വിക്ടോറിയയിൽ ‘ബിഗ് സ്വിച്ച്’ വിപ്ലവം;  യാത്രക്കാർക്ക് ആശ്വാസവും ആശയക്കുഴപ്പവും

മെൽബൺ: വിക്ടോറിയയുടെ പൊതുഗതാഗത ചരിത്രത്തിലെ ഏറ്റവും വലിയ മാറ്റങ്ങളിലൊന്നായ ‘ബിഗ് സ്വിച്ച്’ (The Big Switch) ഔദ്യോഗികമായി നിലവിൽ വന്നു. മെൽബൺ മെട്രോ ടണൽ പൂർണ്ണമായും റെയിൽ ശൃംഖലയുമായി സംയോജിപ്പിച്ചതോടെ ഞായറാഴ്ച (ഫെബ്രുവരി 1) മുതൽ സംസ്ഥാനത്തുടനീളം ആയിരക്കണക്കിന് ടൈംടേബിൾ മാറ്റങ്ങളാണ് നടപ്പിലായത്.

മൂന്ന് വർഷത്തോളമെടുത്തുള്ള ആസൂത്രണത്തിനും ജനസംഖ്യാ വർദ്ധനവിനെക്കുറിച്ചുള്ള പഠനങ്ങൾക്കും ശേഷമാണ് പുതിയ മാറ്റങ്ങൾ കൊണ്ടുവന്നിരിക്കുന്നത്.

പ്രധാന മാറ്റങ്ങൾ ഇവയാണ്:

സംസ്ഥാനത്തുടനീളമായി 1,200-ലധികം പുതിയ പബ്ലിക് ട്രാൻസ്‌പോർട്ട് സർവീസുകൾ ആരംഭിച്ചു. സൺബറി, ക്രാൻബേൺ, പാക്കൻഹാം ലൈനുകൾ ഇനിമുതൽ സിറ്റി ലൂപ്പ് ഒഴിവാക്കി പുതിയ മെട്രോ ടണലിലൂടെയാകും സർവീസ് നടത്തുക. പീക്ക് സമയങ്ങളിൽ ഓരോ മൂന്ന് മിനിറ്റിലും ട്രെയിനുകൾ ലഭ്യമാകും.

ഫ്രാങ്ക്സ്റ്റൺ ലൈൻ ട്രെയിനുകൾ സിറ്റി ലൂപ്പിലേക്ക് തിരിച്ചെത്തി. മെൽബണിന് പുറമെ റീജിയണൽ വിക്ടോറിയയിലും വലിയ മാറ്റങ്ങളുണ്ട്. പുതിയ ട്രെയിൻ സർവീസുകൾക്ക് പുറമെ, 270 പുതിയ ബസ് സർവീസുകളും ആരംഭിച്ചിട്ടുണ്ട്. സെയ്‌മോർ (Seymour), ട്രരാൽഗൺ (Traralgon), എച്ചുക്ക (Echuca) ലൈനുകളിൽ അധിക സർവീസുകൾ ഏർപ്പെടുത്തി.

‘ആശയക്കുഴപ്പം’: പുതിയ ടൈംടേബിൾ നിലവിൽ വന്നതിന് ശേഷമുള്ള ആദ്യ പ്രവൃത്തിദിവസമായ ഇന്നലെ (തിങ്കളാഴ്ച), യാത്രക്കാർക്കിടയിൽ വലിയ ആശയക്കുഴപ്പം സൃഷ്ടിച്ചു. പതിവ് സമയക്രമത്തിൽ വന്ന മാറ്റം പലരെയും വലച്ചു. പുതിയ സംവിധാനവുമായി പൊരുത്തപ്പെടാൻ യാത്രക്കാർക്ക് അൽപ്പം സമയം വേണ്ടിവരുമെന്നും, എന്നാൽ ഭാവിയിൽ ഇത് വലിയ ഗുണം ചെയ്യുമെന്നും ഗതാഗത മന്ത്രി ഗാബ്രിയേൽ വില്ല്യംസ് പ്രതികരിച്ചു.

“കൂടുതൽ ട്രെയിൻ സർവീസുകൾ എന്നാൽ ഗതാഗത കുരുക്കിൽ കുറഞ്ഞ സമയവും, വീട്ടിൽ കൂടുതൽ സമയവും എന്നാണ് അർത്ഥമാക്കുന്നത്,” എന്ന് പ്രീമിയർ ജസീന്ത അലൻ പറഞ്ഞു. ഈ മാറ്റം തുടക്കത്തിൽ ബുദ്ധിമുട്ടുണ്ടാക്കിയേക്കാമെങ്കിലും, വേഗതയേറിയതും മികച്ചതുമായ ഒരു ഗതാഗത സംവിധാനത്തിന് ഇത് അനിവാര്യമാണെന്നും അധികൃതർ വ്യക്തമാക്കി.