വെറും 9 മിനിറ്റിൽ ഫുൾ ചാർജ്! BYD Atto 5 ഓസ്‌ട്രേലിയയിൽ വരുമോ?

ചൈനീസ് ഇലക്ട്രിക് വാഹന നിർമ്മാതാക്കളായ ബിവൈഡി (BYD), തങ്ങളുടെ ജനപ്രിയ മോഡലായ യുവാൻ പ്ലസിന്റെ (Yuan Plus) പുതിയ പതിപ്പ് ന്യൂസിലാൻഡ് വിപണിയിൽ അവതരിപ്പിക്കാനൊരുങ്ങുന്നു. ബീജിങ് മോട്ടോർ ഷോ 2026-ൽ അനാവരണം ചെയ്ത മൂന്നാം തലമുറ യുവാൻ പ്ലസ്, ‘അറ്റോ 5’ (BYD Atto 5) എന്ന പേരിലാകും 2027-ൽ ന്യൂസിലാൻഡിൽ നിരത്തിലിറങ്ങുക. എന്നാൽ, ഈ പുതിയ എസ്‌യുവി ഓസ്‌ട്രേലിയൻ വിപണിയിൽ എത്തുമോ എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണമായിട്ടില്ല. നിലവിൽ ഈ വാഹനത്തിന് ഓസ്‌ട്രേലിയൻ വിപണിയിൽ പദ്ധതികളൊന്നുമില്ലെന്നാണ് ബിവൈഡി ഓസ്‌ട്രേലിയ വ്യക്തമാക്കുന്നത്.

വലുപ്പം വർദ്ധിപ്പിച്ച് ‘അറ്റോ 5’ നിലവിൽ ന്യൂസിലാൻഡിൽ വിറ്റഴിക്കുന്ന ‘അറ്റോ 3’-യുടെ വലുപ്പം വർദ്ധിപ്പിച്ച പതിപ്പാണ് പുതിയ മോഡൽ. പഴയതിനേക്കാൾ 210 മില്ലീമീറ്റർ നീളവും 50 മില്ലീമീറ്റർ വീതിയും ഇതിന് കൂടുതലുണ്ട്. കൂടാതെ വീൽബേസിൽ 50 മില്ലീമീറ്ററിന്റെ വർദ്ധനവുമുണ്ട്. വലുപ്പത്തിലുള്ള ഈ മാറ്റം പ്രകടമാക്കാനാണ് ‘അറ്റോ 5’ എന്ന പുതിയ പേര് തിരഞ്ഞെടുത്തതെന്ന് ബിവൈഡി ഓട്ടോ എൻസെഡ് ജനറൽ മാനേജർ വാറൻ വിൽമോട്ട് വ്യക്തമാക്കി. 2027-ൽ ലോഞ്ച് ചെയ്യുന്നതോടെ ന്യൂസിലാൻഡിൽ നിലവിലുള്ള അറ്റോ 3-ക്ക് പകരക്കാരനായി അറ്റോ 5 മാറും.

ആകർഷകമായ ഫീച്ചറുകളും ഫ്ലാഷ് ചാർജിങ്ങും ചൈനീസ് വിപണിയിൽ പുതിയ മോഡലിന്റെ പ്രധാന ആകർഷണം അതിലെ രണ്ടാം തലമുറ ബ്ലേഡ് ബാറ്ററിയാണ് (LFP). 540 കിലോമീറ്റർ റേഞ്ച് നൽകുന്ന 57.5 kWh, 630 കിലോമീറ്റർ റേഞ്ചുള്ള 68.5 kWh എന്നിങ്ങനെ രണ്ട് ബാറ്ററി ഓപ്ഷനുകളിൽ വാഹനം ലഭ്യമാകും. 

ഫ്ലാഷ് ചാർജിങ് സാങ്കേതികവിദ്യയാണ് മറ്റൊരു സവിശേഷത. വെറും 5 മിനിറ്റുകൊണ്ട് 10 മുതൽ 70 ശതമാനം വരെയും, 9 മിനിറ്റുകൊണ്ട് 97 ശതമാനം വരെയും ചാർജ് ചെയ്യാൻ സാധിക്കുമെന്നാണ് കമ്പനിയുടെ അവകാശവാദം. ലൈഡാർ (LiDAR) സാങ്കേതികവിദ്യയിലധിഷ്ഠിതമായ അഡ്വാൻസ്ഡ് ഡ്രൈവിങ് അസിസ്റ്റ് സിസ്റ്റം (DiPilot 300), മികച്ച സസ്പെൻഷൻ, വിശാലമായ ഇന്റീരിയർ എന്നിവയും പുതിയ മോഡലിന്റെ മാറ്റുകൂട്ടുന്നു.

ഓസ്‌ട്രേലിയയിൽ അറ്റോ 3 തന്നെ തുടരുമോ? പുതിയ മോഡലിന് നിലവിൽ ഓസ്‌ട്രേലിയൻ വിപണിയിൽ പദ്ധതികളൊന്നുമില്ലെന്നാണ് ബിവൈഡി ഓസ്‌ട്രേലിയ നൽകുന്ന സൂചന. ന്യൂസിലാൻഡ് ലോഞ്ചിന് പിന്നാലെ ഓസ്‌ട്രേലിയയിലും വാഹനം എത്തിയേക്കാമെന്ന് ചില വാഹന വിദഗ്ധർ വിലയിരുത്തുന്നുണ്ടെങ്കിലും, കമ്പനി ഇത് സ്ഥിരീകരിച്ചിട്ടില്ല. 

ഓസ്‌ട്രേലിയയിൽ നിലവിൽ അറ്റോ 3-യുടെ ഫേസ്‌ലിഫ്റ്റ് പതിപ്പായ ‘അറ്റോ 3 ഇവോ’ (Atto 3 Evo) അവതരിപ്പിക്കാനാണ് കമ്പനിയുടെ നീക്കം. ലോകമെമ്പാടും 11 ലക്ഷത്തിലധികം യൂണിറ്റുകൾ വിറ്റഴിഞ്ഞ വാഹനമാണ് യുവാൻ പ്ലസ്. ഇതിന്റെ പുതിയ അപ്‌ഗ്രേഡ് ആഗോള ഇലക്ട്രിക് വാഹന വിപണിയിൽ വൻ ചലനങ്ങൾ സൃഷ്ടിക്കുമെന്നാണ് പ്രതീക്ഷിക്കുന്നത്.

Sajin Thiruvallam
News Editor