Qantas വിമാനം സൈനിക താവളത്തിൽ ഇറക്കി; യാത്രക്കാരിക്ക് ദേഹാസ്വാസ്ഥ്യം
അഡ്ലെയ്ഡ്: കനത്ത കാറ്റും മോശം കാലാവസ്ഥയും കാരണം അഡ്ലെയ്ഡ് വിമാനത്താവളത്തിൽ ഇറങ്ങേണ്ട ക്വാന്റാസ് (Qantas) വിമാനം അടിയന്തരമായി സൈനിക താവളത്തിലേക്ക് തിരിച്ചുവിട്ടു. അഡ്ലെയ്ഡിന് വടക്കുള്ള എഡിൻബർഗ് ആർ.എ.എ.എഫ് (RAAF) എയർ ബേസിലാണ് വിമാനം ഇറക്കിയത്. സമീപകാല ചരിത്രത്തിൽ ഇതാദ്യമായാണ് ഒരു യാത്രാവിമാനം ഈ സൈനിക താവളത്തിൽ ഇറക്കുന്നത്.
വിമാനത്താവളത്തിന് സമീപം മണിക്കൂറിൽ 72 കിലോമീറ്റർ വേഗതയിൽ കാറ്റടിച്ചതിനെ തുടർന്ന് വിമാനം നിയന്ത്രിക്കാൻ ബുദ്ധിമുട്ടായിരുന്നു. ശക്തമായ കുലുക്കം (Turbulence) അനുഭവിച്ച വിമാനം ഒടുവിൽ എയർ ബേസിൽ സുരക്ഷിതമായി ഇറക്കി.
വിമാനം എയർ ബേസിൽ ഇറങ്ങിയതിന് പിന്നാലെ 30 വയസ്സുള്ള ഒരു യാത്രക്കാരിക്ക് ദേഹാസ്വാസ്ഥ്യം അനുഭവപ്പെട്ടു. തുടർന്ന് ഇവരെ ഉടൻ തന്നെ ലയൽ മക്ഇവിൻ (Lyell McEwin) ആശുപത്രിയിലേക്ക് മാറ്റി. ഇവർ ഇപ്പോൾ അപകടനില തരണം ചെയ്തതായി അധികൃതർ അറിയിച്ചു.
വിമാനത്തിൽ ഇന്ധനം നിറച്ച ശേഷം രാത്രി 8 മണിയോടെ എയർ ബേസിൽ നിന്ന് പറന്നുയർന്ന വിമാനം 15 മിനിറ്റിനുള്ളിൽ അഡ്ലെയ്ഡ് വിമാനത്താവളത്തിൽ എത്തിച്ചേർന്നു. മോശം കാലാവസ്ഥയിൽ വിമാനം ഏറെ നേരം ആകാശത്ത് വട്ടമിട്ട് പറക്കുന്നത് ഒഴിവാക്കാനാണ് എയർ ബേസിൽ ഇറക്കി ഇന്ധനം നിറച്ചതെന്ന് ക്വാന്റാസ് അധികൃതർ വ്യക്തമാക്കി.
