കാറ്റാടിപ്പാടം പദ്ധതി: AGL പിന്മാറി
മെൽബൺ: വിക്ടോറിയയിലെ ഗിപ്സ്ലാൻഡ് (Gippsland) തീരത്ത് സ്ഥാപിക്കാൻ ഉദ്ദേശിച്ചിരുന്ന ‘ഗിപ്സ്ലാൻഡ് സ്കൈസ്’ (Gippsland Skies) ഓഫ്ഷോർ വിൻഡ് എനർജി പദ്ധതിയിൽ നിന്ന് പ്രമുഖ ഊർജ്ജ കമ്പനിയായ എജിഎൽ (AGL) പിന്മാറി. സാമ്പത്തിക പ്രായോഗികതയും മറ്റ് പദ്ധതികൾക്ക് മുൻഗണന നൽകുന്നതുമാണ് കാരണമായി കമ്പനി ചൂണ്ടിക്കാട്ടുന്നത്.
ഈ വർഷം ഗിപ്സ്ലാൻഡിലെ പദ്ധതികളിൽ നിന്ന് പിന്മാറുന്ന മൂന്നാമത്തെ കമ്പനിയാണ് എജിഎൽ. നേരത്തെ ജർമ്മൻ കമ്പനിയായ ആർഡബ്ല്യുഇ (RWE), ബ്ലൂഫ്ളോട്ട് എനർജി (BlueFloat Energy) എന്നിവരും സമാനമായ പദ്ധതികൾ ഉപേക്ഷിച്ചിരുന്നു.
2032-ഓടെ ഓഫ്ഷോർ വിൻഡ് എനർജി വഴി 2 ജിഗാവാട്ട് വൈദ്യുതി ഉൽപ്പാദിപ്പിക്കുക എന്ന വിക്ടോറിയൻ സർക്കാരിന്റെ ലക്ഷ്യത്തിന് ഇത് വലിയ തിരിച്ചടിയാണ്. നിലവിലെ സാഹചര്യത്തിൽ ഈ ലക്ഷ്യം കൈവരിക്കാൻ സാധിക്കില്ലെന്ന് ഓഡിറ്റർ ജനറൽ കഴിഞ്ഞ ദിവസം മുന്നറിയിപ്പ് നൽകിയിരുന്നു. എന്നാൽ, ഊർജ്ജ സുരക്ഷയ്ക്ക് ഓഫ്ഷോർ വിൻഡ് അനിവാര്യമാണെന്നാണ് സർക്കാരിന്റെ നിലപാട്.
