ഓസ്ട്രേലിയയിൽ ആർക്കും എപ്പോൾ വേണമെങ്കിലും സൗജന്യമായി നഴ്സിനെ വിളിക്കാം; 1800MEDICARE-നെ കുറിച്ച് അറിയേണ്ടതെല്ലാം

ഓസ്ട്രേലിയയിലുടനീളം ജനങ്ങൾക്ക് 24 മണിക്കൂറും ലഭ്യമാക്കിയിട്ടുള്ള കേന്ദ്ര സർക്കാരിന്റെ പുതിയ ടെലിഹെൽത്ത് സേവനം നിർണായക നാഴികക്കല്ല് പിന്നിടുന്നു. രാജ്യത്തെ ആശുപത്രികളിലെ എമർജൻസി വിഭാഗങ്ങളിലെ തിരക്ക് കുറയ്ക്കാനും ഏവർക്കും വേഗത്തിൽ ചികിത്സ ലഭ്യമാക്കാനും ലക്ഷ്യമിട്ട് ആരംഭിച്ച 1800MEDICARE സൗജന്യ ആരോഗ്യ ഉപദേശം ചുരുങ്ങിയ മാസങ്ങൾക്കൊണ്ട് ജനങ്ങൾക്കിടയിൽ വലിയ സ്വീകാര്യത നേടിയെന്നാണ് ഏറ്റവും പുതിയ ഔദ്യോഗിക റിപ്പോർട്ടുകൾ സൂചിപ്പിക്കുന്നത്.

ആദ്യ പത്തുമാസത്തിൽ പത്ത് ലക്ഷം ഉപയോക്താക്കൾ

2026 ജനുവരി ഒന്നിന് ആരംഭിച്ച ഈ സേവനത്തിലൂടെ പത്ത് മാസത്തിനുള്ളിൽ പത്ത് ലക്ഷത്തിലധികം ആളുകൾ സൗജന്യമായി ആരോഗ്യ ഉപദേശങ്ങൾ തേടിയതായി ആരോഗ്യമന്ത്രി Mark Butler പുറത്തിറക്കിയ ഔദ്യോഗിക മാധ്യമക്കുറിപ്പിൽ വ്യക്തമാക്കുന്നു. ഇതിനായി ഫെഡറൽ സർക്കാർ 200 ദശലക്ഷത്തിലധികം ഡോളറാണ് നിക്ഷേപിച്ചിരിക്കുന്നത്.

ഏറ്റവും പുതിയ കണക്കുകൾ പ്രകാരം ന്യൂ സൗത്ത് വെയിൽസിൽ (NSW) നിന്നും 471,000-ലധികം കോളുകളും വിക്ടോറിയയിൽ (VIC) നിന്നും 352,000-ലധികം കോളുകളുമാണ് ഇതുവരെ ലഭിച്ചത്. വെസ്റ്റേൺ ഓസ്ട്രേലിയ (133,000), സൗത്ത് ഓസ്ട്രേലിയ (116,000), ടാസ്മാനിയ (31,000), ക്വീൻസ്‌ലാൻഡ് (31,000), എസിടി (25,000), നോർത്തേൺ ടെറിട്ടറി (8,000) എന്നിങ്ങനെയാണ് മറ്റ് പ്രധാന സംസ്ഥാനങ്ങളിലെയും ടെറിട്ടറികളിലെയും കോളുകളുടെ എണ്ണം.

എമർജൻസി വിഭാഗങ്ങളിലെ തിരക്കിൽ കുറവ്

ആശുപത്രികളിലെ തിരക്ക് കുറയ്ക്കുന്നതിൽ ഈ സേവനം വലിയ പങ്കുവഹിച്ചതായി സർക്കാർ കണക്കുകൾ അവകാശപ്പെടുന്നു. പത്തിൽ ഒരു കോൾ വീതം എമർജൻസി വിഭാഗത്തിലേക്കോ ട്രിപ്പിൾ സീറോയിലേക്കോ പോകുന്നതിൽ നിന്നും ഒഴിവാക്കാൻ സാധിച്ചതായി സർക്കാരിന്റെ റിപ്പോർട്ടിലുണ്ട്. ഇത്തരത്തിൽ 170,000-ത്തിലധികം ആളുകളെ തിരക്കേറിയ എമർജൻസി വിഭാഗങ്ങളിൽ നിന്നും ഒഴിവാക്കി കൃത്യമായ മറ്റ് ചികിത്സാ മാർഗ്ഗങ്ങളിലേക്ക് തിരിച്ചുവിടാൻ കഴിഞ്ഞതായി മന്ത്രി അറിയിച്ചു.

