ഹോർമുസ് കടലിടുക്ക് തുറന്നാൽ ഇറാനുമായി രണ്ടാഴ്ചത്തെ വെടിനിർത്തൽ; യുദ്ധഭീഷണിയിൽ നിന്ന് താൽക്കാലികമായി പിന്മാറി ഡൊണാൾഡ് ട്രംപ്

വാഷിംഗ്ടൺ: ലോകം കടുത്ത ആശങ്കയോടെ ഉറ്റുനോക്കിയ അമേരിക്ക-ഇറാൻ യുദ്ധഭീഷണിക്ക് താൽക്കാലിക വിരാമം. തന്ത്രപ്രധാനമായ ഹോർമുസ് കടലിടുക്ക് (Strait of Hormuz) പൂർണ്ണമായും സുരക്ഷിതമായും തുറന്നുകൊടുക്കാൻ തയ്യാറായാൽ ഇറാനെതിരെയുള്ള സൈനിക ആക്രമണങ്ങൾ രണ്ടാഴ്ചത്തേക്ക് നിർത്തിവെക്കാമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. പാകിസ്ഥാൻ ഭരണനേതൃത്വത്തിന്റെ സമയോചിതമായ ഇടപെടലിനും ഇറാൻ മുന്നോട്ടുവെച്ച പുതിയ സമാധാന നിർദ്ദേശങ്ങൾക്കും പിന്നാലെയാണ് ട്രംപ് തന്റെ മുൻ നിലപാടിൽ നിന്ന് പിന്മാറിയത്.

ചൊവ്വാഴ്ച രാത്രി എട്ടു മണിക്കുള്ളിൽ അമേരിക്കയുടെ ആവശ്യങ്ങൾ ഇറാൻ അംഗീകരിച്ചില്ലെങ്കിൽ രാജ്യത്തെ പൂർണ്ണമായും നശിപ്പിക്കുമെന്ന് ട്രംപ് നേരത്തെ മുന്നറിയിപ്പ് നൽകിയിരുന്നു. എന്നാൽ ട്രൂത്ത് സോഷ്യൽ (Truth Social) പ്ലാറ്റ്‌ഫോമിലൂടെ പുറത്തുവിട്ട ഏറ്റവും പുതിയ പ്രസ്താവനയിൽ, ബോംബിംഗും മറ്റ് ആക്രമണങ്ങളും താൽക്കാലികമായി നിർത്തിവെക്കാൻ താൻ തയ്യാറാണെന്ന് അദ്ദേഹം വ്യക്തമാക്കി. പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, സൈനിക മേധാവി ഫീൽഡ് മാർഷൽ അസിം മുനീർ എന്നിവരുമായി നടത്തിയ ചർച്ചകൾക്ക് ശേഷമാണ് തീരുമാനമെന്നും അദ്ദേഹം കൂട്ടിച്ചേർത്തു.

ഇറാൻ സർക്കാരിന്റെ ഭാഗത്തുനിന്നും ലഭിച്ച 10 ഇന നിർദ്ദേശങ്ങൾ ചർച്ചകൾക്കുള്ള മികച്ച അടിസ്ഥാനമാണെന്ന് ട്രംപ് അഭിപ്രായപ്പെട്ടു. ഇരുകൂട്ടരും തമ്മിലുള്ള മുൻകാല തർക്കവിഷയങ്ങളിൽ മിക്കവാറും സമവായത്തിൽ എത്തിയിട്ടുണ്ടെന്നും, ഈ രണ്ടാഴ്ചത്തെ സമയം ദീർഘകാല സമാധാന കരാർ അന്തിമമാക്കാൻ സഹായിക്കുമെന്നും അദ്ദേഹം പ്രത്യാശ പ്രകടിപ്പിച്ചു. ഇറാനും ഈ 15 ദിവസത്തെ ചർച്ചകൾക്ക് സമ്മതം അറിയിച്ചിട്ടുണ്ട്. മധ്യപൂർവേഷ്യയിൽ ദീർഘകാല സമാധാനം കൊണ്ടുവരുന്നതിന് ഇതൊരു സുപ്രധാന ചുവടുവെപ്പാകുമെന്നാണ് അമേരിക്കൻ പ്രസിഡന്റിന്റെ വിലയിരുത്തൽ. എന്നാൽ നയതന്ത്ര ചർച്ചകൾ പരാജയപ്പെട്ടാൽ രണ്ടാഴ്ചയ്ക്ക് ശേഷം വീണ്ടും അമേരിക്കൻ ആക്രമണം ഉണ്ടായേക്കാമെന്ന ആശങ്കയും നിലനിൽക്കുന്നുണ്ട്.

