ഓൺലൈൻ മരുന്ന് കുറിപ്പുകൾക്ക് കടിഞ്ഞാണിടാൻ സർക്കാർ 

കാൻബെറ: രോഗികൾ കഴിക്കുന്ന മരുന്നുകളുടെ പൂർണ്ണമായ വിവരങ്ങൾ ഒരൊറ്റ പ്ലാറ്റ്‌ഫോമിൽ ലഭ്യമാക്കുന്ന ‘നാഷണൽ മെഡിസിൻസ് റെക്കോർഡ്’ (National Medicines Record) നടപ്പിലാക്കാനൊരുങ്ങി അൽബാനീസ് സർക്കാർ. മരുന്നുകളുടെ അമിത ഉപയോഗം വഴിയുള്ള അപകടങ്ങൾ ഒഴിവാക്കാനാണ് ഈ നിർണ്ണായക നീക്കം.

കഴിഞ്ഞ വർഷം ഓഗസ്റ്റിൽ 24-കാരിയായ എറിൻ കോളിൻസിന്റെ (Erin Collins) മരണത്തെത്തുടർന്നാണ് ഇത്തരമൊരു തീരുമാനത്തിലേക്ക് സർക്കാർ എത്തിയത്. ഒന്നിലധികം ഓൺലൈൻ പ്ലാറ്റ്‌ഫോമുകളിലൂടെ ലഭിച്ച മരുന്നുകൾ അമിതമായി കഴിച്ചതാണ് എറിൻറെ മരണത്തിന് കാരണമായത്. മകൾക്കുണ്ടായ ദുരന്തം മറ്റാർക്കും ഉണ്ടാകരുതെന്ന് ആഗ്രഹിച്ച് അമ്മ ആലിസൺ കോളിൻസ് നടത്തിയ പോരാട്ടമാണ് ഇപ്പോൾ ഫലം കണ്ടിരിക്കുന്നത്.

പുതിയ മാറ്റങ്ങൾ ഇങ്ങനെ:

ഡോക്ടർമാർക്കും ഫാർമസിസ്റ്റുകൾക്കും രോഗി ഉപയോഗിക്കുന്ന എല്ലാ മരുന്നുകളുടെയും വിവരങ്ങൾ ഇനി മുതൽ ലഭ്യമാകും.

ഓൺലൈൻ വഴി കുറിക്കുന്ന മരുന്നുകളുടെ വിവരങ്ങൾ ‘മൈ ഹെൽത്ത് റെക്കോർഡിൽ’ നിർബന്ധമായും രേഖപ്പെടുത്തണം.

മരുന്നുകൾ മാറിപ്പോകുന്നത് (Medication errors), പാർശ്വഫലങ്ങൾ, അനാവശ്യ മരുന്ന് ഉപയോഗം എന്നിവ തടയാൻ പുതിയ സംവിധാനം സഹായിക്കും.

ഇലക്ട്രോണിക് പ്രിസ്‌ക്രിപ്‌ഷൻ (e-scripts), ആക്റ്റീവ് സ്‌ക്രിപ്റ്റ് ലിസ്റ്റ് എന്നിവ ഉപയോഗപ്പെടുത്തിയാണ് ഈ ഏകീകൃത സംവിധാനം വികസിപ്പിക്കുന്നത്.

എറിൻ കോളിൻസിന്റെ കുടുംബത്തിന്റെ ധീരമായ ഇടപെടലുകൾ ആരോഗ്യമേഖലയുടെ സുരക്ഷയിൽ വലിയ മാറ്റങ്ങൾക്കാണ് വഴിയൊരുക്കിയതെന്ന് ആരോഗ്യമന്ത്രി മാർക്ക് ബട്ലർ (Mark Butler) പറഞ്ഞു. രോഗികൾക്ക് സുരക്ഷിതമായ ചികിത്സ ഉറപ്പാക്കാൻ പുതിയ സംവിധാനം ഡോക്ടർമാരെ സഹായിക്കുമെന്നും അദ്ദേഹം വ്യക്തമാക്കി.

“ഈ മാറ്റങ്ങൾ ഞങ്ങളുടെ കുടുംബത്തിന് ആശ്വാസവും പ്രതീക്ഷയും നൽകുന്നു. എറിൻറെ കഥ മാറ്റങ്ങൾക്ക് കാരണമായിരിക്കുകയാണ്,” ആലിസൺ കോളിൻസ് പ്രതികരിച്ചു.

2026 ഡിസംബറോടെ ഇതിന്റെ ആദ്യഘട്ടം പൂർത്തിയാക്കാനാണ് സർക്കാർ ലക്ഷ്യമിടുന്നത്.