ജിലോംഗ് റിഫൈനറിയിലെ തീപിടിത്തം: ഓസ്‌ട്രേലിയയിൽ ഇന്ധനക്ഷാമത്തിന് സാധ്യത; ഇന്ധനം വാങ്ങിക്കൂട്ടരുതെന്ന് ഊർജ്ജ മന്ത്രി 

സിഡ്‌നി: വിക്ടോറിയയിലെ ജീലോംഗ് എണ്ണ ശുദ്ധീകരണശാലയിൽ (Geelong Refinery) വൻ തീപിടിത്തം. കഴിഞ്ഞ ദിവസം  രാത്രി 11 മണിയോടെയാണ് തീപിടിത്തമുണ്ടായത്. ആളപായമില്ല എന്നത് ആശ്വാസകരമാണെങ്കിലും, രാജ്യത്തെ ഇന്ധന ഉൽപ്പാദനത്തെ ഇത് സാരമായി ബാധിക്കുമെന്ന് കാലാവസ്ഥാ വ്യതിയാന-ഊർജ്ജ വകുപ്പ് മന്ത്രി ക്രിസ് ബോവൻ സ്ഥിരീകരിച്ചു. ചാനൽ 9-ന്റെ ‘ടുഡേ ഷോ’യ്ക്ക് നൽകിയ പ്രത്യേക അഭിമുഖത്തിലാണ് മന്ത്രി പുതിയ വിവരങ്ങൾ പങ്കുവെച്ചത്.

പെട്രോൾ ഉൽപ്പാദനത്തെ ബാധിച്ചു, ഡീസലും വിമാന ഇന്ധനവും കുറച്ചു 

തീ പൂർണ്ണമായും നിയന്ത്രണവിധേയമായിട്ടില്ല. മുൻകരുതലിന്റെ ഭാഗമായി ഡീസൽ, വിമാന ഇന്ധനം (Jet fuel) എന്നിവയുടെ ഉൽപ്പാദനം റിഫൈനറിയിൽ വെട്ടിക്കുറച്ചിട്ടുണ്ട്. നിലവിൽ പെട്രോൾ ഉൽപ്പാദിപ്പിക്കുന്ന യൂണിറ്റിനെയാണ് തീപിടിത്തം ഏറ്റവും കൂടുതൽ ബാധിച്ചിരിക്കുന്നത്. വിക്ടോറിയയുടെ ഇന്ധന ആവശ്യത്തിന്റെ 50 ശതമാനവും, രാജ്യത്തിന്റെ മൊത്തം ആവശ്യത്തിന്റെ 10 ശതമാനവും നിർവ്വഹിക്കുന്നത് ഗീലോംഗ് റിഫൈനറിയാണ് എന്നത് പ്രതിസന്ധിയുടെ ആഴം വ്യക്തമാക്കുന്നു.

ഇന്ധനം വാങ്ങിക്കൂട്ടരുത് 

ഇന്ധനലഭ്യത സംബന്ധിച്ച് ജനങ്ങൾ ആശങ്കപ്പെടേണ്ടതില്ലെന്ന് മന്ത്രി ക്രിസ് ബോവൻ വ്യക്തമാക്കി. “ആവശ്യമുള്ള ഇന്ധനം മാത്രം വാങ്ങുക. കൂടുതലും വേണ്ട, കുറവും വേണ്ട. പ്രതിസന്ധി നമ്മൾ മറികടക്കും. റിഫൈനറി അധികൃതരുമായും ആംപോൾ (Ampol) പോലെയുള്ള മറ്റ് കമ്പനികളുമായും സർക്കാർ നിരന്തരം ബന്ധപ്പെടുന്നുണ്ട്,” മന്ത്രി പറഞ്ഞു.

വിദേശ രാജ്യങ്ങളുടെ പിന്തുണ 

ആഗോള തലത്തിലുള്ള ഇന്ധന, വളം പ്രതിസന്ധി പരിഹരിക്കുന്നതിനായി പ്രധാനമന്ത്രി ആന്റണി ആൽബനീസീ  തെക്കുകിഴക്കൻ ഏഷ്യൻ രാജ്യങ്ങളിൽ നടത്തുന്ന ഇടപെടലുകൾ ഫലം കാണുന്നുണ്ടെന്ന് ക്രിസ് ബോവൻ അവകാശപ്പെട്ടു. സിംഗപ്പൂർ, ബ്രൂണെ തുടങ്ങിയ രാജ്യങ്ങളിലെ ഭരണത്തലവന്മാരുമായി പ്രധാനമന്ത്രി ചർച്ചകൾ നടത്തി. നിലവിലെ യുദ്ധസാഹചര്യങ്ങൾക്കിടയിലും ഓസ്‌ട്രേലിയയിലേക്കുള്ള ഇന്ധന വിതരണം തടസ്സപ്പെടില്ലെന്ന് ഈ രാജ്യങ്ങൾ ഉറപ്പുനൽകിയതായും, പുതിയ പ്രതിസന്ധിഘട്ടത്തിൽ ഈ ഉറപ്പ് വളരെ വലുതാണെന്നും അദ്ദേഹം കൂട്ടിച്ചേർത്തു.