ട്രംപിന്റെ യുദ്ധഭീഷണിക്കെതിരെ വ്യാപക പ്രതിഷേധം

നേരത്തെ, ഇറാനെ പൂർണ്ണമായും നശിപ്പിക്കുമെന്ന ഡൊണാൾഡ് ട്രംപിന്റെ ഭീഷണിക്കെതിരെ രാഷ്ട്രീയ ഭേദമന്യേ അമേരിക്കയ്ക്കകത്തും പുറത്തും കടുത്ത വിമർശനങ്ങളാണ് ഉയർന്നത്. ഇറാനിലെ അടിസ്ഥാന സൗകര്യങ്ങളിലും സിവിലിയൻ കേന്ദ്രങ്ങളിലും ബോംബിടുന്നത് വലിയ അബദ്ധമാകുമെന്ന് റിപ്പബ്ലിക്കൻ സെനറ്ററും ട്രംപിന്റെ വിശ്വസ്തനുമായ റോൺ ജോൺസൺ മുന്നറിയിപ്പ് നൽകി. ഡെമോക്രാറ്റിക് സെനറ്റ് ന്യൂനപക്ഷ നേതാവ് ചക്ക് ഷുമർ ട്രംപിനെ ‘വളരെ രോഗിയായ വ്യക്തി’ (extremely sick person) എന്നാണ് വിശേഷിപ്പിച്ചത്. യുദ്ധം ഉടൻ അവസാനിപ്പിക്കാൻ പാർലമെന്റിൽ വോട്ടെടുപ്പ് നടത്തണമെന്ന് ജനപ്രതിനിധി സഭയിലെ ഡെമോക്രാറ്റിക് നേതൃത്വം ആവശ്യപ്പെട്ടു.

നിരപരാധികളായ ഇറാൻ പൗരന്മാർ കൊല്ലപ്പെടുന്ന കൂട്ടക്കൊലകൾക്ക് അമേരിക്കൻ ഉദ്യോഗസ്ഥർ കൂട്ടുനിൽക്കരുതെന്ന് പ്രമുഖ റൈറ്റ് വിങ് പോഡ്കാസ്റ്റർ ടക്കർ കാൾസൺ അഭ്യർത്ഥിച്ചു. ആഗോളതലത്തിൽ, പോപ്പ് ലിയോ പതിനാലാമൻ (Pope Leo XIV) ട്രംപിന്റെ ഭീഷണിയെ ‘ഒരിക്കലും അംഗീകരിക്കാനാവാത്തത്’ എന്ന് അപലപിച്ചു.

യൂറോപ്പിൽ പിന്തുണയുറപ്പിച്ച് ജെ.ഡി. വാൻസ്

അമേരിക്കൻ വിദേശകാര്യ നയങ്ങളിലെ മറ്റൊരു സുപ്രധാന നീക്കത്തിൽ, വൈസ് പ്രസിഡന്റ് ജെ.ഡി. വാൻസ് (JD Vance) ഹംഗേറിയൻ പ്രധാനമന്ത്രി വിക്ടർ ഓർബനുമായി (Viktor Orbán) ബുഡാപെസ്റ്റിൽ കൂടിക്കാഴ്ച നടത്തി. വരാനിരിക്കുന്ന ഹംഗേറിയൻ തിരഞ്ഞെടുപ്പിൽ വിക്ടർ ഓർബന് അമേരിക്കയുടെ പൂർണ്ണ പിന്തുണ ഉറപ്പുനൽകുന്നതായിരുന്നു ഈ സന്ദർശനം. കുടുംബം, ദേശീയത, പാശ്ചാത്യ സംസ്കാരം തുടങ്ങിയ വിഷയങ്ങളിലുള്ള ഇരു രാജ്യങ്ങളുടെയും സമാന കാഴ്ചപ്പാടുകളാണ് ഇവിടെ ചർച്ചയായത്. വരും തലമുറയുടെ നല്ല ഭാവിയിൽ വിശ്വസിക്കുന്നവരും അല്ലാത്തവരും തമ്മിലാണ് ഇന്നത്തെ യഥാർത്ഥ രാഷ്ട്രീയ പോരാട്ടമെന്ന് ജെ.ഡി. വാൻസ് എക്സ് (X) പ്ലാറ്റ്‌ഫോമിൽ കുറിച്ചു. ഇറാൻ വിഷയത്തിൽ അമേരിക്ക നിർണ്ണായക തീരുമാനങ്ങൾ എടുക്കുന്നതിനിടയിലാണ് യൂറോപ്പിലെ ഈ സമാന്തര രാഷ്ട്രീയ നീക്കം എന്നതും ശ്രദ്ധേയമാണ്.

Sajin Thiruvallam
News Editor