Click here to listen to this news…

പത്തിൽ ഒരാളെ അർജന്റ് കെയർ ക്ലിനിക്കുകളിലേക്കും (Urgent Care) റഫർ ചെയ്തിട്ടുണ്ട്. ഇതിന് പുറമെ, ഏകദേശം 60,000 സൗജന്യ വെർച്വൽ ജിപി (Virtual GP) കൺസൾട്ടേഷനുകളും ഈ പത്ത് മാസത്തിനുള്ളിൽ നൽകിയിട്ടുണ്ട്. ഗ്രാമീണ മേഖലകളിൽ നിന്നുള്ളവരാണ് വിളിക്കുന്നവരിൽ അഞ്ചിലൊരാളും. കുട്ടികൾക്ക് വേണ്ടി ആരോഗ്യ ഉപദേശം തേടുന്ന മാതാപിതാക്കളുടെ എണ്ണവും ഇതിൽ കൂടുതലാണ്. വാരാന്ത്യങ്ങളിലും പൊതു അവധി ദിവസങ്ങളിലുമാണ് മൂന്നിലൊന്ന് കോളുകളും വന്നിരിക്കുന്നത്.

ആർക്കൊക്കെ ഉപയോഗിക്കാം? സേവനങ്ങൾ എന്തെല്ലാം?

ഓസ്ട്രേലിയയിലുള്ള ഏതൊരാൾക്കും 1800 633 422 എന്ന നമ്പറിലൂടെ ഈ സേവനം പ്രയോജനപ്പെടുത്താം. വിളിക്കുന്നവർക്ക് രജിസ്റ്റർ ചെയ്ത നഴ്സുമാരുടെ സേവനം 24 മണിക്കൂറും സൗജന്യമായി ലഭിക്കും. നഴ്സുമാരുടെ വിലയിരുത്തലിന്റെ അടിസ്ഥാനത്തിൽ, പ്രവൃത്തിദിവസങ്ങളിൽ വൈകുന്നേരം 6 മണി മുതൽ രാവിലെ 8 മണി വരെയും വാരാന്ത്യങ്ങളിൽ മുഴുവൻ സമയവും വെർച്വൽ ജിപിയുടെ സേവനവും ലഭ്യമാണ്.

അടിസ്ഥാന ഉപദേശങ്ങൾ ലഭിക്കാൻ മെഡികെയർ കാർഡ് (Medicare card) നിർബന്ധമില്ലെങ്കിലും, വെർച്വൽ ജിപി വഴി ഡോക്ടറുടെ ഇ-പ്രിസ്ക്രിപ്ഷൻ (e-script) ആവശ്യമുള്ളവർക്ക് കാർഡ് വിവരങ്ങൾ നൽകേണ്ടതുണ്ട്. എന്നാൽ, ജീവന് ഭീഷണിയുള്ളതോ അടിയന്തര വൈദ്യസഹായം ആവശ്യമുള്ളതോ ആയ എമർജൻസി ഘട്ടങ്ങളിൽ ഈ സേവനത്തിന് പകരം ട്രിപ്പിൾ സീറോ (000) എന്ന നമ്പറിൽ തന്നെ വിളിക്കണമെന്ന് ആരോഗ്യവകുപ്പ് കർശനമായി നിർദ്ദേശിക്കുന്നു.

അടിയന്തരമല്ലാത്ത ആരോഗ്യ പ്രശ്നങ്ങൾക്ക് 1800MEDICARE പോലെയുള്ള സൗജന്യ ടെലിഹെൽത്ത് സേവനങ്ങൾ നിങ്ങളുടെ കുടുംബത്തിന് പ്രയോജനകരമാണെന്ന് കരുതുന്നുണ്ടോ? ഇത്തരം സേവനങ്ങൾ കൂടുതൽ മെച്ചപ്പെടുത്താൻ എന്തൊക്കെ മാറ്റങ്ങൾ വേണം? നിങ്ങളുടെ അഭിപ്രായങ്ങൾ താഴെ രേഖപ്പെടുത്തുക.

Sajin Thiruvallam
News Editor