അച്ചാർ കുപ്പികളിൽ 115 കിലോ ‘മെത്ത്’; 2 പേർ പിടിയിൽ  (video)

കാനഡയിൽ നിന്നും ഓസ്‌ട്രേലിയയിലേക്ക് അച്ചാർ ഭരണികളിൽ ഒളിപ്പിച്ച് കടത്താൻ ശ്രമിച്ച 106 ദശലക്ഷം ഡോളർ വിലമതിക്കുന്ന മാരക ലഹരിമരുന്ന് പിടികൂടി. ഓസ്‌ട്രേലിയൻ ഫെഡറൽ പൊലീസും (AFP) റോയൽ കനേഡിയൻ മൗണ്ടഡ് പൊലീസും (RCMP) സംയുക്തമായി നടത്തിയ നീക്കത്തിലാണ് അന്താരാഷ്ട്ര മയക്കുമരുന്ന് മാഫിയയുടെ വൻ പദ്ധതി പൊളിഞ്ഞത്. സംഭവവുമായി ബന്ധപ്പെട്ട് വിക്ടോറിയ, ന്യൂ സൗത്ത് വെയിൽസ് എന്നിവിടങ്ങളിൽ നിന്നായി രണ്ട് ഓസ്‌ട്രേലിയക്കാർ പിടിയിലായിട്ടുണ്ട്.

ഓസ്‌ട്രേലിയൻ ഏജൻസികളും കനേഡിയൻ പൊലീസും സംയുക്തമായി ‘ഓപ്പറേഷൻ പ്രൈത്തിയൻ’ (Operation Prythian) എന്ന പേരിൽ നടത്തിയ അന്വേഷണത്തിലാണ് ഈ വൻ മയക്കുമരുന്ന് വേട്ട നടന്നത്. 115 കിലോ മെത്താംഫെറ്റാമൈൻ (Methamphetamine – മെത്ത്). ഇത് അച്ചാർ ഭരണികളിൽ അതിവിദഗ്ധമായി ഒളിപ്പിച്ച നിലയിലായിരുന്നു.

പിടികൂടിയ ലഹരിമരുന്നിന് ഓസ്‌ട്രേലിയൻ നിരത്തുകളിൽ ഏകദേശം 106.3 ദശലക്ഷം ഡോളർ വിലവരും. ഇത് പത്ത് ലക്ഷത്തിലധികം ആളുകളിലേക്ക് എത്തുമായിരുന്നു എന്നാണ് പോലീസ് കണക്കാക്കുന്നത്. സിഡ്‌നിയിലെ ക്രോയ്ഡൺ പാർക്കിൽ നിന്നും 40 വയസ്സുകാരനും, വിക്ടോറിയയിലെ ബാക്സ്റ്ററിൽ നിന്നും 63 വയസ്സുകാരനുമാണ് പിടിയിലായത്. ഇവരെക്കൂടാതെ, കാനഡയിലെ ബ്രിട്ടീഷ് കൊളംബിയയിൽ വെച്ച് മറ്റൊരാളെ കനേഡിയൻ പോലീസും അറസ്റ്റ് ചെയ്തിട്ടുണ്ട്.

മയക്കുമരുന്ന് ഓസ്‌ട്രേലിയയിൽ എത്തിയത് എങ്ങനെ?

കാനഡയിൽ നിന്നും ഓസ്‌ട്രേലിയയിലേക്ക് വരുന്ന ഒരു പാർസലിൽ മയക്കുമരുന്ന് ഉള്ളതായി ഈ വർഷം (2026) ജനുവരിയിൽ തന്നെ കനേഡിയൻ അധികൃതർ കണ്ടെത്തിയിരുന്നു. തുടർന്ന് അച്ചാർ ഭരണികളിൽ ഉണ്ടായിരുന്ന യഥാർത്ഥ ലഹരിമരുന്ന് മാറ്റി, പകരം അപകടകരമല്ലാത്ത മറ്റൊരു പദാർത്ഥം നിറച്ച് പാർസൽ ഓസ്‌ട്രേലിയയിലേക്ക് അയച്ചു.

മാർച്ച് 4-ന് മെൽബണിൽ എത്തിയ ഈ പാർസൽ, ഓസ്‌ട്രേലിയൻ ബോർഡർ ഫോഴ്‌സിന്റെ രഹസ്യ നിരീക്ഷണത്തിൽ മാർച്ച് 17-ന് വിക്ടോറിയയിലെ കാംബെൽഫീൽഡിലുള്ള ഒരു വിലാസത്തിൽ എത്തിച്ചു. ഇതിന് പിന്നാലെയാണ് വിക്ടോറിയയിലും സിഡ്‌നിയിലുമായി ഒരേസമയം റെയ്ഡ് നടത്തി പോലീസ് പ്രതികളെ പിടികൂടിയത്.

