മെൽബണിലെ മലയാളി കുടുംബങ്ങൾക്കും ആശ്വാസം; അടിയന്തര ചികിത്സയ്ക്കായി Casey Hospital Expansion ആരംഭിച്ചു
Casey Hospital expansion യാഥാർത്ഥ്യമാകുന്നതോടെ മെൽബൺ സൗത്ത് ഈസ്റ്റിലെ കുടുംബങ്ങൾക്ക് പുതിയ പ്രതീക്ഷ. അടിയന്തര ഘട്ടങ്ങളിൽ മികച്ച ചികിത്സ വേഗത്തിൽ ലഭ്യമാക്കുക എന്ന ലക്ഷ്യത്തോടെ കേസി ഹോസ്പിറ്റലിലെ അത്യാഹിത വിഭാഗം (Emergency Department) വിപുലീകരിക്കുന്നതിനുള്ള നിർമ്മാണ പ്രവർത്തനങ്ങൾക്ക് തുടക്കമായി. പ്രതിവർഷം 52,000 രോഗികൾക്ക് കൂടി അധികമായി മികച്ച പരിചരണം നൽകാൻ വിക്ടോറിയൻ സർക്കാരിന്റെ ഈ വികസന പദ്ധതിയിലൂടെ സാധിക്കും.
പുതിയ സൗകര്യങ്ങൾ എന്തൊക്കെ?
ആശുപത്രിയിലെ അടിസ്ഥാന സൗകര്യങ്ങൾ വർദ്ധിപ്പിച്ച് കാത്തിരിപ്പ് സമയം കുറയ്ക്കാനാണ് ഈ പദ്ധതിയിലൂടെ ലക്ഷ്യമിടുന്നത്. നിർമ്മാണം പൂർത്തിയാകുമ്പോൾ പുതിയ അത്യാഹിത വിഭാഗത്തിൽ താഴെ പറയുന്ന സൗകര്യങ്ങൾ ലഭ്യമാകും:
15 പുതിയ ഫാസ്റ്റ് ട്രാക്ക് സ്പേസുകൾ
30 പുതിയ എമർജൻസി കെയർ ക്യൂബിക്കിളുകൾ
20 പുതിയ ഷോർട്ട് സ്റ്റേ കിടക്കകൾ
7 പുതിയ റെസസിറ്റേഷൻ ബേകൾ (Resuscitation Bays)
ഇതിന് പുറമെ പുതിയ കൺസൾട്ടേഷൻ മുറികളും മാനസികാരോഗ്യത്തിനായി പ്രത്യേക വിഭാഗവും (Mental Health Zone) ഒരുക്കും. കുട്ടികൾക്ക് ഭയമില്ലാതെ ചികിത്സ ലഭ്യമാക്കുന്നതിനായി സ്വകാര്യതയുള്ളതും ശാന്തവുമായ പ്രത്യേക എമർജൻസി ഡിപ്പാർട്ട്മെന്റ് സോൺ നിർമ്മിക്കുമെന്നും അധികൃതർ വ്യക്തമാക്കിയിട്ടുണ്ട്.
നിർമ്മാണം അടുത്ത വർഷം പൂർത്തിയാകും
ആശുപത്രിയുടെ വിപുലീകരണ പ്രവർത്തനങ്ങൾ അതിവേഗം പുരോഗമിക്കുകയാണെന്നും, അടുത്ത വർഷത്തോടെ (2027) പുതിയ എമർജൻസി ഡിപ്പാർട്ട്മെന്റ് ജനങ്ങൾക്കായി തുറന്നുകൊടുക്കാൻ കഴിയുമെന്നും സർക്കാർ അറിയിച്ചു. ഈ പദ്ധതിയിലൂടെ നിർമ്മാണ മേഖലയിൽ 1,000-ത്തിലധികം തൊഴിലവസരങ്ങൾ സൃഷ്ടിക്കപ്പെടും. പദ്ധതി പൂർത്തിയാകുന്നതോടെ മെഡിക്കൽ രംഗത്ത് കൂടുതൽ പേർക്ക് തൊഴിൽ ലഭിക്കുകയും ചെയ്യും.
“കൂടുതൽ കിടക്കകളും മികച്ച സൗകര്യങ്ങളും ഒരുക്കുന്നതിലൂടെ കുടുംബങ്ങൾക്ക് അവരുടെ തൊട്ടടുത്തുതന്നെ അടിയന്തര ചികിത്സ ഉറപ്പാക്കാൻ സാധിക്കും,” ആരോഗ്യ അടിസ്ഥാന സൗകര്യ വികസന മന്ത്രി മെലിസ ഹോൺ (Melissa Horne) പറഞ്ഞു. ജനങ്ങൾ തിങ്ങിപ്പാർക്കുന്ന പ്രദേശങ്ങളിൽ ഇത്തരം അടിസ്ഥാന സൗകര്യങ്ങൾ വികസിപ്പിക്കുന്നത് വഴി വിദൂര യാത്രകൾ ഒഴിവാക്കി വേഗത്തിൽ ചികിത്സ ലഭ്യമാക്കാൻ കഴിയുമെന്ന് സൗത്ത്-ഈസ്റ്റേൺ മെട്രോപൊളിറ്റൻ ജനപ്രതിനിധികളായ ലീ ടാർലാമിസും (Lee Tarlamis) മൈക്കൽ ഗാലിയയും (Michael Galea) വ്യക്തമാക്കി.
