പ്രധാനമന്ത്രിയുടെ അസീറിയൻ ന്യൂ ഇയർ സന്ദർശനവും 200,000 ഡോളറിന്റെ ധനസഹായവും; വീണ്ടും ചർച്ചയായി ഓസ്ട്രേലിയൻ മൾട്ടിക്കൾച്ചറലിസവും കുടിയേറ്റ ജനതയും
സിഡ്നി: ഓസ്ട്രേലിയയുടെ സാംസ്കാരിക വൈവിധ്യവും ഒപ്പം കുടിയേറ്റ സമൂഹങ്ങൾ നേരിടുന്ന സമകാലിക വെല്ലുവിളികളും വീണ്ടും സോഷ്യൽ മീഡിയയിൽ ചർച്ചയാക്കി പ്രധാനമന്ത്രി ആന്തണി അൽബാനീസിന്റെ അസീറിയൻ ന്യൂ ഇയർ സന്ദർശനം. സിഡ്നിയിലുള്ള ഫെയർഫീൽഡ് ഷോഗ്രൗണ്ടിൽ ഇന്ന് നടന്ന അസീറിയൻ പുതുവത്സര (Assyrian New Year) ആഘോഷങ്ങളിൽ ഓസ്ട്രേലിയൻ പ്രധാനമന്ത്രി ആന്റണി അൽബാനീസീ മുഖ്യാതിഥിയായി പങ്കെടുത്തു. അസീറിയൻ സമൂഹത്തിന്റെ സാംസ്കാരിക പൈതൃകത്തെ അദ്ദേഹം പ്രകീർത്തിക്കുകയും, ഈ വാർഷിക ഫെസ്റ്റിവലിന്റെ വളർച്ചയ്ക്കായി 200,000 ഡോളർ ഫണ്ട് അനുവദിക്കുമെന്ന് പ്രഖ്യാപിക്കുകയും ചെയ്തു.
രാവിലെ 10 മണി മുതൽ രാത്രി 10 മണി വരെ നീണ്ടുനിന്ന വിപുലമായ ആഘോഷ പരിപാടികളാണ് അസീറിയൻ നാഷണൽ കൗൺസിൽ ഓഫ് ഓസ്ട്രേലിയയുടെ നേതൃത്വത്തിൽ ഫെയർഫീൽഡിൽ അരങ്ങേറിയത്. ലൈവ് എന്റർടെയിൻമെന്റ്, പരമ്പരാഗത നൃത്തങ്ങൾ, ഫുഡ് ട്രക്കുകൾ, കുട്ടികൾക്കായുള്ള റൈഡുകൾ, രാത്രി 9 മണിക്കുള്ള വെടിക്കെട്ട് എന്നിവ ഫെസ്റ്റിവലിന്റെ മാറ്റുകൂട്ടി.
അസീറിയൻ ചർച്ച് ഓഫ് ദി ഈസ്റ്റിന്റെ പ്രതിനിധികളെയും കൗൺസിൽ പ്രസിഡന്റ് ഹെർമിസ് ഷഹെനെയും പ്രധാനമന്ത്രി നേരിട്ട് അഭിവാദ്യം ചെയ്തു. ഇതിന്റെ ചിത്രങ്ങൾ അദ്ദേഹം എക്സ് (ട്വിറ്റർ) പ്ലാറ്റ്ഫോമിൽ പങ്കുവെച്ചു. തൂവൽ തൊപ്പികളും പരമ്പരാഗത വസ്ത്രങ്ങളും ധരിച്ച അസീറിയൻ ജനതയ്ക്കൊപ്പം സ്യൂട്ട് ധരിച്ചുനിൽക്കുന്ന പ്രധാനമന്ത്രിയുടെ ചിത്രം ഓസ്ട്രേലിയയുടെ വൈവിധ്യത്തെയാണ് തുറന്നുകാട്ടുന്നത്.
ചരിത്രപരമായ അംഗീകാരം: അസീറിയൻ ജനതയെ ‘ഇറാഖിന്റെ ആദിമ ജനങ്ങൾ’ എന്ന് അദ്ദേഹം വിശേഷിപ്പിച്ചു. മെസൊപ്പൊട്ടേമിയൻ സംസ്കാരത്തിന്റെ പിൻഗാമികളായ ഇവരുടെ അതിജീവനത്തെ അദ്ദേഹം പ്രശംസിച്ചു.
ഓസ്ട്രേലിയയ്ക്കുള്ള സംഭാവനകൾ: കഠിനാധ്വാനവും രാജ്യത്തോടുള്ള സ്നേഹവും വഴി അസീറിയൻ സമൂഹം ഓസ്ട്രേലിയയെ മികച്ച ഒരു രാഷ്ട്രമാക്കി മാറ്റിയെന്ന് അദ്ദേഹം പറഞ്ഞു.
സർക്കാർ സഹായം: ഫെസ്റ്റിവലിന്റെ തുടർ നടത്തിപ്പിനും വളർച്ചയ്ക്കുമായി 200,000 ഡോളർ ഗ്രാന്റ് അദ്ദേഹം പ്രഖ്യാപിച്ചു.
