മൂന്നാഴ്ച പ്രായമുള്ള കുഞ്ഞിന്റെ മരണം: പിതാവിന് പിന്നാലെ യുവതിയും അറസ്റ്റിൽ
ബ്രിസ്‌ബെയ്‌ൻ: പതിനെട്ട് മാസം നീണ്ട പോലീസ് അന്വേഷണത്തിനൊടുവിൽ, മൂന്നാഴ്ച മാത്രം പ്രായമുണ്ടായിരുന്ന കാർട്ടർ ഷെരീഫ് എന്ന കുഞ്ഞിന്റെ മരണത്തിൽ 24-കാരിയായ യുവതിയെ ക്വീൻസ്‌ലാൻഡ് പോലീസ് അറസ്റ്റ് ചെയ്തു. കുട്ടിയുടെ പിതാവായ കാർട്ടർ ഷെരീഫിനെ (25) കൊലപാതകക്കുറ്റം ചുമത്തി തിങ്കളാഴ്ച പോലീസ് പിടികൂടിയിരുന്നു. ഇതിനു തൊട്ടുപിന്നാലെയാണ് ഇന്ന് യുവതിക്കെതിരെയും നടപടിയുണ്ടായത്.
16 വയസ്സിന് താഴെയുള്ള കുട്ടികൾക്കെതിരായ ക്രൂരത (Cruelty to children – domestic violence) എന്ന കുറ്റമാണ് യുവതിക്കെതിരെ ചുമത്തിയിരിക്കുന്നത്. കുഞ്ഞിന്റെ മരണം നടന്ന് ദിവസങ്ങൾക്ക് ശേഷം പിതാവ് ഷെരീഫ് സോഷ്യൽ മീഡിയയിൽ കുഞ്ഞിനെക്കുറിച്ച് വികാരപരമായ കുറിപ്പുകൾ പങ്കുവെച്ചിരുന്നു. “മരണം നമ്മളെ വേർപിരിക്കില്ല, അപ്പ എന്നും സ്നേഹിക്കും” എന്നായിരുന്നു പോസ്റ്റ്. കൊലപാതക കുറ്റം ചുമത്തപ്പെട്ടതോടെ ഈ പോസ്റ്റുകൾ ഇപ്പോൾ ചർച്ചയായിരിക്കുകയാണ്.
സംഭവം ഇങ്ങനെ: 2024 ജൂലൈ 18-നാണ് ലോഗനിലെ ഗ്രീൻബാങ്കിലുള്ള വീട്ടിൽ വെച്ച് കുഞ്ഞിന് ഗുരുതരമായി പരിക്കേൽക്കുന്നത്. ബന്ധുക്കൾ ഉടൻ തന്നെ കുഞ്ഞിനെ ക്വീൻസ്‌ലാൻഡ് ചില്ഡ്രൻസ് ആശുപത്രിയിൽ എത്തിച്ചെങ്കിലും, നാല് ദിവസത്തിന് ശേഷം മരണം സംഭവിച്ചു.
നീണ്ട നാളത്തെ അന്വേഷണത്തിനും വിശദമായ വൈദ്യപരിശോധനകൾക്കും ഒടുവിലാണ് കുഞ്ഞിന് ആന്തരികമായി ഗുരുതരമായ പരിക്കുകൾ (Internal injuries) പറ്റിയിരുന്നതായി കണ്ടെത്തിയത്. ഇതാണ് അറസ്റ്റിലേക്ക് നയിച്ചത്.
അറസ്റ്റിലായ യുവതി മാർച്ച് 4-ന് ബീൻലീ മജിസ്‌ട്രേറ്റ് കോടതിയിൽ ഹാജരാകണം. പിതാവായ ഷെരീഫിനെ റിമാൻഡ് ചെയ്തിരിക്കുകയാണ്; ഇയാൾ ഫെബ്രുവരി 25-ന് കോടതിയിൽ ഹാജരാകണം. അന്വേഷണം ഇപ്പോഴും തുടരുകയാണെന്ന് പോലീസ് അറിയിച്ചു.