Video & Photo credit : AFP

റെയ്ഡിൽ കണ്ടുകെട്ടിയ സ്വത്തുക്കൾ

സിഡ്‌നിയിലെ ക്രോയ്ഡൺ പാർക്കിലുള്ള വസതിയിൽ നടത്തിയ പരിശോധനയിൽ, മയക്കുമരുന്ന് ഇടപാടിലൂടെ സമ്പാദിച്ചതെന്ന് കരുതുന്ന വൻ സ്വത്തുക്കൾ പോലീസ് പിടിച്ചെടുത്തു:

ഏകദേശം $400,000 ഓസ്‌ട്രേലിയൻ ഡോളർ (പണം)
1 കിലോ വീതം ഭാരമുള്ള എട്ട് വെള്ളി കട്ടികൾ (Silver bars)
ഒരു ഫോർഡ് മസ്താങ് (Ford Mustang) കാർ
വിലപിടിപ്പുള്ള ആഭരണങ്ങൾ, വാച്ചുകൾ, ഇലക്ട്രോണിക് ഉപകരണങ്ങൾ

കോടതി നടപടികളും ശിക്ഷയും

രണ്ട് പ്രതികൾക്കുമെതിരെ ജീവപര്യന്തം വരെ തടവ് ശിക്ഷ ലഭിക്കാവുന്ന അതീവ ഗുരുതരമായ ക്രിമിനൽ കുറ്റങ്ങളാണ് ചുമത്തിയിരിക്കുന്നത്.

വിക്ടോറിയൻ സ്വദേശി (63): വാണിജ്യാടിസ്ഥാനത്തിൽ ലഹരിമരുന്ന് കൈവശം വെക്കാൻ ശ്രമിച്ചെന്ന കുറ്റത്തിന് ഇയാളെ മാർച്ച് 18-ന് മെൽബൺ മജിസ്‌ട്രേറ്റ് കോടതിയിൽ ഹാജരാക്കി.

സിഡ്‌നി സ്വദേശി (40): ഇയാളെ ന്യൂ സൗത്ത് വെയിൽസിൽ നിന്നും വിക്ടോറിയയിലേക്ക് കൊണ്ടുവരികയും മാർച്ച് 25-ന് കോടതിയിൽ ഹാജരാക്കുകയും ചെയ്തു. ലഹരിമരുന്ന് ഇറക്കുമതി ചെയ്യാൻ ശ്രമിച്ചു, അതിനായി ഗൂഢാലോചന നടത്തി എന്നീ രണ്ട് കുറ്റങ്ങളാണ് ഇയാൾക്കെതിരെ ചുമത്തിയിട്ടുള്ളത്. ഇരുവരെയും നിലവിൽ റിമാൻഡ് ചെയ്തിരിക്കുകയാണ്. വിക്ടോറിയൻ സ്വദേശി ജൂൺ 20-നും, സിഡ്‌നി സ്വദേശി ജൂലൈ 9-നും വീണ്ടും കോടതിയിൽ ഹാജരാകണം.

ഉദ്യോഗസ്ഥരുടെ പ്രതികരണം

ഓസ്‌ട്രേലിയൻ സമൂഹത്തെ ലഹരിമരുന്നിന്റെ വിപത്തിൽ നിന്നും സംരക്ഷിക്കാൻ അന്താരാഷ്ട്ര ഏജൻസികളുമായി ചേർന്ന് പ്രവർത്തിക്കുന്നതിന്റെ മികച്ച ഉദാഹരണമാണിതെന്ന് AFP ആക്ടിങ് കമാൻഡർ സിമോൺ ബുച്ചർ പറഞ്ഞു. അതിർത്തികൾ കടന്നുള്ള ഇത്തരം കുറ്റകൃത്യങ്ങൾ ചെയ്യുന്നവർക്കെതിരെ ശക്തമായ അന്താരാഷ്ട്ര പ്രതികരണം തന്നെ ഉണ്ടാകുമെന്ന് കനേഡിയൻ പൊലീസ് പ്രതിനിധി ടിം ആഴ്സെനോൾട്ടും ഓർമ്മിപ്പിച്ചു.