സംസ്ഥാനങ്ങളുടെ നടപടികൾ കോവിഡ് കാലത്തിന് സമാനമോ? 

പടിഞ്ഞാറൻ ഓസ്‌ട്രേലിയ (WA), ന്യൂ സൗത്ത് വെയിൽസ് (NSW) തുടങ്ങിയ സംസ്ഥാനങ്ങൾ സ്വന്തം നിലയ്ക്ക് ഡീസൽ ഉൾപ്പെടെയുള്ളവ സംഭരിക്കാൻ ശ്രമിക്കുന്നത് ഫെഡറൽ സർക്കാരിലുള്ള വിശ്വാസക്കുറവുകൊണ്ടാണോ എന്ന ചോദ്യം മന്ത്രി തള്ളി. ഇത് കോവിഡ് കാലത്തെ പോലെ സംസ്ഥാനങ്ങൾ തമ്മിലുള്ള മത്സരമല്ലെന്നും (COVID 2.0), മറിച്ച് ഫെഡറൽ സർക്കാരിന്റെ നടപടികൾക്ക് പൂർണ്ണ പിന്തുണ നൽകുന്ന കാര്യക്ഷമമായ ഇടപെടലാണെന്നും മന്ത്രി പ്രതികരിച്ചു. മറ്റ് സംസ്ഥാനങ്ങളുടെ വിഹിതം തട്ടിയെടുക്കാതെയാണ് പടിഞ്ഞാറൻ ഓസ്‌ട്രേലിയ ഇന്ധനം കണ്ടെത്തുന്നത് എന്നത് സ്വാഗതാർഹമാണെന്നും അദ്ദേഹം ചൂണ്ടിക്കാട്ടി.

അതെസമയം, ഓസ്‌ട്രേലിയയെ സംബന്ധിച്ചിടത്തോളം ഈ വാർത്ത വളരെ നിർണായകമാണ്. രാജ്യത്തിന്റെ ഊർജ്ജ സുരക്ഷാ നയങ്ങളിലെ പോരായ്മകളെയാണ് ഗീലോംഗ് റിഫൈനറിയിലെ തീപിടിത്തം തുറന്നുകാട്ടുന്നത്. വിക്ടോറിയയുടെ പകുതിയോളം ആവശ്യങ്ങൾ നിറവേറ്റുന്ന ഒരു കേന്ദ്രത്തിൽ ഒരു ദിവസമുണ്ടാകുന്ന തടസ്സം പോലും വിപണിയിൽ വലിയ പരിഭ്രാന്തി (Panic buying) സൃഷ്ടിച്ചേക്കാം.

മന്ത്രി ജനങ്ങളോട് ശാന്തരാകാൻ ആവശ്യപ്പെടുന്നുണ്ടെങ്കിലും, വിദേശ രാജ്യങ്ങളെ (പ്രത്യേകിച്ച് സിംഗപ്പൂർ, ബ്രൂണെ തുടങ്ങിയവയെ) ഇന്ധനത്തിനായി വലിയ തോതിൽ ആശ്രയിക്കുന്നത് പ്രതിസന്ധി ഘട്ടങ്ങളിൽ അപകടകരമാണ്. നിലവിലെ ആഗോള യുദ്ധസാഹചര്യങ്ങളും വിതരണ ശൃംഖലയിലെ തടസ്സങ്ങളും കണക്കിലെടുക്കുമ്പോൾ, കേവലം നയതന്ത്ര ഉറപ്പുകൾ കൊണ്ട് മാത്രം കാര്യങ്ങൾ സുഗമമാകണമെന്നില്ല. കൂടുതൽ ആഭ്യന്തര ഇന്ധന സംഭരണ കേന്ദ്രങ്ങൾ സ്ഥാപിക്കുകയും, ബദൽ ഊർജ്ജ സ്രോതസ്സുകളിലേക്കുള്ള മാറ്റം വേഗത്തിലാക്കുകയും മാത്രമാണ് ഓസ്‌ട്രേലിയക്ക് മുന്നിലുള്ള ശാശ്വത പരിഹാരം. സംസ്ഥാനങ്ങൾ സ്വന്തം നിലയ്ക്ക് ഇന്ധനം കണ്ടെത്താൻ ശ്രമിക്കുന്നത് ഒരു പരിധിവരെ സർക്കാരിന്റെ കേന്ദ്രീകൃത വിതരണ സംവിധാനത്തിലുള്ള ആശങ്കയെയാണ് കാണിക്കുന്നത്.

Sajin Thiruvallam
News Editor