ഏജ്ഡ് കെയർ മേഖലയിൽ സുപ്രധാന മാറ്റം; പാർലമെൻ്റ് പാസാക്കിയ പുതിയ ബില്ലിൽ പറയുന്നത് എന്ത്?

ഓസ്ട്രേലിയൻ വയോജന പരിചരണ (Aged Care) മേഖലയിൽ നിർണ്ണായകമായ ചില മാറ്റങ്ങൾക്ക് തുടക്കം കുറിക്കാൻ പോകുന്നു. സുപ്രധാനമായ ‘ദി ഏജ്ഡ് കെയർ ലെജിസ്ലേഷൻ അമെൻഡ്‌മെന്റ് ബിൽ 2026’ കഴിഞ്ഞ ദിവസം ഇരുസഭകളും പാസാക്കി. വയോജനങ്ങൾക്ക് നൽകുന്ന പരിചരണവും സേവനങ്ങളും മെച്ചപ്പെടുത്താൻ ലക്ഷ്യമിട്ടുള്ള പുതിയ നിർദ്ദേശങ്ങൾ എന്തൊക്കെയാണ്? ഇതിലെ Aboriginal and Torres Strait Islander Aged Care Commissioner പദവിയുടെ പ്രാധാന്യം എന്താണ്?

വരും വർഷങ്ങളിൽ ഈ മേഖലയിൽ കാതലായ മാറ്റങ്ങൾ വരുത്തുന്നതാണ് പുതിയ നിയമ നിർമ്മാണം.

പുതിയ കമ്മീഷണർ എപ്പോൾ ചുമതലയേൽക്കും?

ഏജ്ഡ് കെയർ ക്വാളിറ്റി ആൻഡ് സേഫ്റ്റി കമ്മീഷന് (Aged Care Quality and Safety Commission) കീഴിൽ സ്ഥിരമായി ഒരു അബോറിജിനൽ ആൻഡ് ടോറസ് സ്ട്രെയിറ്റ് ഐലൻഡർ ഏജ്ഡ് കെയർ കമ്മീഷണറെ നിയമിക്കുക എന്നതാണ് ബില്ലിലെ പ്രധാന നിർദ്ദേശങ്ങളിലൊന്ന്. തദ്ദേശീയരായ വയോജനങ്ങളുടെ ക്ഷേമം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.

Click here to listen to this news…

നിലവിൽ താൽക്കാലിക ചുമതല വഹിക്കുന്ന ജോഡി കാസറിന് (Jodi Cassar PSM) പകരമായി, മെറിറ്റ് അടിസ്ഥാനത്തിലുള്ള തിരഞ്ഞെടുപ്പ് പ്രക്രിയയിലൂടെയാകും പുതിയ സ്ഥിരം കമ്മീഷണറെ നിയമിക്കുക. 2027 ജൂലൈ 1 മുതൽ ഈ തസ്തിക ഔദ്യോഗികമായി നിലവിൽ വരുമെന്നാണ് സർക്കാർ വൃത്തങ്ങൾ വ്യക്തമാക്കുന്നത്. ബിൽ ഇരുസഭകളും പാസാക്കിയെങ്കിലും ഇതിന് ഇനി ഗവർണർ ജനറലിന്റെ ഔദ്യോഗിക അംഗീകാരം (Royal Assent) ലഭിക്കേണ്ടതുണ്ട്.

പുതിയ അസസ്മെൻ്റ് റിവ്യൂ പാത്ത്‌വേ

വയോജനങ്ങളുടെ പരിചരണ ആവശ്യങ്ങൾ വിലയിരുത്തുന്ന (Aged Care Assessment) പ്രക്രിയയിൽ വലിയ മാറ്റങ്ങൾക്ക് ബിൽ വഴിയൊരുക്കുന്നുണ്ട്. അസസ്മെൻ്റ് തീരുമാനങ്ങളിൽ എതിർപ്പുള്ളവർക്ക് അത് ചോദ്യം ചെയ്യാനും പുനഃപരിശോധിക്കാനും പുതിയൊരു ‘എസ്കലേഷൻ പാത്ത്‌വേ’ (Escalation Pathway) ബില്ലിലൂടെ കൊണ്ടുവരുന്നു. ചില പ്രത്യേക സാഹചര്യങ്ങളിൽ തീരുമാനങ്ങൾ വേഗത്തിൽ പുനഃപരിശോധിക്കാൻ ഇതിലൂടെ സാധിക്കും.

കൂടാതെ, സേവനദാതാക്കൾ (Providers) അധിക തുക ഈടാക്കിയാൽ അത് തിരികെ നൽകുന്നതിലെ (Refunds) നിയമങ്ങൾ കൂടുതൽ വ്യക്തമാക്കുന്നുണ്ട്. പണമടയ്ക്കുന്ന രീതികളിൽ കൂടുതൽ ഇളവുകളും പുതിയ വ്യവസ്ഥകൾ മുന്നോട്ടുവെക്കുന്നു.

സ്വതന്ത്ര അവലോകനം വരുന്നു

ബില്ലിന് പുറമേ, നിലവിലെ ഏജ്ഡ് കെയർ ക്ലാസിഫിക്കേഷൻ ആൻഡ് പ്രയോറിറ്റൈസേഷൻ അസസ്മെൻ്റ് ടൂളുകളിൽ ഒരു സ്വതന്ത്ര അവലോകനം നടത്താനും സർക്കാർ തീരുമാനിച്ചിട്ടുണ്ട്. ഇതിനായുള്ള വിശദാംശങ്ങൾ ഉടൻ പുറത്തിറങ്ങുമെന്നും 2027-ന്റെ ആദ്യ പകുതിയോടെ റിപ്പോർട്ട് സമർപ്പിക്കുമെന്നും ആരോഗ്യ വകുപ്പ് അറിയിച്ചു.

മന്ത്രി സാം റേയുടെ (Sam Rae) നേതൃത്വത്തിലാണ് ഈ പരിഷ്കാരങ്ങൾ ഏജ്ഡ് കെയർ നിയമം 2024-ന്റെ (Aged Care Act 2024) ഭാഗമായി നടപ്പിലാക്കുന്നത്.

നിങ്ങളുടെ അഭിപ്രായം പങ്കുവെക്കുക: ഓസ്ട്രേലിയയിലെ ഏജ്ഡ് കെയർ മേഖലയിൽ നടപ്പിലാക്കുന്ന ഈ പുതിയ മാറ്റങ്ങളെക്കുറിച്ച് നിങ്ങൾക്കെന്ത് തോന്നുന്നു? അസസ്മെൻ്റ് രീതികളിലെ മാറ്റങ്ങൾ സാധാരണക്കാർക്ക് ഗുണം ചെയ്യുമോ? നിങ്ങളുടെ പ്രതികരണം താഴെ രേഖപ്പെടുത്തുക.

Sajin Thiruvallam
Chief Editor