പുതിയ TAFE Centres of Excellence വരുന്നു 

മെൽബൺ: ഡിജിറ്റൽ സാങ്കേതികവിദ്യ, ഹോം കെയർ എന്നീ സുപ്രധാന മേഖലകളിൽ വിദ്യാർത്ഥികൾക്കും അധ്യാപകർക്കും മികച്ച പരിശീലനം ഉറപ്പാക്കുന്നതിനായി വിക്ടോറിയയിൽ രണ്ട് പുതിയ ടാഫെ ‘സെന്റർ ഓഫ് എക്സലൻസുകൾ’ (TAFE Centres of Excellence) വരുന്നു. ഇതിനായി ആൽബനീസ് (ഫെഡറൽ), അലൻ (സംസ്ഥാന) ലേബർ സർക്കാരുകൾ സംയുക്തമായി 50.6 ദശലക്ഷം ഡോളർ നിക്ഷേപിക്കുമെന്ന് ഔദ്യോഗികമായി പ്രഖ്യാപിച്ചു.

മാറിവരുന്ന ആഗോള സമ്പദ്‌വ്യവസ്ഥയിൽ ഓസ്‌ട്രേലിയയുടെ മത്സരക്ഷമത നിലനിർത്താനും, ഭാവിയിലേക്ക് ആവശ്യമായ മികച്ച തൊഴിലാളികളെ വാർത്തെടുക്കാനും ഈ പദ്ധതി ലക്ഷ്യമിടുന്നു.

പ്രധാന പ്രഖ്യാപനങ്ങൾ:

പുതിയ നിക്ഷേപത്തിന്റെ ഭാഗമായി രണ്ട് പ്രധാന കേന്ദ്രങ്ങളാണ് മെൽബണിൽ സ്ഥാപിക്കുന്നത്

ഡിജിറ്റൽ, എ.ഐ ആൻഡ് ടെക്നോളജി സെന്റർ ഓഫ് എക്സലൻസ് (30 ദശലക്ഷം ഡോളർ)

സ്ഥലം: ഫ്രാങ്ക്സ്റ്റണിലെ ചിഷോം ഇൻസ്റ്റിറ്റ്യൂട്ട് (Chisholm Institute’s Frankston campus).

ലക്ഷ്യം: നിർമ്മിത ബുദ്ധി (AI), സൈബർ സുരക്ഷ തുടങ്ങിയ നൂതന സാങ്കേതിക മേഖലകളിൽ വിദ്യാർത്ഥികൾക്ക് അത്യാധുനിക സിമുലേഷൻ ലാബുകളിലൂടെ പരിശീലനം നൽകുന്നത് Chisholm Institute’s Frankston campus ലാണ് .

പ്രവർത്തനം: ടെക് കമ്പനികളുമായി നേരിട്ട് സഹകരിച്ച് പ്രായോഗിക പരിശീലനം നൽകുന്നതിനൊപ്പം, വേഗത്തിലുള്ള നൈപുണ്യ വികസനത്തിനും (upskilling and reskilling) ഈ കേന്ദ്രം അവസരമൊരുക്കും. ഡിജിറ്റൽ വിദ്യാഭ്യാസ രംഗത്ത് മികച്ച മാതൃകകൾ പ്രോത്സാഹിപ്പിക്കുന്നതിനുള്ള ഗവേഷണങ്ങളും ഇവിടെ നടക്കും

ഹോം ആൻഡ് കമ്മ്യൂണിറ്റി കെയർ സെന്റർ ഓഫ് എക്സലൻസ് (20.6 ദശലക്ഷം ഡോളർ)

സ്ഥലം: മൂറാബിനിലെ ഹോംസ്ഗ്ലെൻ ഇൻസ്റ്റിറ്റ്യൂട്ട് (Holmesglen Institute’s Moorabbin campus).

ലക്ഷ്യം: വീടുകൾ കേന്ദ്രീകരിച്ചുള്ള പരിചരണ മേഖലയിൽ (home-based care) വർദ്ധിച്ചുവരുന്ന ആവശ്യകതകൾ നിറവേറ്റുക.

