തൊഴിലന്വേഷകർക്ക് കൈത്താങ്ങായി വിക്ടോറിയ; പുതിയ Yarra Thrive Hub തുറന്നു

വിക്ടോറിയയിൽ ജോലി അന്വേഷിക്കുന്നവർക്കും കരിയർ മെച്ചപ്പെടുത്താൻ ആഗ്രഹിക്കുന്നവർക്കും മികച്ച അവസരമൊരുക്കി ഫിറ്റ്‌സ്‌റോയിയിൽ (Fitzroy) പുതിയ Yarra Thrive Hub Fitzroy പ്രവർത്തനം ആരംഭിച്ചു. തൊഴിൽ പരിശീലനം, അഭിമുഖങ്ങൾക്കുള്ള തയ്യാറെടുപ്പ് എന്നിവയ്ക്ക് ഇനി ഈ കേന്ദ്രത്തിലൂടെ മികച്ച സഹായം ലഭിക്കും. വിക്ടോറിയയിൽ പൂർണ്ണ തൊഴിൽ അവകാശമുള്ളവർക്ക് ഇതിന്റെ സേവനം പ്രയോജനപ്പെടുത്താം.

വാർത്ത ചുരുക്കത്തിൽ: 

നവീകരിച്ച തൊഴിൽ കേന്ദ്രം: വിക്ടോറിയൻ സർക്കാർ കൂടുതൽ തൊഴിലവസരങ്ങൾ സൃഷ്ടിക്കുന്നതിന്റെ ഭാഗമായി അത്യാധുനിക സൗകര്യങ്ങളോടെ പുതിയ ഹബ്ബ് തുറന്നു.

പങ്കാളിത്തവും സേവനങ്ങളും: പ്രമുഖ സന്നദ്ധ സംഘടനയായ ബ്രദർഹുഡ് ഓഫ് സെന്റ് ലോറൻസുമായി (BSL) ചേർന്നാണ് പദ്ധതി നടപ്പിലാക്കുന്നത്.

യോഗ്യത: വിക്ടോറിയയിൽ സ്ഥിരതാമസമുള്ളവർക്കും, ഓസ്‌ട്രേലിയയിൽ ഫുൾ വർക്കിംഗ് റൈറ്റ്സ് (Full working rights) ഉള്ളവർക്കും സേവനം ലഭിക്കും.

പുനർനിർമ്മിച്ച യാര ത്രൈവ് ഹബ്

വിക്ടോറിയൻ തൊഴിൽ വകുപ്പ് മന്ത്രി മെലിസ ഹോൺ (Melissa Horne) ആണ് ഫിറ്റ്‌സ്‌റോയിയിലെ പുതിയ ഹബ്ബിന്റെ ഉദ്ഘാടനം നിർവ്വഹിച്ചത്. ബ്രദർഹുഡ് ഓഫ് സെന്റ് ലോറൻസ് (BSL) പുറത്തുവിട്ട വിവരങ്ങൾ പ്രകാരം  കഴിഞ്ഞ ദിവസമായിരുന്നു  ഉദ്ഘാടന ചടങ്ങുകൾ നടന്നത്. എന്നാൽ വിക്ടോറിയൻ സർക്കാരിന്റെ ഔദ്യോഗിക വാർത്താക്കുറിപ്പ് ഇന്നാണ് പ്രസിദ്ധീകരിച്ചിരിക്കുന്നത്.

മുൻപ് ഒരു വർക്ക് ആൻഡ് ലേണിംഗ് സെന്ററായി പ്രവർത്തിച്ചിരുന്ന ഈ കേന്ദ്രം ഇപ്പോൾ പുതിയ ട്രെയിനിങ് റൂമുകളും കോച്ചിംഗ് ഏരിയകളും ഉൾപ്പെടുത്തി വിപുലീകരിച്ചിട്ടുണ്ട്. സംസ്ഥാന സർക്കാരിന്റെ 2025-26 ബജറ്റിൽ പ്രാദേശിക തൊഴിൽ പദ്ധതികൾക്കായി മാറ്റിവെച്ച 5 മില്യൺ ഡോളറിന്റെ ഫണ്ടിൽ നിന്നാണ് പദ്ധതികൾ നടപ്പിലാക്കുന്നത്. ഈ നവീകരണത്തിലൂടെ പ്രതിവർഷം 150-ലധികം ആളുകൾക്ക് കൂടി പുതിയതായി പരിശീലനം നൽകാൻ സാധിക്കുമെന്നാണ് സർക്കാർ കണക്കുകൂട്ടുന്നത്.

