ഓസ്ട്രേലിയൻ സർവ്വകലാശാലകളിൽ വംശീയത വെളിപ്പെടുത്തുന്ന നിർണ്ണായക റിപ്പോർട്ട് പുറത്ത് : കര്ശന നടപടി ഉണ്ടാകുമെന്ന് വിദ്യാഭ്യാസ മന്ത്രി
കാൻബറ: ഓസ്ട്രേലിയൻ സർവകലാശാലകളിൽ നിലനിൽക്കുന്ന വംശീയത, ജൂതവിരുദ്ധത (Antisemitism), ഇസ്ലാമോഫോബിയ, തദ്ദേശീയരായ ജനതയോടുള്ള വിവേചനം എന്നിവയെക്കുറിച്ച് പഠനം നടത്തിയ ഓസ്ട്രേലിയൻ ഹ്യൂമൻ റൈറ്റ്സ് കമ്മീഷന്റെ നിർണ്ണായക റിപ്പോർട്ട് പുറത്തുവിട്ടു. ‘റസ്പെക്ട് അറ്റ് യൂണി’ (Respect at Uni) എന്ന് പേരിട്ടിരിക്കുന്ന ഈ റിപ്പോർട്ട്, സർവകലാശാലാ ക്യാമ്പസുകളിൽ വിദ്യാർത്ഥികൾക്കും ജീവനക്കാർക്കും സുരക്ഷിതമായ അന്തരീക്ഷം ഉറപ്പാക്കുന്നതിന് അടിയന്തരമായ ദേശീയ നടപടികൾ ആവശ്യമാണെന്ന് ചൂണ്ടിക്കാട്ടുന്നു.
ഇന്ന് പാർലമെന്റിൽ ലഭിച്ച റിപ്പോർട്ട് പ്രകാരം, ഓസ്ട്രേലിയൻ ഉന്നതവിദ്യാഭ്യാസ മേഖലയിൽ വംശീയത ഇപ്പോഴും ഒരു തുടർക്കഥയാണെന്നും ഇതിനെതിരെ ശക്തമായ നിയമനടപടികളും ബോധവൽക്കരണവും ആവശ്യമാണെന്നും വ്യക്തമാക്കുന്നു.
റിപ്പോർട്ടിന്റെ പ്രധാന കണ്ടെത്തലുകൾ
ഓസ്ട്രേലിയയിലുടനീളമുള്ള സർവകലാശാലകളിൽ നിന്നായി 76,000-ത്തിലധികം വിദ്യാർത്ഥികളും ജീവനക്കാരുമാണ് ഈ പഠനത്തിൽ പങ്കെടുത്തത്. റേസ് ഡിസ്ക്രിമിനേഷൻ കമ്മീഷണർ ഗിരിധരൻ ശിവരാമന്റെ നേതൃത്വത്തിൽ നടന്ന ഈ പഠനം, ക്യാമ്പസുകളിലെ വംശീയതയുടെ ആഴവും വ്യാപ്തിയും തുറന്നുകാട്ടുന്നതാണ്.
സർവകലാശാലകളിൽ വംശീയമായ അധിക്ഷേപങ്ങളും വിവേചനങ്ങളും ഇപ്പോഴും നടക്കുന്നുണ്ട്.
നിലവിലുള്ള പരാതി പരിഹാര സംവിധാനങ്ങൾ പലപ്പോഴും പര്യാപ്തമല്ല.
ജൂതവിരുദ്ധത, ഇസ്ലാമോഫോബിയ, തദ്ദേശീയ ജനതയ്ക്കെതിരായ (First Nations people) അതിക്രമങ്ങൾ എന്നിവ പ്രത്യേകമായി തടയാൻ സംവിധാനങ്ങൾ ആവശ്യമാണ്.
പ്രധാന ശുപാർശകൾ
വിദ്യാർത്ഥികൾക്കും ജീവനക്കാർക്കും നേരെ നടക്കുന്ന വംശീയ അതിക്രമങ്ങൾ തടയുന്നതിനായി റിപ്പോർട്ട് മുന്നോട്ടുവെക്കുന്ന പ്രധാന നിർദ്ദേശങ്ങൾ ഇവയാണ്:
സർവകലാശാലകളിലെ വംശീയത തടയുന്നതിനായി രാജ്യമൊട്ടാകെ ഏകീകൃതമായ ഒരു ചട്ടക്കൂട് രൂപീകരിക്കുക.
പരാതികൾ നൽകുന്നതിനും അതിന്മേൽ കൃത്യമായ നടപടികൾ ഉറപ്പാക്കുന്നതിനും സുതാര്യമായ സംവിധാനം വേണം.