പ്രവർത്തനം: ഈ കേന്ദ്രത്തിന്റെ പ്രധാന ആകർഷണം പുതിയ സാങ്കേതികവിദ്യകൾ ഉൾക്കൊള്ളിച്ചുള്ള ഒരു ‘സ്മാർട്ട് ഹൗസ്’ (Smart House) ആയിരിക്കും. ആരോഗ്യപ്രവർത്തകർക്ക് ഓട്ടോമേഷൻ, റിമോട്ട് കെയർ തുടങ്ങിയ ആധുനിക സംവിധാനങ്ങളിലൂടെ പരിചരണം നൽകുന്നതിൽ ഈ സ്മാർട്ട് ഹൗസിലൂടെ നേരിട്ടുള്ള പരിശീലനം ലഭിക്കും.

പദ്ധതിയുടെ പശ്ചാത്തലം

നാഷണൽ സ്കിൽസ് അഗ്രിമെന്റിന്റെ ഭാഗമായി 325 ദശലക്ഷം ഡോളർ ചിലവിൽ രാജ്യത്തുടനീളം 20 ടാഫെ സെന്റർ ഓഫ് എക്സലൻസുകൾ സ്ഥാപിക്കാനാണ് ആൽബനീസ് സർക്കാർ ലക്ഷ്യമിടുന്നത്. ഈ പുതിയ പ്രഖ്യാപനത്തോടെ ഓസ്‌ട്രേലിയയിൽ ഇതുവരെ പ്രഖ്യാപിക്കപ്പെട്ട ഇത്തരം കേന്ദ്രങ്ങളുടെ എണ്ണം 16 ആയി.

മന്ത്രിമാരുടെയും ജനപ്രതിനിധികളുടെയും പ്രതികരണങ്ങൾ:

ആൻഡ്രൂ ഗൈൽസ് (ഫെഡറൽ സ്കിൽസ് ആൻഡ് ട്രെയിനിങ് മന്ത്രി): “വിക്ടോറിയക്കാർക്ക് മികച്ച നൈപുണ്യം ലഭ്യമാക്കാനുള്ള സർക്കാരുകളുടെ ഏറ്റവും പുതിയ കാൽവെപ്പാണിത്. തൊഴിലിടങ്ങളിൽ തന്നെ സജ്ജീകരിക്കുന്ന ക്യാമ്പസുകൾ വഴി വിദ്യാർത്ഥികൾക്ക് മികച്ച പ്രായോഗിക പരിശീലനം നേടാൻ സാധിക്കും.”

ഗെയിൽ ടിയേർണി (വിക്ടോറിയൻ സ്കിൽസ് ആൻഡ് ടാഫെ മന്ത്രി): “വളർന്നുവരുന്ന വ്യവസായങ്ങൾക്ക് ആവശ്യമായ നൈപുണ്യം നേടാൻ ഈ നിക്ഷേപം സഹായിക്കും. സൗജന്യ ടാഫെ (Free TAFE) സംവിധാനം നിയമമാക്കി മാറ്റുന്നതിലൂടെ വിക്ടോറിയക്കാർക്ക് എക്കാലവും ഇതിന്റെ പ്രയോജനം ഉറപ്പാക്കും.”

ജോഡി ബെൽയ (ഡങ്ക്ലിയിലെ ഫെഡറൽ പ്രതിനിധി): “ഫ്രാങ്ക്സ്റ്റണിലെ ഈ നിക്ഷേപം പ്രാദേശിക വിദ്യാർത്ഥികൾക്കും അധ്യാപകർക്കും മികച്ച അവസരങ്ങളൊരുക്കും. ഇത് നമ്മുടെ സമൂഹത്തിലെ ആളുകൾക്ക് ഉയർന്ന മൂല്യമുള്ള കരിയർ സ്വന്തമാക്കാൻ സഹായിക്കും.”

പോൾ എഡ്ബ്രൂക്ക് (ഫ്രാങ്ക്സ്റ്റൺ പ്രതിനിധി): “ഫ്രാങ്ക്സ്റ്റണിനെ സംബന്ധിച്ചിടത്തോളം ഇതൊരു വലിയ നേട്ടമാണ്. ഭാവിയിലെ തൊഴിലുകൾക്കായി പ്രാദേശിക സമൂഹത്തെ സജ്ജമാക്കാൻ ഇത് സഹായിക്കും.”