സേവനങ്ങൾ എപ്രകാരം?

ജോലി കണ്ടെത്താൻ ബുദ്ധിമുട്ടുന്നവർക്ക് വ്യക്തിഗത കോച്ചിംഗ്, ഇന്റർവ്യൂ പരിശീലനം, പ്രീ-എംപ്ലോയ്‌മെന്റ് ട്രെയിനിങ് തുടങ്ങിയ സേവനങ്ങളാണ് ഇവിടെ ലഭിക്കുന്നത്. ബ്രദർഹുഡ് ഓഫ് സെന്റ് ലോറൻസ് ആണ് ഈ കേന്ദ്രത്തിന്റെ ദൈനംദിന പ്രവർത്തനങ്ങൾ നിയന്ത്രിക്കുന്നത്.

വിക്ടോറിയയിൽ ആരംഭിക്കുന്ന നാലാമത്തെ ത്രൈവ് ഹബ്ബാണിത്. ഫ്രാങ്ക്‌സ്റ്റൺ (Frankston), ബ്രോഡ്മീഡോസ് (Broadmeadows), സീമോർ (Seymour) എന്നിവിടങ്ങളിലാണ് മറ്റ് കേന്ദ്രങ്ങൾ പ്രവർത്തിക്കുന്നത്. തങ്ങളുടെ സേവനങ്ങളിലൂടെ ആളുകളെ മികച്ച തൊഴിലിലേക്ക് നയിക്കുകയാണ് ലക്ഷ്യമെന്ന് ബിഎസ്എൽ എക്സിക്യൂട്ടീവ് ഡയറക്ടർ ട്രാവേഴ്‌സ് മക്ലിയോഡ് (Travers McLeod) വ്യക്തമാക്കി.

ശ്രദ്ധിക്കേണ്ട കാര്യങ്ങൾ

ഈ ഹബ്ബുകളുടെ സേവനം പ്രധാനമായും വിക്ടോറിയയിലെ സ്ഥിരതാമസക്കാർക്കും പൂർണ്ണമായി ജോലി ചെയ്യാൻ അവകാശമുള്ള വിസകളിൽ (Full working rights) ഉള്ളവർക്കുമാണ് ലഭ്യമാകുക. താൽക്കാലിക വിസകളിൽ വർക്കിംഗ് റൈറ്റ്സ് ഇല്ലാത്തവർക്ക് ഈ സേവനം ലഭിക്കില്ല.

 2025-ൽ മാത്രം സംസ്ഥാനത്തെ ഇത്തരം കേന്ദ്രങ്ങൾ വഴി 770-ലധികം ആളുകൾക്ക് സഹായം ലഭിക്കുകയും അതിൽ 250-ലധികം പേർക്ക് തൊഴിൽ കണ്ടെത്താനും സാധിച്ചു. സേവനം ആവശ്യമുള്ളവർക്ക് 67 Brunswick Street, Fitzroy എന്ന വിലാസത്തിലോ 1300 875 004 എന്ന ഫോൺ നമ്പറിലോ ബന്ധപ്പെടാവുന്നതാണ്.

നിങ്ങളുടെ അഭിപ്രായം എന്താണ്? പുതിയ കുടിയേറ്റക്കാർക്കും തൊഴിൽ അന്വേഷകർക്കും ഇത്തരം കേന്ദ്രങ്ങൾ എത്രത്തോളം സഹായകമാകും? കമന്റ് ചെയ്യുക.

Photo : AI-Generated

Sajin Thiruvallam
News Editor