100 മില്യൺ ഡോളറിന്റെ വമ്പൻ മയക്കുമരുന്ന് വേട്ട ; 6 പേർ പിടിയിൽ

ഓസ്‌ട്രേലിയൻ തീരങ്ങളിലേക്ക് കടത്താൻ ശ്രമിച്ച 100 മില്യൺ ഡോളർ (ഏകദേശം 550 കോടി രൂപ) വിലമതിക്കുന്ന മയക്കുമരുന്ന് വൻ സംഘത്തിൽ നിന്നും പോലീസ് പിടികൂടി. ഓസ്‌ട്രേലിയൻ ചരിത്രത്തിലെ വലിയൊരു Queensland drug bust കൂടിയാണിത്. 178 കിലോ കൊക്കെയ്നും 142 കിലോ മെത്താംഫെറ്റാമിനും (meth) ആണ് ക്വീൻസ്‌ലാൻഡ് ജോയിൻ്റ് ഓർഗനൈസ്ഡ് ക്രൈം ടാസ്‌ക്‌ഫോഴ്‌സ് (QJOCTF) പിടിച്ചെടുത്തത്. ഈ വൻ മയക്കുമരുന്ന് വേട്ടയ്ക്ക് പിന്നിലെ അന്താരാഷ്ട്ര ബന്ധങ്ങളും, ഓപ്പറേഷൻ മിൻജിയാങ് (Operation Minjiang) എന്ന ദൗത്യത്തിലൂടെ പോലീസ് സംഘത്തെ പിടികൂടിയതെങ്ങനെയെന്നും താഴെ വായിക്കാം.

ഓപ്പറേഷൻ മിൻജിയാങ്: അന്വേഷണം തുടങ്ങിയത് ഇങ്ങനെ

കഴിഞ്ഞ മെയ് അവസാനത്തോടെ നോർത്ത് ക്വീൻസ്‌ലാൻഡിലെ മിഡ്‌ജ് പോയിന്റിൽ (Midge Point) വെള്ളത്തിൽ ഉപേക്ഷിക്കപ്പെട്ട നിലയിൽ 40 കിലോ കൊക്കെയ്ൻ ക്വീൻസ്‌ലാൻഡ് പോലീസ് സർവീസ് (QPS) കണ്ടെത്തിയതോടെയാണ് ഓപ്പറേഷൻ മിൻജിയാങ് (Operation Minjiang) ആരംഭിച്ചത്. ഇതിന് സമീപം കത്തിനശിച്ച ഒരു ട്രക്കും പോലീസ് കണ്ടെത്തിയിരുന്നു. കൂടുതൽ അന്വേഷണത്തിൽ കടലിന്റെ ആഴങ്ങളിൽ നങ്കൂരമിട്ടിരുന്ന ഒരു വലിയ കപ്പലിൽ നിന്നാണ് ഈ മയക്കുമരുന്നുകൾ ചെറുബോട്ടുകൾ വഴി തീരത്ത് എത്തിച്ചതെന്ന് വ്യക്തമായി. ഈ പ്രധാന കപ്പലായ MV Wealth പിന്നീട് സോളമൻ ഐലൻഡ്‌സ് (Solomon Islands) അധികൃതർ കസ്റ്റഡിയിലെടുത്തു.

അന്വേഷണവും അറസ്റ്റുകളും

അന്വേഷണത്തിന്റെ ഭാഗമായി ജൂൺ 6 ന് ട്രക്കിന്റെ ഉടമയായ 41 വയസ്സുകാരനെ മക്കായ് (Mackay) മേഖലയിൽ നിന്നും അറസ്റ്റ് ചെയ്തു. ഈ മയക്കുമരുന്നുകൾ ശേഖരിച്ച് ബ്രിസ്ബേനിലേക്ക് എത്തിച്ചത് ഇയാളാണെന്ന് പോലീസ് കോടതിയിൽ അറിയിച്ചു. തുടർന്ന് ബ്രിസ്ബേനിന്റെ വടക്കൻ സബർബായ പെട്രിയിൽ (Petrie) നടത്തിയ പരിശോധനയിൽ ഒരു കിലോ കൊക്കെയ്ൻ കണ്ടെത്തി. ഇവിടെ നിന്നും 32 വയസ്സുകാരനെ ജൂൺ 9 ന് അറസ്റ്റ് ചെയ്തു. ഈ രണ്ടുപേരെയും യഥാക്രമം ജൂൺ 19, ഓഗസ്റ്റ് 5 തീയതികളിൽ കോടതിയിൽ ഹാജരാക്കും.

ആകെ പിടികൂടിയത് 100 മില്യൺ ഡോളറിന്റെ മയക്കുമരുന്ന്

ജൂൺ 12 ന് മിഡിൽ പാർക്കിൽ (Middle Park) വെച്ച് മറ്റൊരു 32 വയസ്സുകാരനെ കൂടി പോലീസ് പിടികൂടി. ഇതിനുപുറമെ, ജൂൺ 13 ന് ഈഗിൾബിയിലും (Eagleby), പിന്നീട് മൗണ്ട് കോട്ടണിലുമുള്ള (Mount Cotton) ഒരു വീട്ടിൽ നിർത്തിയിട്ടിരുന്ന വാനിൽ നിന്നുമായി 178 കിലോ കൊക്കെയ്നും 142 കിലോ മെത്താംഫെറ്റാമിനും പോലീസ് പിടിച്ചെടുത്തു. ഈ സംഭവത്തിൽ 28 വയസ്സുള്ള ഈഗിൾബി സ്വദേശിയെയും അറസ്റ്റ് ചെയ്തു. ഇവരുടെ സംഘത്തിൽപ്പെട്ട മറ്റൊരു 28 വയസ്സുകാരനെ ഹിൽക്രെസ്റ്റിൽ (Hillcrest) വെച്ചും ജൂൺ 16 ന് അറസ്റ്റ് ചെയ്തു.

സിഡ്‌നിയിലെ ഗ്രീൻ വാലിയിൽ (Green Valley) വെച്ച് ജൂൺ 17 ന് 24 വയസ്സുകാരനെ കൂടി അറസ്റ്റ് ചെയ്തതോടെ, ഈ കേസിൽ ഇതുവരെ അറസ്റ്റിലായവരുടെ എണ്ണം ആറായി. ക്വീൻസ്‌ലാൻഡിലെ ജനങ്ങളെ വലിയൊരു വിപത്തിൽ നിന്നാണ് ഈ ദൗത്യത്തിലൂടെ രക്ഷിച്ചതെന്ന് ക്വീൻസ്‌ലാൻഡ് പോലീസ് ഡിറ്റക്ടീവ് ആക്ടിങ് ചീഫ് സൂപ്രണ്ട് ട്രോയ് പുകല്ലസ് (Troy Pukallus) വ്യക്തമാക്കി.

Video Credit : AFP