വിലക്കിഴിവ് തട്ടിപ്പ്: കോൾസിനെതിരെ വിചാരണ തുടങ്ങി
മെൽബൺ: ഓസ്ട്രേലിയയിലെ വമ്പൻ സൂപ്പർമാർക്കറ്റ് ശൃംഖലയായ കോൾസിനെതിരെ (Coles) ഉപഭോക്തൃ സംരക്ഷണ ഏജൻസിയായ എസിസിസി (ACCC) നൽകിയ സുപ്രധാന കേസിന്റെ വിചാരണ മെൽബൺ ഫെഡറൽ കോടതിയിൽ ആരംഭിച്ചു. പ്രശസ്തമായ ‘ഡൗൺ ഡൗൺ, പ്രൈസസ് ആർ ഡൗൺ’ (Down Down, Prices Are Down) ക്യാമ്പയിനിലൂടെ ഉപഭോക്താക്കളെ തെറ്റിദ്ധരിപ്പിച്ചു എന്നാണ് കേസ്.
എന്താണ് കേസ്? ഉൽപ്പന്നങ്ങളുടെ വില ആദ്യം കൃത്രിമമായി ഉയർത്തുകയും, പിന്നീട് അൽപ്പം കുറച്ച് ‘വൻ വിലക്കിഴിവ്’ എന്ന പേരിൽ വിൽക്കുകയും ചെയ്തു എന്നതാണ് കോൾസിനെതിരെയുള്ള പ്രധാന ആരോപണം. 2022 ഫെബ്രുവരി മുതൽ 2023 മെയ് വരെയുള്ള കാലയളവിൽ 245 ഉൽപ്പന്നങ്ങളിലാണ് ഇത്തരത്തിൽ തട്ടിപ്പ് നടന്നതെന്ന് എസിസിസി ആരോപിക്കുന്നു.
ഇന്ന് വിചാരണ തുടങ്ങിയപ്പോൾ എസിസിസിക്ക് വേണ്ടി ഹാജരായ മുതിർന്ന അഭിഭാഷകൻ ഗാരി റിച്ച് എസ്.സി (Gary Rich SC) ശക്തമായ വാദങ്ങളാണ് നിരത്തിയത്. “ഈ വിലക്കിഴിവുകൾ സാങ്കേതികമായി സത്യമാണെങ്കിലും (Literally true), പൂർണ്ണമായും തെറ്റിദ്ധരിപ്പിക്കുന്നതാണ് (Utterly misleading),” അദ്ദേഹം കോടതിയിൽ പറഞ്ഞു.
കോടതിയിൽ ചൂണ്ടിക്കാണിച്ച ഒരു ഉദാഹരണമിതാണ്: ‘നേച്ചർസ് ഗിഫ്റ്റ്’ (Nature’s Gift) എന്ന Dog Food-ന് സാധാരണ 4 ഡോളർ ആയിരുന്നു വില. കോൾസ് ഇത് പെട്ടെന്ന് 6 ഡോളറാക്കി ഉയർത്തി. 28 ദിവസങ്ങൾക്ക് ശേഷം, ‘ഡൗൺ ഡൗൺ’ ഓഫർ എന്ന പേരിൽ വില 4.50 ഡോളറാക്കി കുറച്ചു. ഉപഭോക്താവിനെ സംബന്ധിച്ചിടത്തോളം ഇത് ഡിസ്കൗണ്ട് ആണെന്ന് തോന്നും, എന്നാൽ യഥാർത്ഥത്തിൽ പഴയ വിലയേക്കാൾ 50 സെന്റ് കൂടുതലാണ് അവർ നൽകുന്നത്.
എന്നാൽ കോൾസ് ഈ ആരോപണങ്ങൾ നിഷേധിച്ചു. സപ്ലയർമാർ (Suppliers) വില വർദ്ധിപ്പിച്ചതും ഉൽപാദനച്ചെലവ് കൂടിയതുമാണ് വിലമാറ്റത്തിന് കാരണമെന്നും, തങ്ങൾ ഉപഭോക്താക്കളെ വഞ്ചിച്ചിട്ടില്ലെന്നുമാണ് അവരുടെ വാദം.
പ്രത്യാഘാതങ്ങൾ: ഓസ്ട്രേലിയൻ ഉപഭോക്തൃ നിയമം ലംഘിച്ചെന്ന് തെളിഞ്ഞാൽ കോൾസിന് വൻ തുക പിഴയായി നൽകേണ്ടി വരും. മാത്രമല്ല, സമാനമായ കേസ് നേരിടുന്ന വൂൾവർത്ത്സിനും (Woolworths) ഈ വിധി നിർണ്ണായകമാകും. ഓസ്ട്രേലിയൻ ജനതയുടെ ദൈനംദിന ജീവിതത്തെ ബാധിക്കുന്ന ഈ കേസ് വലിയ ആകാംക്ഷയോടെയാണ് രാജ്യം ഉറ്റുനോക്കുന്നത്.
