വിക്ടോറിയയിൽ ജൂലൈ 1 മുതൽ പുതിയ മാറ്റങ്ങൾ: വൈദ്യുതി ബിൽ കുറയും, വാടകക്കാർക്ക് ബോണ്ട് ട്രാൻസ്ഫർ ചെയ്യാം

മെൽബൺ: ഓസ്‌ട്രേലിയയിലെ വിക്ടോറിയ സംസ്ഥാനത്ത് കുടുംബങ്ങൾക്കും വാടകക്കാർക്കും വലിയ ആശ്വാസമേകി പുതിയ മാറ്റങ്ങൾ (Victorian July 1 Reforms). വർദ്ധിച്ചുവരുന്ന ജീവിതച്ചെലവുകൾക്കിടയിൽ, ജൂലൈ 1 മുതൽ പ്രാബല്യത്തിൽ വരുന്ന രണ്ട് സുപ്രധാന തീരുമാനങ്ങളാണ് സർക്കാർ പ്രഖ്യാപിച്ചിരിക്കുന്നത്. ജനങ്ങളുടെ വൈദ്യുതി ബില്ലിൽ ശരാശരി 5 ശതമാനത്തിന്റെ കുറവ് വരുത്തുന്നതിനൊപ്പം, വാടകക്കാർക്കായി ഓസ്‌ട്രേലിയയിൽ തന്നെ ആദ്യമായി ‘പോർട്ടബിൾ റെന്റൽ ബോണ്ട് സ്കീമും’ വിക്ടോറിയൻ സർക്കാർ അവതരിപ്പിക്കുന്നു.

വൈദ്യുതി ബില്ലിൽ ശരാശരി $84 ലാഭം

എസൻഷ്യൽ സർവീസസ് കമ്മീഷൻ (ESC) പുറത്തുവിട്ട പുതിയ തീരുമാനപ്രകാരം, സ്റ്റാൻഡിങ് അല്ലെങ്കിൽ ഡിഫോൾട്ട് പ്ലാനുകൾക്കുള്ള വിക്ടോറിയൻ ഡിഫോൾട്ട് ഓഫർ (VDO) ജൂലൈ 1 മുതൽ ശരാശരി 5 ശതമാനം കുറയും. ഇതിലൂടെ വീട്ടുകാർക്ക് വാർഷിക ബില്ലിൽ ഏകദേശം $84 ലാഭിക്കാൻ കഴിയും.

ചെറുകിട ബിസിനസ്സ് ഉടമകൾക്കും പുതിയ മാറ്റം വലിയ ആശ്വാസമാകും. അവർക്ക് ബില്ലിൽ 6 ശതമാനം കുറവാണ് ലഭിക്കുക, അതായത് ഏകദേശം $241 വാർഷിക ലാഭം.

വിക്ടോറിയയിലെ അഞ്ച് പ്രധാന വിതരണ ശൃംഖലകളെയും ആശ്രയിച്ച് ഈ ലാഭത്തിൽ വ്യത്യാസമുണ്ടാകും. ഉദാഹരണത്തിന്, ഔസ്നെറ്റ് (AusNet) ഉപഭോക്താക്കൾക്ക് $160 വരെ ലാഭം ലഭിക്കുമ്പോൾ, യുണൈറ്റഡ് എനർജി (United Energy) ഉപഭോക്താക്കൾക്ക് $50 ആയിരിക്കും ലാഭം. നിലവിൽ വിഡിഒ (VDO) പ്ലാനിലുള്ള 5,12,000-ത്തിലധികം വീടുകൾക്കും 62,000-ത്തോളം ചെറുകിട ബിസിനസ്സുകൾക്കും ഈ കിഴിവ് യാന്ത്രികമായി ലഭിക്കും. മറ്റ് റീട്ടെയിലർമാരും വരും മാസങ്ങളിൽ ഈ വിലക്കുറവ് നടപ്പിലാക്കുമെന്നാണ് പ്രതീക്ഷിക്കുന്നത്.

വാടകക്കാർക്കായി പുതിയ ബോണ്ട് ട്രാൻസ്ഫർ സിസ്റ്റം

വീട് മാറുന്ന വാടകക്കാർ നേരിടുന്ന വലിയ സാമ്പത്തിക പ്രതിസന്ധിയാണ് പുതിയ വീടിനായി നൽകേണ്ട ഡബിൾ ബോണ്ട് തുക. ഇതിനൊരു ശാശ്വത പരിഹാരമായാണ് സർക്കാർ ജൂലൈ 1 മുതൽ പോർട്ടബിൾ റെന്റൽ ബോണ്ട് സ്കീം (Portable Rental Bond Scheme) അവതരിപ്പിക്കുന്നത്.

ഇതുവഴി വാടകക്കാർക്ക് തങ്ങളുടെ നിലവിലുള്ള ബോണ്ട് തുക, റെസിഡൻഷ്യൽ ടെനൻസീസ് ബോണ്ട് അതോറിറ്റിയുടെ (RTBA) ഓൺലൈൻ പോർട്ടൽ വഴി പുതിയ പ്രോപ്പർട്ടിയിലേക്ക് നേരിട്ട് മാറ്റാൻ സാധിക്കും. പഴയ വീടിന്റെ ബോണ്ട് തിരികെ ലഭിക്കുന്നത് വരെ പുതിയ വീടിനായി മറ്റൊരു തുക കണ്ടെത്തേണ്ട ബുദ്ധിമുട്ട് ഇതോടെ ഇല്ലാതാകും. അപേക്ഷ തീർപ്പാക്കുന്നത് വരെ പഴയ പ്രോപ്പർട്ടി ഉടമയ്ക്കുള്ള ബോണ്ട് തുകയ്ക്ക് സർക്കാർ ഉറപ്പ് നൽകും. സംസ്ഥാനത്തെ ലക്ഷക്കണക്കിന് വരുന്ന വാടകക്കാർക്ക് ഈ തീരുമാനം വലിയൊരു ആശ്വാസമാകും.

Sajin Thiruvallam
News Editor