ഓസ്ട്രേലിയൻ മലയാളികൾക്കുള്ള പാഠങ്ങൾ
അതെസമയം, ഓസ്ട്രേലിയൻ മൾട്ടിക്കൾച്ചറലിസത്തിന്റെ നേർക്കാഴ്ചയായ അസീറിയൻ ന്യൂ ഇയർ ആഘോഷത്തിൽ പ്രധാനമന്ത്രിയുടെ സന്ദേശം ഓസ്ട്രേലിയയിലെ മലയാളി സമൂഹവും വളരെ ശ്രദ്ധയോടെ വീക്ഷിക്കുന്നു.
ഓസ്ട്രേലിയയിൽ 61,000-ത്തിനും 70,000-ത്തിനും ഇടയിൽ ജനസംഖ്യയുള്ള അസീറിയൻ സമൂഹത്തിന്റെ വളർച്ചയും അവർ നേരിടുന്ന വിമർശനങ്ങളും, കേരളത്തിൽ നിന്നും കുടിയേറിയ മലയാളി സമൂഹത്തിന് ഒരു പാഠപുസ്തകമാണ്. ഓണം, വിഷു, ദീപാവലി തുടങ്ങിയ നമ്മുടെ ആഘോഷങ്ങൾ കേവലം വിനോദമല്ല, മറിച്ച് നമ്മുടെ സാംസ്കാരിക വേരുകൾ നിലനിർത്തുന്നതിനൊപ്പം ഓസ്ട്രേലിയയുടെ വൈവിധ്യത്തിന് നൽകുന്ന വലിയ സംഭാവന കൂടിയാണെന്ന് ഈ അസീറിയൻ ആഘോഷം വരച്ചുകാട്ടുന്നു. അതോടപ്പം, കുടിയേറ്റക്കാർക്ക് അവരുടെ തനതായ സംസ്കാരവും പൈതൃകവും ഇവിടെ ആഘോഷിക്കാനുള്ള അവസരം തുടർന്നും നൽകുന്നത്, അൽബാനീസീ സർക്കാരിന് കിട്ടുന്ന പിന്തുണ കൂടുന്നുവെന്നതും ഏറെ ശ്രദ്ദേയമാകുന്നു.
സമൂഹിക പ്രതികരണങ്ങളും രാഷ്ട്രീയ ധ്രുവീകരണവും
എന്നാൽ, പ്രധാനമന്ത്രിയുടെ അസീറിയൻ ന്യൂ ഇയർ സന്ദർശനവും 200,000 ഡോളറിന്റെ ധനസഹായവും വലിയ രീതിയിൽ ശ്രദ്ധിക്കപ്പെട്ടെങ്കിലും, സമൂഹമാധ്യമങ്ങളിൽ സമ്മിശ്ര പ്രതികരണമാണ് ലഭിച്ചത്. ഇന്ന് വൈകുന്നേരത്തോടെ എക്സിലെ അദ്ദേഹത്തിന്റെ പോസ്റ്റിന് താഴെ അനുകൂലിച്ചും പ്രതികൂലിച്ചും നൂറുകണക്കിന് കമന്റുകൾ നിറഞ്ഞു.
അനുകൂല പ്രതികരണങ്ങൾ: സാംസ്കാരിക ഐക്യത്തെയും കുടിയേറ്റക്കാരുടെ അധ്വാനത്തെയും പ്രകീർത്തിക്കുന്നവയായിരുന്നു പോസിറ്റീവ് കമന്റുകൾ.
വിമർശനങ്ങൾ: രാജ്യത്തെ നിലവിലെ ഭവന പ്രതിസന്ധി (Housing Crisis), ജീവിതച്ചെലവ് വർദ്ധനവ് (Cost of Living), ആരോഗ്യ മേഖലയിലെ പ്രശ്നങ്ങൾ എന്നിവ പരിഹരിക്കുന്നതിന് പകരം പ്രധാനമന്ത്രി ഇത്തരം ‘ഫോട്ടോ ഓപ്പുകൾക്ക്’ സമയം കണ്ടെത്തുന്നു എന്നാണ് പ്രധാന വിമർശനം.
ഇന്റഗ്രേഷൻ ചർച്ചകൾ: 1997-ൽ ഡേവിഡ് കാർട്ടി എന്ന പോലീസ് ഉദ്യോഗസ്ഥൻ കൊല്ലപ്പെട്ട സംഭവത്തിൽ അസീറിയൻ ഗാംഗ് അംഗം ഉൾപ്പെട്ടത് ചൂണ്ടിക്കാട്ടി, ഓസ്ട്രേലിയൻ സമൂഹവുമായി പൂർണ്ണമായി ഇഴുകിച്ചേരാത്ത ‘ഉപരിതല മൾട്ടിക്കൾച്ചറലിസത്തെ’ ചിലർ നിശിതമായി വിമർശിച്ചു. 2025-ൽ നടന്ന കുടിയേറ്റ വിരുദ്ധ റാലികളുടെ തുടർച്ചയായുള്ള ധ്രുവീകരണം 2026-ലും ശക്തമാണെന്ന് ഇത് സൂചിപ്പിക്കുന്നു.
Photo credit : social Media