വംശീയതയ്ക്ക് ഇരയാകുന്ന വിദ്യാർത്ഥികൾക്കും ജീവനക്കാർക്കും മാനസികവും നിയമപരവുമായ പിന്തുണ നൽകണം.
സർക്കാരിന്റെ ഇടപെടലുകളും പുതിയ പരിഷ്കാരങ്ങളും
‘യൂണിവേഴ്സിറ്റീസ് അക്കോർഡിന്റെ’ (Universities Accord) ശുപാർശ പ്രകാരമാണ് അൽബാനീസ് സർക്കാർ ഇത്തരമൊരു പഠനത്തിന് ഉത്തരവിട്ടത്. റിപ്പോർട്ടിലെ കണ്ടെത്തെലുകൾ ഗൗരവമായി കാണുന്നുവെന്നും, ഉന്നതവിദ്യാഭ്യാസ മേഖലയിൽ നടപ്പിലാക്കിക്കൊണ്ടിരിക്കുന്ന പരിഷ്കാരങ്ങളുടെ ഭാഗമായി ശുപാർശകൾ നടപ്പിലാക്കുമെന്നും സർക്കാർ അറിയിച്ചു.
അതെസമയം, ഇതിനകം തന്നെ സർക്കാർ സ്വീകരിച്ചിട്ടുള്ള നടപടികളിലേക്ക് ഈ റിപ്പോർട്ട് കൂടുതൽ കരുത്തുപകരും:
സർവകലാശാലകൾ പരാതികളിൽ നടപടിയെടുക്കുന്നില്ലെങ്കിൽ വിദ്യാർത്ഥികൾക്ക് നേരിട്ട് പരാതി നൽകാൻ സ്വതന്ത്രമായ ഒരു ‘ദേശീയ സ്റ്റുഡന്റ് ഓംബുഡ്സ്മാനെ’ നിയമിച്ചിട്ടുണ്ട്.
സർവകലാശാലകളുടെ പ്രവർത്തനത്തിൽ സുതാര്യതയും ഉത്തരവാദിത്തവും ഉറപ്പാക്കാൻ പുതിയ ഭരണ തത്വങ്ങൾ നടപ്പിലാക്കി.
വിദ്യാഭ്യാസ മേഖലയിൽ ജൂതവിരുദ്ധത തടയുന്നതിനായി പ്രത്യേക കർമ്മസേനയെ രൂപീകരിച്ചു.
ലിംഗാധിഷ്ഠിത അക്രമങ്ങൾ തടയുന്നതിനായി നിർബന്ധിത ദേശീയ കോഡ് നടപ്പിലാക്കി.
വിദ്യാഭ്യാസ മന്ത്രിയുടെ പ്രതികരണം
റിപ്പോർട്ട് പുറത്തുവന്നതിന് പിന്നാലെ വിദ്യാഭ്യാസ മന്ത്രി ജേസൺ ക്ലെയർ ശക്തമായ ഭാഷയിലാണ് പ്രതികരിച്ചത്. “സർവകലാശാലകളിലോ മറ്റെവിടെയെങ്കിലുമോ വംശീയതയ്ക്ക് യാതൊരു സ്ഥാനവുമില്ല,” അദ്ദേഹം പറഞ്ഞു.
“സർവകലാശാലകൾ എന്നത് ആളുകൾ പഠിക്കുകയും ജോലി ചെയ്യുകയും ചെയ്യുന്ന ഇടം മാത്രമല്ല, അവർ ജീവിക്കുന്ന ഇടം കൂടിയാണ്. അവിടെ സുരക്ഷിതത്വം ഉറപ്പാക്കേണ്ടത് നമ്മുടെ കടമയാണ്. വിദ്യാർത്ഥികളുടെയും ജീവനക്കാരുടെയും അനുഭവങ്ങൾ കേൾക്കുമെന്ന് ഞങ്ങൾ ഉറപ്പുനൽകിയിരുന്നു, ഈ റിപ്പോർട്ട് അതാണ് ചെയ്യുന്നത്,” മന്ത്രി കൂട്ടിച്ചേർത്തു.
ഓസ്ട്രേലിയയിൽ പഠിക്കുന്ന ആയിരക്കണക്കിന് ഇന്ത്യൻ വിദ്യാർത്ഥികൾക്കും, പ്രത്യേകിച്ച് മലയാളികൾക്കും, ക്യാമ്പസുകളിൽ കൂടുതൽ സുരക്ഷിതമായ അന്തരീക്ഷം ഉറപ്പാക്കാൻ ഈ റിപ്പോർട്ടും തുടർന്നുള്ള സർക്കാർ നടപടികളും സഹായിക്കുമെന്നാണ് വിലയിരുത്തപ്പെടുന്നത്.
